Neemi 6 - Bibeli do fee

Kunyii mbɛɛ ŋau wa má

¹ Sanbala do Tobiya do Gesɛmu inɛi ilɛi Arabi do mbɛɛ nwa ŋa iyi à gbe ŋau à gbɔ iyi ǹ ma bindiu ǹ tã nɔ foo kù gbe bii kãma má. Gamboi anu koofa ŋau ku dasi nŋu akãi í gbe.

² Ŋɔi Sanbala do Gesɛmu à bɛ ama wa à ni ku naa ku sɔ̃m n naa wa awaò ŋa ka busi njɛ ajɔ si ilu iyi à ya kpe Kefirimu iyi í wa si lɔɔmai Ono. Wee inɛ ŋau à dasi idɔ aŋa a ceem laalɔi.

³ Ŋɔi ǹ bɛ si ŋa inɛ ŋa a koo a jɛ nŋa a ni ǹ nɛ icɛ nla nla iyi an ce. Na nŋu n kaa n ba n naa, domi icɛu á leekĩi bii ǹ jɔ̀ɔ n naa bi tu ŋa.

⁴ Nɔ à kpem do ide akãu isɛ gbɛ̃ɛ. Nɔ ide akãui ǹ ya n jɛ nŋa.

⁵ Isɛ gbɛɛwusiau ŋɔi Sanbala í bɛ woo ce icɛɛ gɔ wa do tia si awɔ. Tiau a kù dĩ andɛɛ.

⁶ Í kɔ si í ni, ide gɔ wa fangaa si ilɛ ŋau fei nɔ Gesɛmu í ni ntɔi awɔ do Zuifu ŋa ì waa bi i kɔ̀ ide ŋa, nɔ na nŋu mɔm nii í jɔ̀ ì waa ma bindiu. Nɔ à ni ì waa bi i jɛ ilaalu nŋa.

⁷ Nɔ mɔm ì jilɛ walii ŋa iyi aa ni ì jɛ bommau Zeruzalɛmu si ilɛi Zudaa. Nɔ mii ŋau bɛ fei ilaaluu á na ku gbɔɔ kaa kpɛ. Debɛi nɛ wa ka gbɔsi njɛ ajɔ.

⁸ Ŋɔi ǹ ni a koo a sɔ̃ɔ ide iyi í fɔu bɛ kù wɛɛ. Nŋui í fɔ ndɛɛ.

⁹ Inɛ ŋau bɛ fei à waa bi a da zigi nwai ku ba ka mɔngɔ temua nɔ icɛu ku leekĩ. Bɛbɛi Lafɛ̃ɛm, kɔ̃ɔm si gbugbã.

Walii ilu ibo gɔ wa bi ku da zigii Neemi

¹⁰ Ŋɔi ǹ bɔ bi Semaya amai Delaya iyi wa jɛ tɔkui Mehetabeɛli. Í cĩmbo si araɛ nɔ í ni, ka bɔ inɔ kpasɛ̃i Ilaaɔ̃u awaɛ ajɔ kaa manji bɛ. Nɔ ka cĩmbo si ara nwa domi mbɛɛɛ ŋau à waa dɛ ku kpaɛ, nɔ idũuyi aa naa.

¹¹ Ŋɔi ǹ jɛa ǹ ni, n kù jɛ inɛmɔkɔ iyi á sa. Nɔ mɔm inɛ bɛi amu yoomai á yɔkɔ ku lɔ inɔ ile kumáu bɛ nɔ ku wɛɛ má. N kaa n lɔ bɛ pai.

¹² Ŋɔi ǹ mà iyi kù jɛ Ilaaɔ̃i í bɔɔ wa. Amma í ce waliiɛ sim nii, si na iyi í jɔ̀ Sanbala do Tobiya ŋa à naa fia.

¹³ Nɔ à tamaa bɛi do kpãau bɛ an ce njo nɔ n too si ikɔɛ ŋai n koo n ceò dulum. Nɔ a ba a bɛɛgɛ si bɛ a bɛjɛò irim a dasim anyɔ.

¹⁴ Ilaaɔ̃ Lafɛ̃ɛm, jɔ̀ i ye gigii mii iyi Tobiya do Sanbala à ce. Jɔ̀ i ye gigii Noadia abo waliiu mɔ do walii ŋa iyi à gbe, aŋa iyi à waa dɛ a da zigim.

Anyɔ í mu mbɛɛ ŋau

¹⁵ À kpa irii bindiu si ajɔ kaafɛtũsiai cukpai Eluli si afei ajɔ ciitaa do minji.

¹⁶ Iyi mbɛɛ nwa ŋau fei do inɛi ilɛ ŋa iyi à wa kɔkɔ nwa ŋau à gbɔ, ŋɔi zigii aŋa fei í da nɔ anyɔ í mu ŋa ntɔ ntɔ. Waati bɛɛbɛi à mà iyi Aɔ̃ Lafɛ̃ɛi í jɔ̀ icɛu í ce.

¹⁷ Si waati iyi à waa ma bindiu, inɛ ngboi ilɛi Zudaa gɔ ŋa do Tobiya à ya maa cea njɛ tiai waati kãma fei,

¹⁸ domi Zuifu nkpɔi aŋaò ŋa à dĩ akabuu do kugbasi. À ce bɛɛbɛi si na iyi í jɔ̀ Tobiya í so ama inaaboi Sekania amai Araa í ce abo, nɔ Yohanaa ama inɛmɔkɔɛ mɔ í so ama inaaboi Mɛsulamu amai Berekia í ce abo.

¹⁹ Nɔ à ya fɔ jiidaɛ mɔm si wajum, nɔ à ya koo a sisia idem ŋa. Tobiya takaɛ mɔ í ya sambaam tia ŋa wa ku ba njo ku mum.