Neemi 9 - Bibeli do fee

Bukii tuubai dulum ku ce si zamaa

¹ Si ajɔ kɔnfia do mɛɛsiai cukpa akãu bɛ, inɛi Izirɛli ŋa à tɔtɔɔ ku ba a ce anu ku dĩ. À dasi jĩnɛi inɔ kufɔ ŋa nɔ à kosi iri nŋa sãa.

² Nɔ inɛ ŋa iyi à jɛ dimii inɛi Izirɛli ŋau fei à nya ara nŋa wa hai si inɔi isɛ mmu ŋau fei, nɔ à naa tuubai dulum du ŋa ŋa ku ce do ti bala nŋa ŋa.

³ Ŋɔi à dede à leekĩ nɔ à cio nŋa si tiai woodai Aɔ̃ Lafɛ̃ɛ nŋa zakai isɔ mɛɛta. Nɔ si isɔ mɛɛta mmuɛ má à gulɛ à ce tuubai dulum du ŋa si wajui Aɔ̃ Lafɛ̃ɛ nŋa.

⁴ Ŋɔi Zozue do Bani do Kadimiɛli do Sebania do Buni do Serebia do Bani do Kenani aŋa inɛi Levii ŋau à gũ antaii jĩi ŋa iyi à gũu nɔ à tɔɔ Aɔ̃ Lafɛ̃ɛ nŋa do anu ku dɔ̃ hee lele.

⁵ Si anyiɛ inɛi Levii gɔ ŋa mɔ à saabu Ilaaɔ̃. Aŋa iyi à saabu Ilaaɔ̃ ŋau wee. Zozue do Kadimiɛli do Bani do Hasabunia do Serebia do Hodiya do Sebania do Petaya. Aŋai à sɔ̃ zamaa à ni a dede a saabu Aɔ̃ Lafɛ̃ɛ nŋau hai nnyi hee do ajɔ fei. Nɔ à ni, Aɔ̃ Lafɛ̃ɛ, jɔ̀ inɛ fei ku saabuɛ, awɔ iyi í nɛ amboe nla nla. Amboeɛu í kpeeò ku fɔ do gɛlɛ.

Kutɔɔ

⁶ Aɔ̃ Lafɛ̃ɛ, awɔ akãi ì jɛ Lafɛ̃ɛ. Awɔi ì ce lele do mii ŋa iyi à wa si fei. Awɔi ì ce ilɛ do mii ŋa iyi à wa si fei. Awɔi ì ce tenku ŋa do mii ŋa iyi à wa inɔ nŋa fei. Awɔi ì waa mua mii ŋau bɛ fei kuwɛɛ. Nɔ si wajuɛi gbugbãi lele ŋau fei à waa gulɛ.

⁷ Aɔ̃ Lafɛ̃ɛ, awɔi ì cica Aburamu, nɔ ì nyaa wa hai Uu si ilɛi Kaladee, nɔ ì sɔɔ Aburahamu.

⁸ Nɔ ì yɔɔ iyi í jɛ ilu naanɛ, ŋɔi iŋɛò ì dĩ akabuu, ì cea kuwã iyi aa na tɔkuɛ ŋa ilɛi inɛi Kanaã ŋa do ti inɛi Hɛti ŋa do ti inɛi Amɔre ŋa do ti inɛi Ferɛzi ŋa do ti inɛi Zebusi ŋa do ti inɛi Girigasi ŋa ku jɛ tu ŋa. Ì nɔ ì coo, domi ì jɛ dee dee.

^9-10 Waati iyi bala nwa ŋau à wa ilɛi Ezibiti ì yɛ wahala nŋa. Ì yɛ dimii inɔ kukã iyi inɛi Ezibiti ŋa à ce nŋa wo, nɔ ì nyisi ilaalu Faraɔ̃ do woo ce icɛɛ ŋa fei do inɛi ilɛɛ ŋau fei maamaake do nyinda ŋa. Nɔ ì nyisi amboeɛ hai waati bɛɛbɛ hee do nnyi fei. Nɔ waati iyi bala nwa ŋau à to bi Tenkui Njeeu ì gbɔ anu ku dɔ̃ nŋa.

¹¹ Ì jɔ̀ inyii tenkuu í kpɛ̃ si waju nŋa nɔ à nɛ si ilɛ ngbɛ à kua. Amma inɛi Ezibiti ŋa iyi à waa lele ŋa wau, ì jɔ̀ inyiu í jɛ ŋa. Nɔ à mile hee lɛlɛ bɛi kuta.

¹² Dasã ì ya maa gbã ŋai do kudũi ijĩ, idũ mɔ ì ya jɔ̀ ina nla nla ku maa má nŋa inyai si kpãa.

