Ozee 11 - Bibeli do fee

Inɔ kufɔi Ilaaɔ̃ si gãmɛi kubii Izirɛli ama inɛmɔkɔɛ

¹ Waati iyi Izirɛli í wɛɛ awaasũ, ǹ nɛ kubiɛ. Nŋu iyi í jɛ amam, ǹ kpoo wai hai ilɛi Ezibiti.

² Amma si anyiɛ, inɛi Izirɛli ŋa à na à nɛ hee jĩijĩ. Nɔ bɛi à waa kpe ŋa fei, bɛɛbɛi à ya maa jĩò inɛ ŋa iyi à waa kpe ŋau. À ya maa cea iwɛ̃ ŋa iyi à ya kpe Baali ŋau kuwee nɔ à ya joa iwɛ̃ mmu ŋa tuae ŋa.

³ Amui ǹ mu awɔi Efaraimu ǹ kɔɔ si isɛɛnɛ wa. Amma kù mà mà amui ǹ wa n gbɔa nŋu.

⁴ Ǹ wa n gbãai do kurɔ, nɔ awaò à dĩ si njɛi do kubi. Ǹ yɛi bi titɛɛ bɛi inɛ iyi í nyaa si wahala. Amui ǹ naa sɔnda iyi á jɛ.

⁵ Inɛi Izirɛli ŋau a kaa sinda a nyi ilɛi Ezibiti má, amma inɛi Asiriui á jɛ ilaalu nŋa, domi à kɔ̀ ku sinda wa bi titom.

⁶ Igũi á naa si ilu nŋa ŋau nɔ ku ce nfei inya ku nɛ gbugbã nŋa ŋau. Igũu á ce nfei mii feii si na iyi í jɔ̀ Izirɛli í dasi idɔi laalɔ ŋa ku ce.

⁷ Zamaam nɔu wa leekĩi si dee dee hai jɛɛ si gãmɛm. À waa kpe ŋa a dede a leekĩ, amma kãma nŋa kù bi ku dede.

⁸ Do nŋu fei, Efaraimu, an yɔkɔ n fũsiɛ awɔ? Izirɛli, an yɔkɔ n soɛ n daa inɛ ŋa si awɔ? An yɔkɔ n ceɛ bɛi ǹ cea ilui Adima? N jɔ̀ i baa i yɛ bɛi ilui Seboimu? Ntɔ ntɔ, lasabum í fɔtɔtɔ, nɔ araareɛ iyi ǹ nɛ, í la ntɔ ntɔ.

⁹ N kaa n ceɛ bɛi idɔɔkɔ̃m í la í tou. N kaa n sinda n nyi wa n naa n ce nfei Efaraimu, domi n kù jɛ amanɛ. Ilaaɔ̃i ǹ jɛ, nɔ ǹ jɛ Inɛ Kumá. N kaa n sinda n nyi wa do idɔɔkɔ̃.

¹⁰ Aru ŋa iyi à mu à nɛò ŋau aa maa too Aɔ̃ Lafɛ̃ɛ wai nŋu iyi á maa dɔ̃ anu bɛi muusu nla. Anu ku dɔ̃ɛu á jɔ̀ ama inɛmɔkɔɛ ŋau a sɛi wai hai tenku do kuyaya.

¹¹ Nɔ aa baai hai ilɛi Ezibiti do kuyaya bɛi yɛi. Hai Asirii mɔ, aa baai bɛi ankasiidi. Nɔ ide nŋai an jɔ̀ a naa a buba. Ide iyi amu Aɔ̃ Lafɛ̃ɛ ǹ fɔ mbɛ.