Ozee 3 - Bibeli do fee

Ilaaɔ̃ wa cɔ laakaii Ozee

¹ Ŋɔi Aɔ̃ Lafɛ̃ɛ í sɔ̃m má í ni, abo iyi inɛ gɔ í bi iyi í jɛ abo à ce sakarau, koo buu. Buu do yaase bɛi Aɔ̃ Lafɛ̃ɛ í bi inɛi Izirɛli ŋau. Aŋau bɛ, à ya sindai si iwɛ̃ ŋa, nɔ à ya bi kaa ŋa iyi à ce do rezɛ̃ɛ.

² Ŋɔi ǹ nyi ǹ gba abom má. N bɛi n gbaa, fia kpɛkɛlɛ maatũi ǹ sã do ɔɔzu tongoo cĩɔ mɛɛfa.

³ Nɔ ǹ sɔ̃ɔ ǹ ni, aa gbe idem ihɛ̃i hee ku kpɛ. I kù nɛ i ce sakara má, nɔ inɛmɔkɔ mmu kãma kaa sũòɛ má. Nɔ baa amu takam mɔ, n kaa n sũòɛ má.

⁴ Ntɔ ntɔ, inɛi Izirɛli ŋa aa wɛɛi waati sisɔ hai nɛ ilaalu, nɔ a kaa nɛ inɛ ngbo ŋa. A kaa nɛ iwɛ̃ ŋa, nɔ a kaa ya ce kuwee ŋa, nɔ a kaa nɛ mii ŋa iyi à ya beeò idɔɔbii Ilaaɔ̃.

⁵ Si anyiɛ, inɛi Izirɛli ŋau aa sinda a nyi wa, nɔ aa maa dɛdɛ Aɔ̃ Lafɛ̃ɛ do ilaalu nŋa iyi à bí si dimii Davidiu. Si zigiida nŋau, aa maai si Aɔ̃ Lafɛ̃ɛ wa nɔ aa maai si jiida ku jɛɛ si waati ŋa iyi wa mɔsi do waju.