Ozee 1 - Bibeli do fee

¹ Aɔ̃ Lafɛ̃ɛ í ba Ozee amai Beeri ide ku fɔ si waati iyi Zeroboamu amai Zoasi wa jɛ ilaalui Izirɛli. Í baa ide ŋau ku fɔi si waatii Oziasi do Yotamu do Ahazi do Ezekiasi ilaalui Zudaa ŋau.

Nyaanzei waliiu

² Ide sinte ŋa iyi Aɔ̃ Lafɛ̃ɛ í sɔ̃ Ozee í ni ku sɔ̃ zamaai nŋu ŋau wee. Aɔ̃ Lafɛ̃ɛ í sɔ̃ Ozee í ni, koo so inaabo à ce sakara, nɔ abou ku bíɛ amu ŋa iyi aa jɛ amai abo à ce sakara, domi inɛi Izirɛli ŋau à ya dabii a maa tɔɔ iwɛ̃ ŋai bɛi inaabo à ce sakara í ya maa dabii si inɛmɔkɔ ŋa, nɔ à fũsi Aɔ̃ Lafɛ̃ɛ awɔ.

³ Ŋɔi Ozee í koo í so abo gɔ iyi à ya kpe Gomɛɛ ama inaaboi Dibulaimu. Abou í na í nɛ asĩ nɔ í bíaa ama inɛmɔkɔ.

⁴ Ŋɔi Aɔ̃ Lafɛ̃ɛ í sɔ̃ɔ í ni, sɔ amau Yizireɛli, domi waati kù gbe kù waa sɔ̀ má si bii an sãa kpasɛ̃i Yehu mii iyi í ce, si na iyi í jɔ̀ í dikã njɛ ilui Yizireɛli. An jɔ̀ gbugbãi bommai Izirɛliu ku kpa irii.

⁵ Si waati nŋu bɛi an cɛ biooi Izirɛli si lɔɔmai Yizireɛli.

⁶ Si anyiɛ, abou í na í nɛ asĩ má, nɔ í bí ama inaabo. Nɔ Aɔ̃ Lafɛ̃ɛ í sɔ̃ɔ má í ni, sɔɔ Lo-Ruhama, waatɔ inɛ iyi a kaa ce araareɛ, domi n kaa n maa n mɔsi do araarei Izirɛli ku ce má n maa n ceaa suuru waati kãma fei.

⁷ Amma an ce araarei inɛi Zudaa ŋa. Amu Aɔ̃ Lafɛ̃ɛ nŋa, an faaba ŋa, nɔ n kaa n nɛ baa bukaatai bioo ku loo do taakuba ku loo, walakɔ do igũ, do acĩ ŋa, walakɔ woo gũ acĩ ŋa.

⁸ Ŋɔi Gomɛɛ í da Lo-Ruhama amɔ, si anyiɛ nɔ í nɛ asĩ mmuɛ má, nɔ í bí ama inɛmɔkɔ.

⁹ Nɔ Aɔ̃ Lafɛ̃ɛ í sɔ̃ Ozee í ni, sɔɔ Lo-Ammi, waatɔ kù jɛ zamaam, domi iŋɛ inɛi Izirɛli ŋau i kù jɛ zamaam má ŋa, nɔ amu mɔ n kù jɛ nkãma bi tu ŋɛ má.