Ozee 5 - Bibeli do fee

Woo na inɛi Izirɛli ŋa ikɔ laalɔ ŋau

¹ Iŋɛ woo wee ŋau, i sotĩ i gbɔ ku ce ncɛɛ ŋa. Iŋɛ mɔ inɛi Izirɛli ŋa, i ce laakai ŋa. Iŋɛ mɔ inɛi kpasɛ̃i ilaalu ŋa, i sotĩ i gbɔ ŋa. Iŋɛi à waa fãa si gãmɛi idei kiitiu bɛ, domi Misipa bɛ iŋɛi ì jɛ bɛi cɛkũm bi inɛm ŋau, nɔ ì jɛ má ŋa bɛi taa iyi à le si iri kutai Tabɔɔ.

² Inɛ ŋa iyi à yaa à jɔ̀ kpãa ŋau, njɛ ku dikã nŋa í caa, amma amu Aɔ̃ Lafɛ̃ɛ, an na aŋa fei ikɔ jiida.

³ Amu ǹ mà dimii inɛi Efaraimu ŋau, nɔ kucei inɛi Izirɛli ŋau mɔ kù waa manjiim baa keeke. Ntɔ ntɔ, iŋɛi ì tale si inɛi Efaraimu ŋau sakara ku ce, nɔ nsɛi inɛi Izirɛli ŋa fei à so riisi.

⁴ Mii iyi inɛi Izirɛli ŋau à ce kaa jɔ̀ a nyi wa bi Aɔ̃ Lafɛ̃ɛ nŋa má, domi lasabui iwɛ̃ ŋa ku tɔɔu í wa si ŋa nɔ a kù mà Aɔ̃ Lafɛ̃ɛ.

⁵ Faaui inɛi Izirɛli ŋai í jɛ sɛɛdai kuce nŋa. Inɛi Izirɛli do inɛi Efaraimu ŋau à koosɛi na kurara nŋa, nɔ inɛi Zudaa ŋau mɔ à koosɛ do aŋa.

⁶ Nɔ aa maa dɛdɛ Aɔ̃ Lafɛ̃ɛi na saabui kuwee nŋa ŋa iyi aa maa ce do angudã do kɛtɛ nŋa ŋa. Amma a kaa yɔɔ si na iyi í jɔ̀ í fa araɛ í jĩò ŋa.

⁷ Inɛ ŋau à zamba Aɔ̃ Lafɛ̃ɛi, domi à bí amu ŋa do abo ŋa iyi aŋaò ŋa a kù ce abɔdɔ̃. Na nŋu, hai ihɛ̃ ku bɔ cukpa akã, aa ce nfei ilɛ nŋaui do amani nŋa ŋa.

Igũ si gãmɛi Efaraimu do Zudaa

⁸ I fã kuu si ilui Gibea ŋa, nɔ i fã kãakãakĩ si ilui Rama ŋa. I dɔ̃ anui igũ si ilui Bɛti-Avɛni, iŋɛ tɔkui Bɛnzamɛɛ ŋa.

⁹ Aa ce nfei Efaraimui si ajɔi ijuukpãu. Ide iyi ǹ wa n sɔ̃ dimii inɛi Izirɛli ŋau ihɛ̃, ideu kù nɛ sika kãma.

¹⁰ Ilaalui inɛi Zudaa ŋa à yɛi bɛi inɛ ŋa iyi à waa tekĩò kɔɔi inya ŋa. Amma an jɔ̀ idɔɔkɔ̃m ku naa si ŋai bɛi inyi iyi wa cã.

¹¹ À waa kpã Efaraimu iju, nɔ à waa tɛɛsɛ asaiyaɛ ŋa, si na iyi í jɔ̀ í bi nŋu ku maa sɛi si inya ngbɛ.

¹² To, nsɛi bɛbɛi, amu ǹ baa ǹ yɛi bɛi juju ku jĩisa bi inɛi Efaraimu ŋa. Ǹ baa ǹ yɛi bɛi juju iyi kaa tã bi inɛi Zudaa ŋa.

¹³ Inɛi Efaraimu ŋa à yɛ bɔ̃ɔ iyi aŋa à nɛ, nɔ inɛi Zudaa ŋau mɔ à yɛ juju iyi aŋa à nɛ. Efaraimu í dede í bɔ Asiri, nɔ í bɛ inɛ ŋa bi ilaalui Yarɛbu. Amma ilaaluu bɛ kaa yɔkɔ ku jɔ̀ a ba iri, nɔ kaa ba nŋa iwɔi jujuu.

¹⁴ Ntɔ ntɔ, amu Aɔ̃ Lafɛ̃ɛ, an yɛi bɛi muusu nla bi inɛi Efaraimu ŋa, nɔ an yɛi bɛi muusu nla saasaabɔ bi inɛi Zudaa ŋa. Bii ǹ mu sɔndam, ǹ ya n gaai, si anyiɛ nɔ n nɛm. Ǹ ya n nɛòi, nɔ inɛ kãma ci ya gbaa.

Ku sinda ku nyi bi Ilaaɔ̃

¹⁵ Amu Aɔ̃ Lafɛ̃ɛ, ǹ wa n nɛ mbɛ. An sinda n nyi idem nii, hee koo to waati iyi aa mà kurara nŋa, a bɛi a sinda a nyi wa bi titom. Waati iyi aa na a wa si inɔ kufɔ, aa dɛdɛɛm.