Ozee 13 - Bibeli do fee

Ikui zamaa iyi wa ce ide ku kɔ̀ si wajui Ilaaɔ̃

¹ Waati iyi Efaraimu wa fɔ ide fei, zigii inɛ ŋa í ya dai, domi í nɛ gbugbã ntɔ ntɔ si Izirɛli. Amma í so taale si na iyi í jɔ̀ iwɛ̃ iyi à ya kpe Baaliu bɛi í ya tɔɔ, nɔ í ku.

² Nsɛi wee à waa mɔsi do dulum du ŋa ku ce má. À ya yɔ isɔ fũfũ ŋai a ceò iwɛ̃ ŋa. À ya ce iwɛ̃ ŋaui si bɛi aŋa taka nŋa à lasabu. Woo ce icɛi awɔ ŋai à ya ce fei ndɛɛ. À ya fɔi si gãmɛ nŋa a maa ni, inɛ ŋa à waa ce kuwee do amanɛ ŋa, nɔ à ya maa tɔɔ ama kɛtɛ kombo ŋa.

³ Na nŋu, aa yɛi bɛi kudũi ijĩi daakɔ walakɔ bɛi ikpã iyi í ya wɔ. Aa yɛi bɛi fɔfɔ iyi fufu í so wa nɛò walakɔ bɛi cua iyi wa fangaa.

⁴ Izirɛli, amui ǹ jɛ Aɔ̃ Lafɛ̃ɛɛ hai waati iyi ǹ nyaɛ wa hai ilɛi Ezibiti. I kù mà Ilaaɔ̃ mmuɛ kãma gɔ má bii kù jɛ amu. Nɔ woo faaba mmu gɔ kù wɛɛ má bii kù jɛ amu.

⁵ Amu ǹ màɛi waati iyi ì wa si gbaa, si ilɛ ngbɛ.

⁶ Amui ǹ gbã ǹ bɔòɛ tuu bii aa jɛ, nɔ ì ba ì jɛ hee ì yo. Amma waati iyi ì ba ì jɛ ì yo, ì baa ì nɛ faau, nɔ ì gbɛjɛm.

⁷ Nɔ bɛbɛi, amui ǹ baa ǹ jɛ bɛi muusu nla bi iŋɛ inɛi Izirɛli ŋa. Ǹ baa ǹ yɛi bɛi muãa iyi í wa si kpãa nɔ í tã sɔɔlu ku fo ku bata mɛɛmu.

⁸ An bata ŋɛi bɛi mbo iyi í kua amaɛ ŋa. An ga gɛndɛ nŋɛi. An ŋɔ ŋɛi bɛi muusu nla iyei ama í ya ce. Mɛɛmui sako ŋa aa gagaga ŋɛi.

⁹ Izirɛli, mii iyi wa ce nfeɛi í jɛ iyi i kù bim. I kù bi amu iyi an yɔkɔ n faabaɛ.

¹⁰ Hee iwoi ilaaluɛ í wa. Kú faabaɛ si iluɛ ŋau fei. Hee iwoi inɛ ngboɛ ŋau à wa. Na iri nŋai ì fɔ wo ì ni, nam ilaalu do inɛ ngbo ŋa.

¹¹ Nɔ ǹ naɛ ilaalu si idɔɔkɔ̃m, amma an nyaa si ilaalu ku jɛu mái si idɔɔkɔ̃m.

¹² Kurarai Efaraimu ŋau, ǹ gba ǹ jilɔɔi. Dulum dɛɛ ŋau wa singai.

¹³ Í yɛi bɛi ama iyi ara kuroi kubí í naa si iyeɛ. Amma amau í ce nnyɛi. Iyi waatii kubíɛ í na í to wa, í kɔ̀ ku fita wa hai inɔi iyeɛ.

¹⁴ Amu Aɔ̃ Lafɛ̃ɛ, an faaba inɛ ŋau hai si bi kuwai iku ŋa? An ya ŋa wa hai si iku? Iku, hee iwoi jĩnɛi igũɛ ŋa à wa. Iku, hee iwoi gbugbãɛ í wa. Araare ku ce kaa wɛɛm má.

¹⁵ Waati iyi kuwɛɛi Efaraimu wa bɔ waju si inɔi inɛɛ ŋa, fufu gɔi í naa siɛ. Fufuu í naai hai ikpa bi gbaau. Amu Aɔ̃ Lafɛ̃ɛi ǹ jɔ̀ fufuu í naa, nɔ inyii isɔ̃ ŋau fei à gbɛ. Lɔgɔ ŋa mɔ à gbɛ. Fufuu í ko amaniɛ ŋau fei í nɛò, nɔ í ko jĩnɛ ilu bɛɛrɛɛ ŋau mɔ fei í nɛò.