Ozee 7 - Bibeli do fee

¹ Waati iyi ǹ wa n bi n faaba inɛi Izirɛli ŋa, kurarai inɛi Efaraimu ŋa do laalɔ ku cei inɛi Samari ŋai ǹ ya n maa n yɛ, domi iboi à ya maa sɔ, nɔ à ya lɔ inɔ kpasɛ̃ ŋai a maa ce ile bata ngba. Woo ce daa sãmi ŋau à ya maa gba mii ndii inɛ ŋai si kpãa ŋa.

² Inɛ kãma ci ya fɔ si idɔɛ ku ni, Ilaaɔ̃ wa ye gigii laalɔ ŋa iyi inɛ ŋa à waa ce fei. Bɛbɛi, laalɔ ŋa iyi à waa ce ŋaui à kaako ŋa, nɔ ǹ wa n yɛ fei ndɛɛ si wajum.

³ À ya jɔ̀ inɔi ilaalu ku maa dɔ̃i na laalɔ iyi à waa ceu. Do ibo nŋai à ya fɔtɔtɔi lasabui akawe ŋau.

⁴ Aŋa fei woo ce sakara ŋai. À yɛi bɛi bi ku sɔ̃ pɛ̃ɛ iyi woo sɔ̃ pɛ̃ɛu í jɔ̀ wa gbãa ntɔ ntɔ nɔ kù waa ce laakaiɛ má hai waati iyi í kpo iyafũu hee í koo í dedeò.

⁵ Ajɔ iyi à waa jɛa ilaalu jingau, akawe ŋau à ya dasi ara nŋa bɔ̃ɔi na gbugbãi atɛ̃ vɛ̃ɛu. Waati bɛɛbɛi ilaalu í ya to si woo yaako inɛ ŋau awɔ.

⁶ Woo ce sɔɔlui zamba laalɔ ŋau bɛ, idɔ nŋa í yɛi bɛi inai bi ku sɔ̃ pɛ̃ɛ. Idũ, idɔɔkɔ̃ nŋa í ya sũi, amma bii iju í má, í ya dedei ku maa jo bɛi ina nla nla.

⁷ Aŋa fei à ya maa gbãai bɛi inai bi ku sɔ̃ pɛ̃ɛ, nɔ à ya ce nfei inɛ ngbo nŋa ŋaui. Ilaalu nŋa ŋau mɔ à ya maa cukui akã akã, nɔ kãma nŋa ci ya kpem.

⁸ Inɛi Efaraimu ŋau à tɔtɔɔ ara nŋai do dimi mmu ŋa. Inɛi Efaraimu ŋau à baa à yɛi bɛi kaa ku sɔ̃ iyi a kù sinda.

⁹ Isɛ mmu ŋa à waa cɔ̃ɔcɔ̃ɔ gbugbã nŋa ŋa, amma a kù waa mà. À baa à ce mɔkɔ ngbo, amma a kù mà.

¹⁰ Inɛi Izirɛli ŋau, ilu faau ŋai. Faau nŋai í jɛ sɛɛdai kurara nŋa. Inɛi Izirɛli ŋau à kɔ̀ ku nyi wa bi amu Aɔ̃ Lafɛ̃ɛ nŋa. Baa do mii ŋa iyi í ba ŋau bɛ fei, a kù dɛdɛɛm.

¹¹ Inɛi Efaraimu ŋa à yɛi bɛi ankasiidi. Lasabu nŋa kù jĩisa nɔ a kù nɛ bisi. Inɛi Ezibiti ŋai à kpe. Si anyiɛ, nɔ à dede à nɛ ilɛi Asiri.

¹² Waati iyi à waa nɛ, ŋɔi ǹ sɔ taaom si ŋa ǹ jɔ̀ à cuku wa bɛi yɛi ŋa iyi à waa fo lele, nɔ ǹ kpã ŋa iju si bɛi ǹ na ŋa baauɛ wa tã si igbɛ nŋau.

¹³ Inɔ kufɔi á ba ŋa si na iyi í jɔ̀ à saam à nɛ hee jĩijĩ. Nfe ku cei á ba ŋa si na iyi í jɔ̀ à dedeò ide ku kɔ̀ si gãmɛm. À waa sɔ ibo ŋa si gãmɛm. To, bɛirei an ce n faaba ŋa má.

¹⁴ A ci ya dɔ̃ anu wa ikpa bi tom do idɔ nŋa fei. Amma à ya maa dɔ̃ anui si antaii daayi nŋa. À ya tɔtɔɔi ku ba a ba bilee do vɛ̃ɛ, nɔ à ya maa jĩim nii.

¹⁵ Amui ǹ na ŋa ikɔ, nɔ ǹ jɔ̀ à nɛ gbugbã, amma sɔɔlui laalɔi à waa ce si gãmɛm.

¹⁶ À sinda à waa baa, amma kù jɛ bi tom. À yɛi bɛi bioo iyi í ka. Inɛ ngbo nŋa ŋa aa kui si igũ, na ide laalɔ ku fɔ nŋa si gãmɛm. Na ŋɔi í jɔ̀ inɛi Ezibiti ŋa aa maa yaako ŋa.