Ozee 9 - Bibeli do fee

Zamaai Ilaaɔ̃ á na ku kua mii fei

¹ Izirɛli, maà jɔ̀ i wɛɛò inɔ didɔ̃. Maà jɔ̀ inɔ didɔ̃ ku la siɛ bɛi zamaa iyi ihɔ̃ ngu ŋa, domi ì fũsi Aɔ̃ Lafɛ̃ɛɛ awɔ ì koo ì waa tɔɔ iwɛ̃ ŋa. Nɔ ì ya maa bi a sãɛ ribai iwɛ̃ ŋa ku tɔɔ tengi bii à ya kpokpo bilee fei.

² Amma bilee iyi à waa kpokpo, do ikpo iyi à waa fɔ̃u, a kaa jɛ titɛɛ. Vɛ̃ɛ titɔ̃ iyi ì waa degbeu, i kaa baa.

³ Inɛi Efaraimu ŋau a kaa yɔkɔ a buba si ilɛi Aɔ̃ Lafɛ̃ɛu. Aa sinda a nyi ilɛi Ezibitii walakɔ a bɔ ilɛi Asirii tengi bii aa jɛ sɔnda ŋa iyi à jɛ iwɔ̀.

⁴ A kaa ya dikã vɛ̃ɛ a ceaò Aɔ̃ Lafɛ̃ɛ kuwee ŋa má. Kuwee nŋa ŋau kaa dɔ̃aa si má. Sɔndau á baa ku yɛi bi tu ŋa bɛi sɔndai akũ. Inɛ ŋa iyi aa jɔɔ fei, aa so riisii. Sɔnda nŋau, ari nŋu akãi á nya ŋa, a kaa lɔò si inɔ kpasɛ̃i Aɔ̃ Lafɛ̃ɛ.

⁵ Bɛirei aa ce ŋa si ajɔi jingaui Aɔ̃ Lafɛ̃ɛ.

⁶ Waati iyi aa na i fita hai si ilɛ nŋɛ iyi aa lɛgɛu, ilɛi Ezibiti á gba ŋɛ, nɔ ilu nlai Nɔfui á jɛ balɛ nŋɛ, nɔ kakayɛtɛ ŋai aa bii amani jiida nŋɛ ŋa iyi à ce do isɔ fũfũ ŋau fei, nɔ wua tũtũ ku nɛ agũ ŋai aa bii bi kuwa nŋɛ ŋau fei.

⁷ Waati si bii Aɔ̃ Lafɛ̃ɛ á sã nŋɛ gbesei mii ŋa iyi ì ce ŋau fei mbɛ ŋa. Ntɔ ntɔ, waati si bii inɛ fei á ba ribai mii ŋa iyi ì ce ŋau mbɛ, nɔ inɛi Izirɛli ŋa à nɛ a mài. Ì ya fɔ ŋa i maa ni, waliiu ihɛ̃ í sũmui. Ì ya fɔ má ŋa i ni, inɛ iyi hundei Ilaaɔ̃ í wa siɛu ihɛ̃ wa fɔ ide hai nɛ yaase. Ntɔ ntɔ bɛɛbɛi, amma iyi bɛ ŋau bɛ fei, na laalɔ nkpɔ nkpɔ ku ce nŋɛ ŋai, do ide ku kɔ̀ nŋɛ do gbugbã nla nla.

⁸ Inɛ iyi wa wɔ njoo wa degbe inɛi Efaraimu ŋa, amu waliiui nɔ ǹ wɛɛ do Aɔ̃ Lafɛ̃ɛm. Taa ku mu yɛi ŋa í wa si kpãaɛ ŋa fei. Njɛ ku céi í wa si kpasɛ̃i Aɔ̃ Lafɛ̃ɛɛ.

⁹ Inɛ ŋau à dási laalɔ ku cei bɛi waatii inɛi Gibea ŋau. Amma Aɔ̃ Lafɛ̃ɛ wa ye gigii kurara nŋa ŋau, nɔ á kpã ŋa ijui na dulum du ŋa ŋau.

Inɔ kufɔi Aɔ̃ Lafɛ̃ɛ

¹⁰ Aɔ̃ Lafɛ̃ɛ í ni, tako wo ǹ yɛ Izirɛli í yɛi bɛi isoi jĩi ndii rezɛ̃ɛ iyi í wa si gbaa. Nɔ ǹ yɛ bala nŋɛ ŋai, bɛi iso sintei figi ŋa iyi à jĩa si jĩi ndii figi. Amma bi Baali-Peɔɔi à dede à nɛ, nɔ à koo à dasi ara nŋa anyɔ. Nɔ aŋa mɔ à baa à jɛ hai nɛ bɛɛrɛ ŋai bɛi iwɛ̃ iyi aŋa taka nŋa à biu.

¹¹ Bɛbɛi, bɛɛrɛi inɛi Efaraimu ŋa á fo ku nɛi bɛi yɛi. Inaaboi Efaraimu ŋa a kaa nɛ asĩ má nɔ a kaa bí. Efaraimu kaa nɛ amu ŋa má.

¹² Bii à bíi ama inɛmɔkɔ nŋa ŋa, an ya n kpa ŋai hee a maa la a maa ce awaasũ ŋa. Ntɔ ntɔ, inɔ kufɔi á jɛ tu ŋa waati iyi an sɛkɛɛ n jĩò ŋa.

¹³ Waati iyi ǹ yɛ Efaraimu, í yɛi bɛi jĩi ndii kpakpa tengi bii mandi í wa. Amma Efaraimu í nɛ ku fitaò amaɛ ŋa wai bi woo kpa inɛu.

¹⁴ Ntɔi Aɔ̃ Lafɛ̃ɛ, ì nɛ i ce ngɔgɔ. Amma mii aa ce. Jɔ̀ abo nŋa ŋau a jɛ gbɛnda a maà ya ba amu ŋa iyi aa na amɔ.

¹⁵ Laalɔ nŋau fei í fita gbugbãai Giligali bɛ. Si gãmɛu bɛi n kù bi ide nŋa. Na laalɔ ku ce nŋa an lele ŋai hai kpasɛ̃m. N kaa n nɛ kubi nŋa má. Inɛ ngbo nŋa ŋau fei ilu itĩ ku yika ŋai.

¹⁶ Inɛi Efaraimu ŋau à yɛi bɛi jĩi iyi à da, nɔ icãɛ í gbɛ. A kaa so iso má, nɔ baa bii à nɛ amu ŋa nɔ à nɛ kubi nŋa, an jɔ̀ a kui.

¹⁷ Aɔ̃ Lafɛ̃ɛm á fũsi ŋa awɔi si na iyi í jɔ̀ à kɔ̀ ku gbɔ ideɛ. Na nŋu, aa ya maa sa a maa dabii si ilɛ mmu ŋa.