Ozee 10 - Bibeli do fee

Kɔɔi iwɛ̃ ŋa ku tɔɔ do kɔɔi bomma

¹ Izirɛli í yɛi wo bɛi jĩi ndii rezɛ̃ɛ iyi í ya so jiida jiida. Do yaase bɛi í ya maa so nkpɔ nkpɔu bɛ, bɛɛbɛ mɔi bi kuweeɛ ŋau í kpɔ wa kɔ̃ɔsi. Do yaase bɛi ilɛɛu í sĩa wa koo, bɛɛbɛ mɔi í ya maa ce booda si kuta ŋa iyi í gũ à jɛ iwɛ̃ɛ ŋau.

² Inɛi Izirɛli ŋau a kù leekĩ do Ilaaɔ̃ nŋu akã. Amma bɛbɛi, aŋa mɔ aa ŋɔ gasaɛ. Aɔ̃ Lafɛ̃ɛ takaɛi á lɛgɛ bi kuwee nŋa ŋau, nɔ nŋui á kɛkɛ kuta nŋa ŋa iyi à gũu.

³ Nsɛi wee à waa ni, a kù nɛ ilaalu, domi a kù jirima Aɔ̃ Lafɛ̃ɛ. Nɔ mɔm nnyiu ihɛ̃ bɛbɛi, mii ilaalu gɔ á yɔkɔ ku ce nwa má.

⁴ Ŋɔi à wasi ide nkpɔ nkpɔ ku fɔ, à waa ceò kugbasi si ibo, à waa dĩ akabuu ŋa nɔ kiiti wa sinti wa si gãmɛ nŋa bɛi fɔfɔ laalɔ iyi í ya fita gbãa gbãa si fiii ilɛ ŋa.

⁵ Inɛi ilui Samari ŋa aa wɛɛò inɔ kufɔ na ama kɛtɛi Bɛti-Avɛni. Zamaaɛ ŋa do woo weeɛ ŋa, aa wɛɛò inɔ kufɔi ikui iwɛ̃ui. Aa maa yayai na iriɛ na bɛɛrɛɛ iyi wa nɛ ilɛ mmu hee jĩijĩ.

⁶ Ama kɛtɛu takaɛ, Asirii aa na ku jɛ amua iyi à cea ilaalu Yarɛbu. Anyɔi á jɛ ti Efaraimu, nɔ Izirɛli á wa si anyɔ na sɔɔlui mii ŋa iyi í ce.

⁷ Ti Samari do ilaaluɛ, mii fei í kpa iri mbɛ bɛi foko iyi í wa si antaii inyi.

⁸ Geetei bi ku ce kuweei Avɛni ŋa bii Izirɛli í ce dulum nɔu, aa lɛgɛ ŋai. Agũ dimi ikã ikã ŋai aa fita a la si agbɛi bi kuwee nŋa ŋau. Waati bɛɛbɛi aa sɔ̃ iri kuta ŋa a maa ni, i bii wa wa ŋa. Nɔ aa sɔ̃ geete ŋa a maa ni, i cuku si wa wa ŋa.

Izirɛli á da mii iyi í gbɛ̃

⁹ Inɛi Izirɛli ŋau à ce dulum nii hai waati iyi à wa Gibea, nɔ bɛɛbɛi à wɛɛ a kù jɛ ku kpaasi. Na ŋɔi í jɔ̀ igũ á naa si aŋa inɛ laalɔ ŋau Gibea bɛ.

¹⁰ Aɔ̃ Lafɛ̃ɛ í ni, an kpã ŋa ijui si bɛi ǹ dasi idɔ. Zamaa nkpɔ nkpɔ á tɔtɔɔ si ŋa wai nɔ a kpã ŋa iju na dulum iyi à ce à sisiu.

¹¹ Efaraimu í yɛi bɛi kɛtɛ zãu iyi à kɔsi icɛ iyi í ya bi yɔyɔi amaajɛ ku nya. Ǹ yɔɔ iyi kɔ̃ɔɛ í nɛ gbugbã ŋɔi ǹ dasi idɔ n jɔ̀ ku ce icɛ. Zudaa á maa fa ilɛi, nɔ Izirɛli ku maa teeseɛ wa do kaako ilu andɛ nkpɔ ŋau.

¹² I gbɛ̃a ara nŋɛ iyi í jɛ dee dee ŋa, nɔ i da zaka bɛi dee dee ku jɛ nŋɛu í to. I da iko titɔ̃ ŋa. Waati í to i dɛdɛ Aɔ̃ Lafɛ̃ɛ ŋa hee ku maa to waati iyi á baa nɔ ku jɔ̀ dee dee ku jɛɛ ku bii si ŋɛ.

¹³ Laalɔi ì gbɛ̃ ŋa, nɔ iyi kù jɛ dee deei aa da ŋa. Ribai zamba nŋɛi aa jɛ ŋa. Izirɛli, kpãai awɔ takaɛi ì dasi naanɛ, do si akpɔi woo ja igũɛ ŋa.

¹⁴ Na nŋu, wakata á dedei si inɔi inɛɛ ŋa, nɔ bindi ku nɛ gbugbãɛ ŋau fei, aa kɛkɛ ŋai. Aa kɛkɛ ŋai bɛi ilaalu Salumani í tako í kɛkɛ Bɛti-Aabɛli si igũ gɔ iyi à ce, si waati iyi à tɛɛsɛ iyei amu ŋa do ama nŋa ŋau ajɔu.

¹⁵ Iŋɛ inɛi Izirɛli ŋa, bɛɛbɛi aa ce nŋɛ, si na iyi í jɔ̀ laalɔ ku ce nŋɛ í caa Betɛli bɛ. Hai inunu í là gbakã, kɔɔi kuwɛɛi ilaalui Izirɛli mɔ mbɛ.