¹³ Ì kita wa si antaii iri kutai Sinai hai lelei Aɔ̃ nɔ ì ba ŋa ide ku fɔ. Ì na ŋa wooda dee dee ŋa do ikɔ ŋa iyi à jɛ ntɔ, nɔ ì jilɛ nŋa ide jiida ŋa.

¹⁴ Ì jɔ̀ Moizi woo ce icɛɛ í na ŋa ajɔi kusĩmi iyi à nya ikã na iriɛ, nɔ ì jɔ̀ í kɔ ŋa si wooda mmu ŋa iyi à gbe.

¹⁵ Waati iyi ari wa kpa ŋa, ì mu nŋa sɔnda wa hai lelei Aɔ̃, nɔ ì jɔ̀ inyi í fita wa hai si kuta waati iyi agbɛ wa kpa ŋa. Nɔ ì sɔ̃ ŋa ì ni a koo a gba ilɛ iyi ì ce nŋa kuwãɛ do kugbasiu.

¹⁶ Amma bala nwa ŋau à na ara nŋa si faau do ide hai jɛ. Nɔ a kù jirima woodaɛ ŋa.

¹⁷ À kɔ̀ ku jirimaɛ nɔ à gbɛjɛ maamaake ŋa iyi ì ce na iri nŋa. Ŋɔi à so ide ku kɔ̀ nɔ si ide hai jɛ nŋau à cicaa ara nŋa inɛ ngbo ku ba a nyi si icɛi aru nŋa. Amma do nŋu fei, i kù fũsi ŋa awɔ domi ì ya cea inɛ suuru, ì jɛ ilu inɔ akã, nɔ ì nɛ araare. Idɔɛ ci ya kɔ̃ gbãa gbãa nɔ jiida ku jɛɛ kù nɛ kɔɔ.

¹⁸ Waati iyi à yɔ isɔ à ceò ama kɛtɛ, à wasi ku saabuɛ à waa ni, Ilaaɔ̃ Lafɛ̃ɛ nwa iyi í nya wa hai ilɛi Ezibitiui ihɛ̃. Do yaase bɛɛbɛi à donda awɔ Aɔ̃ Lafɛ̃ɛ.

¹⁹ Do nŋu fei, na saabui araare nlaɛ i kù fũsi ŋa awɔ si gbaau bɛ. Kudũi ijĩ iyi í ya maa gbã ŋa dasã, do ina nla gɔ iyi í ya maa má nŋa inya si kpãa idũu, kãma nŋa kù tekĩ hai bi tu ŋa.

²⁰ Ì mu nŋa laakai jiida ku ba a jɛ ilu bisi ŋa. Waati kãma fei, ì ya mu nŋa sɔnda iyi à ya kpe mana a jɛ, nɔ ì ya mu nŋa inyi a mɔ.

²¹ Awɔi ì na ŋa bukaatai mii iyi à nɛ fei adɔ̃ ciiji si gbaau. Nkãma kù gaizia ŋa, jĩnɛ nŋa ŋa a kù gbo, nɔ kutɛ nŋa ŋa a kù wu.

²² Si anyiɛ ì so bomma gɔ ŋa do dimi gɔ ŋa ì da nŋa si awɔ, nɔ ì kpɛ̃ nŋa ilɛ nŋa ŋau. Nɔ à gba ilɛi Sioni ilaalui Hɛsebɔ̃ɔ, do ilɛi Ɔgu ilaalui Basãa.

²³ Ì jɔ̀ ama nŋa ŋa à bí nɔ à kpɔ bɛi leleaɔ̃ ŋa, nɔ ì jɔ̀ à lɔ si ilɛ iyi ì cea bala nŋa ŋa kuwãɛu.

²⁴ Ntɔ ntɔ à lɔ si ilɛu nɔ ì so inɛi Kanaã ŋa ì da nŋa si awɔ ì jɔ̀ à kãmia ŋa à gba ilɛ nŋau. Nɔ ì jɔ̀ à cea inɛi ilɛ ŋau do ilaalu nŋa ŋa bɛi à bi.

²⁵ Aŋai à baa à jɛ inɛ ngboi ilu ku nɛ gbugbã ŋau do ilɛ ku nɛ taasi ŋa. Aŋai à gba kpasɛ̃ ŋa iyi à kɔ̃ do mii jiida dimi ikã ikã fei do lɔgɔ ŋa do jĩi ndii rezɛ̃ɛ ŋa do ti olivi ŋa do jĩi ku so ŋa bututu. Ŋɔi à jɛ, à yo, à ce ikpo, nɔ à waa wɛɛ nŋa si inɔ didɔ̃ do saabui jiida nla ku jɛɛ.

