Ozee 2 - Bibeli do fee

Izirɛli á jɛ zamaai Ilaaɔ̃ má

¹ Ajɔ wa naa si bii inɛi Izirɛli ŋau aa na a kpɔ hee ku caa, hee a kaa yɔkɔ a ka ŋa bɛi sãai itĩi tenku iyi inɛ kaa yɔkɔ ku kaa. Nɔ tengi bii Ilaaɔ̃ í tako í sɔ̃ ŋa wo í ni, i kù jɛ zamaam ŋa, á nyi ku kpe ŋa má ku ni, amai amu Ilaaɔ̃ ilu hunde.

² Waati bɛɛbɛi inɛi Zudaa ŋa do inɛi Izirɛli ŋau aa tɔtɔɔ njɛ nɔ a so inɛ akã ku jɛ inɛ ngbo nŋa, nɔ aa fita hai si ilɛui, domi ajɔi Yizireɛliu, ajɔ nla nlai á jɛ.

³ I sɔ nyaanze nŋɛ ŋa Ammi, waatɔ zamaam ŋa, do Ruhama, waatɔ awɔ iyi à ce araareɛ.

Izirɛli, abo iyi kù jɛ dee dee

⁴ I yɛ taalei Izirɛli iye nŋɛ, domi kù jɛ abom má, nɔ amu mɔ n kù jɛ mɔkɔɛ. Ku nya nyindai icu ku taɛu hai si wajuɛ, nɔ ku nya sɛɛdai sakara ku ceɛu hai si amɔɛ ŋa.

⁵ Bii kù jɛ bɛɛbɛ, an bɔ jĩnɛɛ ŋai fei mam mam, nɔ n jɔ̀ɔ basĩ bɛi si ajɔ iyi à búu. An jɔ̀ ku yɛi bɛi gbaa. Á baa ku yɛi bɛi ilɛ iyi í gbɛ kù nɛ mandi. An jɔ̀ ku kui do agbɛ.

⁶ N kaa n ce araarei amaɛ ŋa, domi amai abo à ce sakara ŋai.

⁷ Iye nŋa nŋu iyi í bí ŋau, í ce sakara. Í dasi araɛ anyɔi si waati iyi í fɔ í ni, an too mɔkɔ kaafem ŋai, aŋa iyi à waa muum sɔnda do inyi. Aŋai à waa muum ikũ do acɔ, do ikpo do vɛ̃ɛ.

⁸ Na nŋu, amu Aɔ̃ Lafɛ̃ɛ, an cĩmbo kpãaɛi do agũ ŋa. An ce bindii n kaakoɛ ku ba ku maà yɛ kpãaɛ ŋau má.

⁹ Á maa lele fitii mɔkɔ kaafeɛ ŋaui, amma kaa ba ŋa. Á dɛdɛ ŋa, amma kaa yɛ ŋa. Si anyiɛ á fɔi ku ni, an sinda n nyi wa si mɔkɔ sintem nɔui, domi ǹ tako ǹ wa n gbɔ ididɔ̃ bɛ wo í re nsɛi.

¹⁰ Abou kù mà iyi amui ǹ ya n tako n maa n mua nŋu sɔnda wo, do vɛ̃ɛ do ikpo. Amui ǹ muaa fia do wura, nɔ í soo í cea iwɛ̃ iyi à ya kpe Baali amuaɛ.

¹¹ Na nŋu, bii waatii bilee ku mu í to, an naa n gba bileem nii, nɔ bii waatii isoi rezɛ̃ɛ ku fɔ̃ í to, an naa n gba vɛ̃ɛm nii. An naa n gba acɔ kusĩa ŋa iyi à waa bii basĩɛui.

¹² Bɛbɛi, an jɔ̀ ku gbe basĩi ku ba anyɔ ku muu si ijui mɔkɔ kaafeɛ ŋau, nɔ inɛ kãma kaa nyaa hai si awɔm.

