Ozee 6 - Bibeli do fee

¹ Aa na i fɔ i maa ni ŋa, ka koo, ka nyi bi Aɔ̃ Lafɛ̃ɛ. Nŋui í mɛɛ wa, nɔ nŋui á jɔ̀ kumɛɛu ku tã. Nŋui í cã wa, nɔ nŋui á jɔsi kumɛɛ nwa ŋau iwɔ.

² Nŋui á jɔ̀ ka ba kuwɛɛ si anyii ajɔ minji. Si ajɔ mɛɛtasiau, á dede wai, nɔ aa ka maa wɛɛi si wajuɛ.

³ Na nŋu, ka mà nɔ ka dɛdɛ Aɔ̃ Lafɛ̃ɛ ku mà. Kunaaɛ kù nɛ sika kãma bɛi kunaai amɛɛjuumá. Á naa si wai bɛi ijĩ, bɛi ijĩi jɛadɔ̃ iyi í ya jɔ̀ ilɛ ku mandi.

⁴ Iŋɛ inɛi Efaraimu ŋa, bɛirei an ce nŋɛ. Iŋɛ inɛi Zudaa ŋa, bɛirei an ce nŋɛ. Naanɛ nŋɛ í yɛɛm nii bɛi kudũi ijĩi daadaakɔ, walakɔ bɛi ikpãi daadaakɔ iyi í ya wɔ anu akã.

⁵ Na ŋɔi í ce ǹ wahala ŋa do ide iyi ǹ jɔ̀ walii ŋau à sɔ̃ ŋau, nɔ ǹ kpa ŋa do idei gɛlɛm ŋa. Ǹ kiiti ŋa dasã nkpa.

⁶ Ntɔ ntɔ, kù jɛ kuwee ŋai ǹ bi, amma ǹ bi i jɛ ilu naanɛ ŋai. Ǹ bi i mà ŋa iyi amui ǹ jɛ Aɔ̃ Lafɛ̃ɛ. Inɛ nŋu bɛ í re i maa ceem kuwee ŋa iyi à ya jo si ina fei sãa sãa.

Mii laalɔ ŋa iyi wa ce si ilɛi Izirɛli

⁷ Iŋɛ mɔ i kù jirima akabuum bɛi inɛi ilui Adamu ŋa. Si gãmɛu bɛi ì zambam ŋa.

⁸ Galaadi, ilui inɛ laalɔ ŋai. Tuubai njɛ iyi í dikãi wa kɔ̃ bɛ.

⁹ Do yaase bɛi wuaai sooge ŋa, à ya maa manjia inɛ ŋa ku ba a kpa ŋa, do yaase bɛɛbɛi wuaai woo wee ŋau à ya manjia inɛ ŋa a maa kpa ŋa si kpãai Sikɛmu. Nɔ iyi bɛ, mii laalɔi.

¹⁰ Si ilɛi Izirɛli, ǹ yɛ mii laalɔ ŋa. Si ilɛu, inɛi Efaraimu ŋa à sinda si iwɛ̃ ŋa ku tɔɔ, nɔ nŋui í jɛ sakara ku ce. Do yaase bɛɛbɛi inɛi Izirɛli ŋau à dasi ara nŋa riisi.

¹¹ Iyi í jɛ ti awɔ mɔ Zudaa, à waa ce sɔɔlui ku muɛ. Aɔ̃ Lafɛ̃ɛ í ni, an teese yaasei kuwɛɛi inɛm ŋau.