Ozee 8 - Bibeli do fee

Inɛ iyi í gbɛ̃ fufu, fufu dabii í ya da

¹ Aɔ̃ Lafɛ̃ɛ í ni, i fã kuu ŋa i faò laakaii inɛ ŋa. Laalɔ í cuku wai si kpasɛ̃i Aɔ̃ Lafɛ̃ɛ bɛi kungbã í ya cuku wa hai lele, si na iyi í jɔ̀ a kù jirima akabuu iyi í wa si gãmɛi awaò ŋa nɔ à ce ide ku kɔ̀ si gãmɛi ikɔm ŋa.

² Aa na a maa dɔ̃ sim anui a maa ni, Aɔ̃ Lafɛ̃ɛ, awa inɛi Izirɛli ŋa, à màɛ.

³ Inɛi Izirɛli ŋa à fũsi mii jiida awɔ, mbɛɛ nŋa ŋa aa na a maa lele ŋai.

⁴ Aŋa taka nŋai à soa ara nŋa ilaalu ŋa, nɔ kù jɛ baa do woodam. À soa ara nŋa akawe ŋa, nɔ kù jɛ do kumàsim. À cea ara nŋa iwɛ̃ ŋa do isɔ fũfũ nŋa ŋa do wura nŋa ŋa, nɔ nŋui í jɛ kpãa gɔ iyi á nyɔ ŋa.

⁵ Iŋɛ inɛi Samari ŋa, Aɔ̃ Lafɛ̃ɛ í kɔ̀si kɛtɛ kombo saasaabɔ nŋɛ iyi ì ce ŋa. Nɔ í ni, ǹ wɛɛò idɔɔkɔ̃ na iri nŋa. Kuwɛɛ nŋɛ do taaleu, hee waati yoomai á leekĩ.

⁶ Kɛtɛ kombo saasaabɔ nŋɛu wa naai hai Izirɛli. Iwɛ̃i, kù jɛ Ilaaɔ̃. Woo ce icɛi awɔ gɔi í coo. Na nŋu, kɛtɛ kombo saasaabɔi Samariu, aa bububuui.

⁷ Si bɛi fufui ì waa gbɛ̃ ŋa, fufu dabii nla nlai aa na i da ŋa. À ya kpa mɔnda gɔ a ni, bilee iyi í fita nɔ kù bí, i kaa ba iyafũɛ. Nɔ baa bii í jɛ í bí mɔi, inɛ njoo ŋai aa jɔɔ.

⁸ Izirɛli í jɔ̀ inɛ ŋa à biiɛ. Nsɛiu ihɛ̃ bɛbɛi, í wai si inɔi inɛi ilɛ ŋa bɛi mii gɔ iyi inɛ kãma kù bi má.

⁹ À dedei à nɛ ilɛi Asiri. A kù yɛi bɛi sɛnga iyi í wɛɛ nŋu akãɛ. Inɛi Efaraimu ŋa aa sãi na akabuu iyi à dĩ do inɛi ilɛ mmu ŋau.

¹⁰ Baa do iyi à cea inɛi ilɛ mmu ŋau amua ŋa, an tɔtɔɔ ŋai, nɔ kaa kpɛ mɔm aa ba ijuukpã na aso iyi ilaalu do amai ilaalu ŋau aa kãa nŋa.

¹¹ Efaraimu í ce bi kuwee ŋaui nkpɔ nkpɔ ku ba ku ce dulum. Bi kuwee ŋaui à baa à jɛaa afe bii á ba ku maa ceò dulum.

¹² Baa bii ǹ kɔaa woodam ŋau dubu nkpɔ nkpɔ, wooda ŋau aa jɛaai bɛi mii titɔ̃.

¹³ À ya ce kuwee do mɛɛmu ŋa a naam wai, si na iyi í jɔ̀ à ya bi iŋa ku ŋɔ. Amma amu Aɔ̃ Lafɛ̃ɛ, n ci ya n gba kuwee nŋa ŋau. Bɛbɛi, ǹ ye gigii kurara nŋa ŋau, nɔ an kpã ŋa ijui na dulum du ŋa ŋau. Inɛ nŋu ŋau, aa sinda a nyi ilɛi Ezibiti mái.

¹⁴ Inɛi Izirɛli ŋau à gbɛjɛ inɛ iyi í taka ŋai, nɔ à ma ile kusĩa ŋa ntɔ ntɔ. Inɛi Zudaa ŋa mɔ à ma ilu ku nɛ gbugbã ŋa nkpɔ nkpɔ. An jɔ̀ ina ku naa si ilu nŋa ŋaui, nɔ ku ce asɔɔi kabai bomma nŋa ŋau.