Neemi 8 - Bibeli do fee

Ɛsidarasi wa kaa zamaau wooda

^1-2 Si ajɔ sintei cukpa mɛɛjesiau inɛi Izirɛli ŋa à ce anu akã à tɔtɔɔ Zeruzalɛmu si bantuma iyi í wa wajui anu koofa iyi à ya kpe anu koofai inyiu. Aŋa fei à tɔtɔɔ bɛi hai inɛmɔkɔ ŋa do inaabo ŋa hee do inɛ ŋa iyi aa yɔkɔ a gbɔ ideu fei. Ŋɔi à sɔ̃ Ɛsidarasi woo kɔ inɛ ŋa si woodau ku naaò tia si bii à kɔ wooda iyi Aɔ̃ Lafɛ̃ɛ í na Moizi na irii aŋa inɛi Izirɛli ŋau wa. Ŋɔi Ɛsidarasi woo weeu í naaò tiai woodau wa si wajui zamaau fei.

³ Ŋɔi wa cio tiau hai daakɔ hee dasã í kpã í baa bɛ si bantumai anu koofai inyiu, nɔ zamaau fei í sotĩ wa gbɔ bɛi wa ka tiai woodau.

⁴ Do yaase bɛi Ɛsidarasi í cioò tiau wee. Inɛ ŋa à gũ jĩi gɔi, nɔ í gũ antaiɛ í leekĩ si. Inɛ gɔ ŋa à waa leekĩ kɔkɔɛ. Matitia do Sema do Anaya do Uri do Hilikiya do Maaseya, aŋai à wa do ikpa awɔ njɛɛ. Inɛ ŋa mɔ iyi à wa do ikpa awɔ cangaɛ wee. Pedaya do Misaɛli do Malikiya do Hasumu do Hasibadana do Zakari do Mɛsulamu.

⁵ Waati iyi Ɛsidarasi í cĩ tiau zamaau fei wa yɔɔi, domi lelei í wa do waju nŋa, nɔ aŋa fei à dede à leekĩ.

⁶ Ŋɔi Ɛsidarasi í saabu Aɔ̃ Lafɛ̃ɛ, nŋu iyi í la. Nɔ zamaau fei í wu awɔ lele, à jɛa à ni, ami, ami. Nɔ à gulɛ à sɛɛbata ilɛ à tɔɔ Aɔ̃ Lafɛ̃ɛ.

⁷ Si anyiɛ ŋɔi inɛ fei í leekĩ agbɛɛ, nɔ inɛi Levii gɔ ŋa à sisia zamaau yaasei woodau. Irii inɛi Levii ŋau wee. Zozue do Bani do Serebia do Yaminu do Akubu do Sabetai do Hodiya do Maaseya do Kelita do Azaria do Yozabadi do Hanaa do Pelaya.

⁸ Inɛi Levii ŋau à ya cio tiai woodai Ilaaɔ̃ui sãa sãa, nɔ a maa sisia zamaau yaaseɛ ku ba a mà iyi à ciou.

⁹ Waati iyi zamaau wa gbɔ idei woodau, aŋa fei à wasi ku kpatai. Amma Neemi ilu ilɛu do Ɛsidarasi iyi í jɛ woo wee do woo kɔ inɛ ŋa si woodau do inɛi Levii ŋa iyi à sisia zamaau yaasei woodau à sɔ̃ ŋa à ni, i maà jɔ̀ inɔ nŋɛ ku fɔ i maa kpata ŋa. Ajɔi nnyiu ihɛ̃, ajɔi inɔ didɔ̃i iyi à nya ikã kú jɛ ti Aɔ̃ Lafɛ̃ɛ nŋɛ.