²⁶ Do nŋu fei a kù jirimaɛ, à na à dedeò ide ku kɔ̀ siɛ. À nyɔ woodaɛ do anyi nŋa. À kpa waliiɛ ŋa iyi à waa mante ŋa a baa wa bi tɛɛ. Nɔ à waa ce daa ŋa iyi kù sĩa.

²⁷ Ŋɔi ì jɔ̀ ŋa si awɔi mbɛɛ nŋa ŋa a kpã ŋa iju. Amma waati iyi à wa si wahala, à dɔ̃ siɛ anu, nɔ ì gbɔ anu ku dɔ̃ nŋau wa hai lelei Aɔ̃, nɔ si araare nla nlaɛ, ì bɛ nŋa woo faaba ŋa wa à naa à nya ŋa hai si awɔi mbɛɛ nŋa ŋau.

²⁸ Amma hai waati iyi à ba laakai ku sũ gbakã, à lɔsi laalɔ ku ce si wajuɛ mái. Nɔ ì sinda ì to nŋa anyi, ì so ŋa ì daa mbɛɛ nŋa ŋau si awɔ. Amma à nyi à dɔ̃ siɛ anu má. Nɔ ì nyi ì gbɔ anu ku dɔ̃ nŋau má hai lelei Aɔ̃ wa, nɔ si araare nla nlaɛ, ì faaba ŋa fii nkpɔ nkpɔ.

²⁹ Si anyiɛ ì sɔ̃ ŋa ì ni a jirima woodaɛu. Amma à so ara nŋa lele à waa koo a kù gbɔ ideɛ. À kua woodaɛ baa do iyi woodaɛui í ya mua inɛ iyi wa jirimaɛ kuwɛɛ. À nyisi iyi aŋa à jɛ hai gbɔ ide ŋa nɔ à kɔ̀ ku jirimaɛ.

³⁰ Do nŋu fei ì temuaò ŋa adɔ̃ nkpɔ nkpɔ. Ì jɔ̀ hundeɛ í naa si waliiɛ ŋa ku ba a sɔ̃ ŋa a ce laakai. Amma a kù de si ŋa itĩ. Ŋɔi ì so ŋa ì daa dimi mmu ŋa si awɔ.

³¹ Amma si araare nla nlaɛ, i kù kpa ŋa, nɔ i kù kɔ̀si ŋa, domi awɔ Aɔ̃ Lafɛ̃ɛ ì jɛ ilu araare nɔ ì cea inɛɛ ŋa jiida.

³² Awɔ Aɔ̃ Lafɛ̃ɛ nwa, ì la nɔ ì nɛ gbugbã do amboe. Akabuu iyi ì dĩ do awau ì waa muu, nɔ ì nɛ araare nwa. Hai waatii ilaalui Asiri ŋau wa hee ku baa nnyi à wa si wahala awa do ilaalu nwa ŋa do inɛ ngbo nwa ŋa do woo wee nwa ŋa do walii nwa ŋa do bala nwa ŋa do zamaaɛ fei. Aɔ̃ Lafɛ̃ɛ, maà cɔ wahala nwa ŋau bɛi mii keeke.

³³ Si mii iyi í ba wa fei awɔi ì jɛ dee dee nɔ ì jɛ ilu naanɛ, amma awai à ce mii iyi kù sĩa.

³⁴ Ilaalu nwa ŋa do inɛ ngbo nwa ŋa do woo wee nwa ŋa do bala nwa ŋa à fũsi woodaɛ awɔ, nɔ a kù desi ideɛ ŋa itĩ hee má jɛ ikɔ ŋa iyi ì waa sɔ̃ ŋa.

³⁵ Waati iyi à waa jɛ inɛ ngboi mii jiida nkpɔ nkpɔ ŋa iyi ì ce nŋa si ilɛ nla nla ku nɛ taasi iyi ì da nŋa si awɔu, a kù gulɛ a kù tɔɔɛ nɔ à kɔ̀ ku jɔ̀ daa laalɔ nŋa ŋau.

³⁶ Nnyi awa wee à jɛ aru. Awa wee à jɛ aru ŋa si ilɛ iyi ì mua bala nwa ŋa a jɛ baakaɛ do inɔ didɔ̃u.

³⁷ Ilɛu wa ce amaajɛ ŋa nkpɔ nkpɔ ti ilaalu ŋa iyi ì jɔ̀ à waa jɛ aru nŋa na dulum du wa ŋau. À waa nɛò wa bɛi à bi, do mɛɛmu nwa ŋa. Nɔ à wɛɛò inɔ kufɔ nla nla.