Ozee 12 - Bibeli do fee

Hai sintei zamaau í ya fɔ inɔi Ilaaɔ̃

¹ Ŋɔi Aɔ̃ Lafɛ̃ɛ í ni, zamaai Efaraimu í kaakom nii do muafiti, nɔ inɛi Izirɛli ŋa mɔ à biim nii do zamba. Inɛi Zudaa ŋai à waa nɛ do amu Ilaaɔ̃ amma aŋa mɔ a kù leekĩ dee dee, domi a kù fũsi iwɛ̃ ŋa awɔ.

² Inɛi Efaraimu ŋai à ya kooa inɛi Ezibiti ŋa ikpo, nɔ à dĩ akabuu do inɛi Asiri ŋa. À dĩ kpaasi do inɛ ŋa iyi a kù jɛ ngɔgɔ, nɔ à ya maa sɛii si fufu ajɔ fei. À ya dabii a maa sɔ iboi a maa ceò laalɔ ŋa.

³ Kiiti í wa si gãmɛi Aɔ̃ Lafɛ̃ɛ do inɛi Zudaa ŋa. Á sãa Zakɔbui si bɛi isɛɛnɛ laalɔɛ ŋau í to. Á ceai zaka bɛi kuceɛ ŋau í yɛ.

⁴ Hai si inɔi iyeɛ wa, í zamba igbãɛ, nɔ waati iyi í na í ce inɛ ngbo, í ko ibu do Ilaaɔ̃.

⁵ Í ko ibu do amaleka gɔ, nɔ í kãmiaɛ. Zakɔbu í kpata í tɔɔ a cea nŋu didɔ̃. Betɛlii Zakɔbu do Ilaaɔ̃ à ko. Nɔ tengi bɛi Ilaaɔ̃ í ba wa ide ku fɔ.

⁶ Lafɛ̃ɛi í jɛ Aɔ̃ Lafɛ̃ɛi lele do ilɛ, Aɔ̃ Lafɛ̃ɛi í jɛ iri iyi à ya kpoo do.

⁷ Ì nɛ i sinda i nyi wa bi Ilaaɔ̃ Lafɛ̃ɛɛi. Ce iyi í jɛ jiida, nɔ i jirima dee dee ku jɛ. Jɔ̀ kpãa ku cɔɛ ku wa si Aɔ̃ Lafɛ̃ɛɛ waati kãma fei.

⁸ Gũa ibo ŋai inɛi Kanaã ŋa à waa mu si awɔ. À ya bi inɛ ŋa ku zambai.

⁹ Efaraimu í ya nii, ntɔ ntɔ, ǹ baa ǹ jɛ ilu fia. Ǹ ba amani ntɔ ntɔ. Amma ǹ baai na saabui icɛi awɔm. Kù jɛ kurara gɔi ǹ ce ǹ bɛi ǹ baò fiau.

¹⁰ Amui ǹ jɛ Aɔ̃ Lafɛ̃ɛɛ hai waati iyi ì fita wa hai ilɛi Ezibiti. An jɔ̀ i na i wa si ilei acɔ ŋa má bɛi si waati iyi awaɛ ŋa à ko nɔ à ce jingauu.

¹¹ Ǹ ba walii ŋa ide ku fɔ, ǹ jɔ̀ à ce kuyɛ ŋa nkpɔ nkpɔ, nɔ do saabui walii ŋau, ǹ fɔ idei mɔnda ŋa.

¹² Inɛi Galaadi ŋa à ce laalɔ, nɔ nkãma kù gbe nŋa má. Bi ku ce kuweei Giligaliu, à ce kuwee do kɛtɛ kombo ŋa. Amma nsɛi, bi ku ce kuwee nŋa ŋau, kuta ŋai iyi à waa timbi si inɔ iko ŋa.

¹³ Zakɔbu í sa í nɛ ilɛi Aramu í koo wa cea inɛ gɔ icɛ ku ba ku ba abo. Mɛɛmu gaai í koo wa degbe ku ba ku ba abou.

¹⁴ Na saabui walii gɔi Aɔ̃ Lafɛ̃ɛ í nya inɛi Izirɛli ŋau wa hai ilɛi Ezibiti. Nɔ walii gɔi Ilaaɔ̃ í jɔ̀ wa degbe ŋa.

¹⁵ Inɛi Efaraimu ŋau à cea Ilaaɔ̃ taale iyi í gaabu siɛ ntɔ ntɔ. Aɔ̃ Lafɛ̃ɛ nŋa á jɔ̀ ijuukpãi laalɔ ku ce nŋau do arabu iyi à waa buu ku cuku si iri nŋa.