Ozee 14 - Bibeli do fee

¹ Inɛi ilui Samari ŋa à nɛ a yɛ ijuukpãi kurara nŋai si na iyi í jɔ̀ à ce ide ku kɔ̀ bi Aɔ̃ Lafɛ̃ɛ nŋa. Na nŋu, igũi á naa si ŋa ku kpa ŋa. Aa tɛɛsɛ ama kpɔtɔɔ nŋa ŋai, nɔ a pũ inaabo bãasĩ nŋa ŋa.

Iri ku bai zamaa hai jɛ dee deeu

² Iŋɛ inɛi Izirɛli ŋa, i sinda i nyi wa bi Aɔ̃ Lafɛ̃ɛ nŋɛ, domi kurara nŋɛi í jɔ̀ ì koosɛ ì cuku ŋa.

³ Na nŋu, i sinda i nyi wa bi Aɔ̃ Lafɛ̃ɛ nɔ i sɔ̃ɔ ŋa i ni, ce nwa suurui kurara nwa ŋau fei, nɔ i gba wa do jiida ku jɛ. Idei gɛlɛ nwa ŋai aa jɛ kuwee iyi aa ka maa ceɛ.

⁴ Inɛi Asiri ŋa a kaa yɔkɔ a faaba wa. A kaa ka gũ acĩ ku ce igũ ŋa má, nɔ a kaa ka ni mii ŋa iyi à ce do awɔ nwa ŋau à jɛ Lafɛ̃ɛ nwa ŋa má, domi awɔi ì ya ce araarei kɔyɔ ŋa.

⁵ Aɔ̃ Lafɛ̃ɛ í ni, an jɔ̀ inɛi Izirɛli ŋa a ba iri hai si dee dee hai jɛ nŋa. An bi ŋai do inɔ akã, domi n kaa n maa n mu ŋa do idɔɔkɔ̃ má.

⁶ Amu an jɛi bɛi ikpã bi inɛi Izirɛli ŋa. Inɛi Izirɛli ŋau aa sĩai bɛi kokoi jĩi. Icã nŋa ŋau aa mi lɛlɛi bɛi ti jĩi ndii Libãa ŋau.

⁷ Amaawɔ nŋa ŋau aa nai, nɔ aa sĩai bɛi jĩi ndii olivi. Aa nɛ inunu jiidai bɛi inunui jĩi ndii inɔ agboi Libãa ŋau.

⁸ Inɛ ŋa iyi à ya maa buba si jĩjĩɛ ŋau, aa sinda a baai. Aa ya nyi a gbɛ̃ bilee ŋa má, nɔ kuwɛɛ nŋa á maa bɔ wajui bɛi jĩi ndii rezɛ̃ɛ. Iri nŋa á bɔ bii feii bɛi ti vɛ̃ɛi Libãa.

⁹ Efaraimu, anu akã yoomai í wa si gãmɛi amu do iwɛ̃ ŋa. Amui ǹ ya n jɛɛ si kutɔɔɛ, nɔ amui ǹ wa n wɔ njoo siɛ. Amui ǹ jɛ bɛi jĩi ndii sipɛrɛɛsi iyi í ya maa tũ waati kãma fei. Amui ǹ ya n jɔ̀ i ba amaajɛ ŋa i da.

¹⁰ Inɛ iyi í jɛ ilu laakai, lafɛ̃ɛi á gbɔ yaasei ide ŋa iyi à fɔu ihɛ̃ fei. Inɛ mɔ iyi í jɛ ilu bisi, á mà yaasei fei ndɛɛ. Ntɔ ntɔ, kpãai Aɔ̃ Lafɛ̃ɛ ŋau fei à tɛi. Inɛ dee dee ŋai aa ya maa nɛ si. Amma inɛ ŋa iyi a kù waa jirimaɛ ŋau, aa maa koosɛi.