Ozee 4 - Bibeli do fee

Kiitii Ilaaɔ̃ si gãmɛi inɛɛ ŋa

¹ Iŋɛ inɛi Izirɛli ŋa, i sotĩ i gbɔ idei Aɔ̃ Lafɛ̃ɛ ŋa, domi idei taale í wa si gãmɛi Aɔ̃ Lafɛ̃ɛ do inɛi ilɛɛ ŋau si na iyi í jɔ̀ jiida ku jɛ do dee dee ku jɛ do Ilaaɔ̃ ku mà kù wa si ŋa.

² Mii iyi í wa si anini nŋai í jɛ ikpe do ibo do inɛ ku kpa do ile do sakara do inɛ ku taa gbugbã. À ya so waati nŋa feii a maa kpaò inɛ ŋa.

³ Na nŋu, ilɛu si inɔ kufɔi ikui á wa si. Inɛ ŋa iyi à wa si ilɛu fei aa gbɛi aŋa do mɛɛmui sako ŋau do yɛi ŋa. Baa cɛ̃ɛi inɔ tenku ŋa aa kpa irii mam mam.

Ilaaɔ̃ wa yɛ taalei woo weei Izirɛli ŋa

⁴ Amma inɛ kãma ku maà yɛ taalei inɛ gɔ, nɔ inɛ kãma ku maà gbagba si inɛ gɔ. Ntɔ ntɔ, iŋɛ woo wee ŋau, si gãmɛi awaɛ ŋai kiiti í wa.

⁵ Aa koosɛi dasã nkpa, nɔ walii iyi í wa bi titɛɛu mɔ, á koosɛi idũ. Nɔ an ce nfei iyeɛ.

⁶ Ntɔ ntɔ, zamaam wa ce nfei si na iyi í jɔ̀ kù nɛ kumà. Nɔ si na iyi í jɔ̀ awɔ takaɛ i kù bi i màm, an nyaɛ hai si icɛm nii. Nɔ si bɛi ì gbɛjɛ woodai amu Aɔ̃ Lafɛ̃ɛɛ, bɛɛbɛ mɔi amu mɔ an gbɛjɛ amaɛ ŋa.

⁷ Bɛi woo wee ŋau à kpɔ à waa kɔ̃ɔsi bɛɛbɛ mɔi dulum du ŋa í ya maa kɔ̃ɔsi. Na nŋu, an kpaasi mii iyi í jɛ bɛɛrɛ nŋaui ku baa ku jɛ nŋa mii ndii anyɔ.

⁸ Kuwee ŋa iyi inɛm ŋa à naaò wa na dulum du ŋa, nŋu ŋai à ya maa jɛ. Na nŋu, à ya maa tale si ŋa dulum ku cei.

⁹ Amma mii iyi á na ku ba woo wee ŋau, nŋui á na ku ba zamaau mɔ. An ce nŋai si bɛi isɛɛnɛ nŋa í yɛ. Yaase bɛi kuce nŋa í yɛ, bɛɛbɛi an sã nŋa.

¹⁰ Aa maa jɛ, amma a kaa ya yo. Aa ya maa ce sakara, amma a kaa ya ba amu ŋa. Ntɔ ntɔ, à sinda à toa amu Aɔ̃ Lafɛ̃ɛ anyii ku ba a koo a maa ce sakara.

¹¹ Sakara ku ce do vɛ̃ɛ titɔ̃ ku mɔi í jɔ̀ zamaam nɔu kù nɛ iri.

¹² Zamaam nɔu, jĩi iyi í gbe í jɛ iwɛ̃ɛi í ya maa bee ide. Jĩi nɔui í ya jɛaa. Lasabui iwɛ̃ ŋa ku tɔɔi í naa si ŋa nɔ í jɔ̀ à nyɔ. Nŋui í jɛ bɛi sakara iyi à ya maa ce, nɔ à fɛɛfɛ do amu Aɔ̃ Lafɛ̃ɛ nŋa.

¹³ À ya maa ce kuwee ŋai si antaii iri kuta ŋa. À ya maa jo tuae ku dɔ̃ inunu ŋa si antaii geete ŋa, do si abɛi jĩi tũtũ ŋa tengi bii jĩjĩ jiida í wa. Na ŋɔi í jɔ̀ ama inaabo nŋa ŋau aa maa ta icui, nɔ aboi ama inɛmɔkɔ nŋa ŋau mɔ aa maa ce sakarai.

¹⁴ Amma n kaa n kpã ama inaabo nŋa ŋau iju na icu ku ta nŋa, nɔ n kaa n kpã aboi ama inɛmɔkɔ nŋa ŋau iju na sakara ku ce nŋa, domi aŋa woo wee ŋaui à ya gbã inaabo ŋa a bɔò ŋa kɔkɔlɛ, nɔ a ce kuwee do abo à ta icu ŋau. Zamaa iyi kù mà yaasei mii ŋa ku wũaa, si nfe ku cei wa bɔ.

¹⁵ Iŋɛ inɛi Izirɛli ŋa, sakarai ì waa ce ŋa. Amma iŋɛ inɛi Zudaa ŋa, i maà dasi ara nŋɛ kurara dimi bɛɛbɛ ŋa. I maà bɔ Giligali bi kutɔɔ iwɛ̃u ŋa, nɔ i maà bɔ Bɛti-Avɛni ŋa. Nɔ i maà ya fɔ ide do kugbasi i ni ŋa, hee do kuwɛɛi Aɔ̃ Lafɛ̃ɛ fei.

¹⁶ Izirɛli í ce itĩ ku yikai bɛi kɛtɛ iyi í kɔ̀ icɛ ku ce. Na nŋu, na mii Aɔ̃ Lafɛ̃ɛ njɛ mɔ á gbã ku bɔòɛ ku jɛ bɛi angudã tengi bii bantuma í cĩ.

¹⁷ Inɛi Efaraimu ŋa à so ara nŋa à dasi iwɛ̃ ŋa ku tɔɔ. I jɔ̀ ŋa bɛ ŋa.

¹⁸ Hai à mɔ hee í caa à tã gbakã, à ya maa ce sakarai. Anyɔi inɛ ngbo nŋa ŋa à ya bi ku re bɛɛrɛ.

¹⁹ Fufu á bii ŋai, nɔ anyɔ á mu ŋa si kuwee nŋa ŋau.