¹³ An jɔ̀ inɔ didɔ̃ɛ fei ku leekĩi. Nɔ hai jingauɛ ŋa, do jingaui ajɔi cukpa titɔ̃ɛ ŋau, do ajɔi kusĩmiɛ ŋau hee do waati si bii à ya ko a ce jingau ŋau fei, aa leekĩi.

¹⁴ An ce nfei jĩi ndii rezɛ̃ɛɛ ŋa do ti figiɛ ŋau feii. Nŋu takaɛ í fɔ wa ni, isã iyi mɔkɔ kaafem ŋau à nam nii mbɛ. An jɔ̀ fei ndɛɛ ku baa ku jɛ fɔfɔi, nɔ mɛɛmui sako ŋa a ya maa jɔɔ.

¹⁵ An jɔ̀ ku yɛ ijuukpãi waati ŋa iyi í ya maa tɔɔ Baali ŋau. Baali ŋaui í ya maa cea amuai tuae, nɔ na iri nŋai í ya maa dasi lɛlɛawɔ ŋa do saba ŋa. Mɔkɔ kaafeɛ ŋai í ya maa too, nɔ í gbɛjɛ idem. Amu Aɔ̃ Lafɛ̃ɛi ǹ fɔ bɛɛbɛ.

¹⁶ Na nŋu, an faa wa bi titom nii, n gbã n bɔòɛ si gbaa ku ba n baaò laakaiɛ wa sim.

¹⁷ Nɔ hai tengi bɛ, an sindoa jĩi ndii rezɛ̃ɛɛ ŋa, nɔ n jɔ̀ lɔɔmai Akɔɔ ku baa ku jɛ bɛi andɛ koofai kpãa ku cɔ. Hai waati bɛɛbɛ, á maa toom nii bɛi si waatii mudɛ̃ɛɛ, bɛi si waatii kufitaɛ wa hai ilɛi Ezibiti.

Ajɔi njɛ ku gbɔa

¹⁸ Ŋɔi Aɔ̃ Lafɛ̃ɛ í ni, si ajɔ nŋu bɛ, awɔ Izirɛli, aa kpem nii i ni, mɔkɔm. I kaa kpem i ni, Baali lafɛ̃ɛm.

¹⁹ An nya irii iwɛ̃ ŋa iyi à ya kpe Baali ŋau hai si gɛlɛɛ, a kaa ya kpe iri nŋa má.

²⁰ Ajɔ nŋu bɛ, an dĩ akabuu na inɛm ŋa do mɛɛmui sako ŋa do yɛi ŋa do kokoo ŋa si ilɛ. An cɛ bioo do taakuba, nɔ n jɔ̀ igũ ku leekĩ. An jɔ̀ fei ndɛɛ ku kpa irii si ilɛu, nɔ an cei bɛi aa ya ce a yɔkɔ a maa sũi do laakai ku sũ.

²¹ Aɔ̃ Lafɛ̃ɛ í ni, an soɛi i jɛ abom hee do ajɔ fei. Mii iyi an sãaɛi í jɛ ntɔ do dee dee ku jɛ do kubi do araare.

²² Ntɔ ntɔ an soɛi i jɛ abom na kubi, nɔ do yaase bɛɛbɛi aa mà iyi amui ǹ jɛ Aɔ̃ Lafɛ̃ɛ.

²³ Ŋɔi Aɔ̃ Lafɛ̃ɛ í ni má, ajɔ nŋu bɛ bukaatai mii iyi lele í bi an naa. Nɔ lele mɔ á na ilɛ bukaatai mii iyi wa cɔ siɛ.

²⁴ Nɔ ilɛ mɔ á na bilee do vɛ̃ɛ do ikpo, mii iyi à waa cɔ siɛ. Nɔ aŋa fei aa na lɔɔmai Yizireɛli bukaatai mii iyi wa cɔ si ŋa.

²⁵ An fã dimi iyi á jɛ titom nii si ilɛu, nɔ an ce araarei Lo-Ruhama. An sɔ̃ Lo-Ammi n ni, awɔi ì jɛ zamaam. Nɔ nŋu mɔ á ni, Aɔ̃ Lafɛ̃ɛm.