¹⁰ Ŋɔi Ɛsidarasi í sɔ̃ ŋa má í ni, i koo i ŋɔ iŋa ŋa iyi à nɛ ikpo, nɔ i mɔ atɛ̃ nyikɔ̃ ŋa. Nɔ i ya buãa inɛ ŋa iyi a kù se ngɔgɔ ŋa, domi ajɔi nnyi ti Lafɛ̃ɛ nwai. I maà jɔ̀ inɔ nŋɛ ku fɔ ŋa domi inɔ didɔ̃ iyi Aɔ̃ Lafɛ̃ɛ á mu nŋɛi á jɛ gbugbã nŋɛ.

¹¹ Do yaase bɛɛbɛi inɛi Levii ŋau à ya maa tɛò zamaau a maa ni, i coko ŋa, domi ajɔu ihɛ̃ í nya ikã. I maà jɔ̀ i wɛɛò inɔ kufɔ ŋa.

¹² Ŋɔi zamaau í sinda í nyi ide à bɔ ku jɛ do ku mɔ, nɔ à bu à sambaa kpaasi nŋa ŋa iyi a kù se ngɔgɔu. Ŋɔi aŋa fei à kpɛ̃ inɔ didɔ̃ nla nlau ajɔ, domi à gbɔ ide ŋa iyi à sɔ̃ ŋau do yaase.

Jingaui Kusu ŋa ku jɛ

¹³ Si ajɔ minjisiai cukpau ŋɔi inɛ ŋa iyi à jɛ ilu kpasɛ̃ ŋa si zamaau fei, hai woo wee ŋa do inɛi Levii ŋa à naa à tɔtɔɔ bi Ɛsidarasi woo kɔ inɛ ŋa si woodau ku ba a gbɔ yaasei idei wooda ŋau ku jĩisa.

¹⁴ Ŋɔi à wusɛ wooda iyi Aɔ̃ Lafɛ̃ɛ í ni Moizi ku kɔu nɔ à to tengi bii à kɔ idei jingaui Kusu ŋau ku jɛ. Afe bii à ciou í ni inɛi Izirɛli ŋau aa ya jɛ jingauui si cukpa mɛɛjesiau nɔ inɛ fei kú ya maa wa inɔ kusuɛ.

¹⁵ Nɔ hee ajɔi jingauu ku maa to aa ya cã kɛsɛɛdɛi si ilu nŋa ŋau fei do si Zeruzalɛmu a ni, i bɔ si antaii iri kuta ŋau ŋa, i koo i dɛdɛ amaawɔi jĩi ndii olivi ŋa wa do ti olivii sako ŋa do ti miitu ŋa do ti kpakpa ŋa do ti jĩi ŋa iyi à nɛ amaawɔ í kpɔ, ku ba i na i ceò kusu ŋa si bɛi à kɔɔ.

¹⁶ Ŋɔi zamaau í koo í dɛ amaawɔi jĩi ŋau wa, nɔ à na à ce kusu ŋau. Inɛ gɔ ŋa à cooi si antaii ile sikifa nŋa ŋa, inɛ gɔ ŋa mɔ si kpasɛ̃ nŋa ŋa, inɛ gɔ ŋa mɔ si bantumai kpasɛ̃i Ilaaɔ̃u, do si bantumai anu koofa iyi à ya kpe anu koofai inyi ŋau do si bantumai anu koofai Efaraimuu.

¹⁷ Ŋɔi inɛ ŋa iyi à baa hai bii à waa jɛ aruu fei à ce kusu ŋau, nɔ à wa si inɔ nŋa. Hai waatii Zozue amai Nunuu, inɛi Izirɛli ŋau a kù ce jingau dimi bɛɛbɛ má. Nɔ à wɛɛò inɔ didɔ̃ nla nla.

¹⁸ Ŋɔi à ya maa cio si tiai woodai Ilaaɔ̃u ajɔ fei, hai ajɔ sinteu hee ku bɔ si ajɔi ankãanyiu. À jɛ jingaui ajɔ mɛɛje, nɔ si ajɔ mɛɛjɔsia, à tɔtɔɔ inɛ ŋa si bɛi à ni si woodau.