Neemi 5 - Bibeli do fee

Neemi í ganji takii

¹ Ŋɔi si inɔi zamaau inɛmɔkɔ gɔ ŋa do inaabo gɔ ŋa à dedeò taalei Zuifu kpaasi nŋa ŋau ku yɛ gbãna gbãna.

² Inɛ gɔ ŋa à waa ni, awa do ama inɛmɔkɔ nwa ŋa do ama inaabo nwa ŋa à kpɔ. Awa à bi a na wa bilee iyi aa ka jɛ ka maa wɛɛò.

³ Nɔ inɛ mmu gɔ ŋa mɔ à ni, si ari iyi wa ceu ihɛ̃, iko nwa ŋa do jĩi ndii rezɛ̃ɛ nwa ŋa do kpasɛ̃ nwa ŋai à tɔɔma à bɛi à ba bilee.

⁴ Inɛ mmu gɔ ŋa mɔ à waa ni, à wɛ̃ fia ŋai si iko nwa ŋa do si jĩi ndii rezɛ̃ɛ nwa ŋa ku ba ka sã fiai adɔ̃i ilaalu.

⁵ Baa do iyi awaò inɛ nwa ŋa dimi akãi à jɛ, nɔ ama nwa ŋa a kù jɛ ikã do ti aŋa mɔ, do nŋu fei à tilasi wa ka ta nŋa ama nwa ŋau. Wee ama inaabo nwa ŋau nkpɔ nŋa í jɛ aru tã, nɔ a kaa ka yɔkɔ ka ce nkãma si na iyi í jɔ̀ andi iko nwa ŋa do jĩi ndii rezɛ̃ɛ nwa ŋau à jɛ ti ngu ŋa tã.

⁶ Ŋɔi idɔm í kɔ̃ ntɔ ntɔ iyi ǹ gbɔ ide ŋau do kugbagba ŋau.

⁷ Nɔ ǹ dasi idɔ n ba inɛ ngbo ŋa do woo ce kiiti ŋau ide ku fɔ n bee ŋa na mii í ce à ya maa wɛ̃a inɛ nŋa ŋa fia a maa dɛò riba si ŋa. Na nŋu ǹ jɔ̀ zamaa nla nla í tɔtɔɔ na iri nŋa,

⁸ nɔ ǹ sɔ̃ ŋa ǹ ni, à ce kookaai baa yooma fei à ya Zuifu inɛ nwa ŋa iyi à taa inɛ mmu ŋa à jɛ aruu. Nɔ nsɛi iŋɛ taka nŋɛi ì sinda ì waa ta njɛ iŋɛ duusɔ̃ɔ. Ŋɔi à coko a kù ba iyi à dɔ̃.

⁹ Nɔ ǹ ni má, mii iyi ì waa ce ŋau bɛ kù sĩa. Ì nɛ i maa jirima Ilaaɔ̃ ŋai si isɛɛnɛ nŋɛ ku ba dimi mmu mbɛɛ nwa ŋau a maà bu wa.

¹⁰ Bɛɛbɛi amu mɔ do inɛ nwa gɔ ŋa do woo ce icɛm ŋa à wɛ̃ nŋa fia do bilee. Amma í sĩa awa fei ka jɔ̀ nŋa gbese ŋau.

¹¹ Hai nnyi i sindo nŋa iko nŋa ŋa do jĩi ndii rezɛ̃ɛ nŋa ŋa do jĩi ndii olivi nŋa ŋa do kpasɛ̃ nŋa ŋa. Nɔ i maà bee ŋa inyi iyi ì nɛ ì ba ŋa, hai si fia do bilee do atɛ̃ vɛ̃ɛ do ikpoi isoi jĩi ndii olivi.

¹² Ŋɔi à jɛ à ni, aa ka sindo nŋa nɔ a kaa ka bee ŋa nkãma má. Aa ka ce bɛi ì fɔ. Ŋɔi ǹ kpe nŋa woo wee ŋau wa ku ba a ce kuwã do irii Ilaaɔ̃ si waju nŋa iyi aa jirima ideu.

¹³ Si anyiɛ nɔ ǹ mu itĩi kumboom ǹ gbugbãɛ ǹ ni, inɛ iyi kù kɔ̃ kuwãɛu, Ilaaɔ̃ ku gbugbã lafɛ̃ɛ bɛɛbɛ nɔ ku nyaa hai si kpasɛ̃ɛ. Kú jɔ̀ amanii lafɛ̃ɛ ku nɛ nɔ ku gbe awɔ ngbɛ. Nɔ inɛ fei í jɛsi í ni, ami. Ŋɔi à saabu Aɔ̃ Lafɛ̃ɛ. Si anyiɛ, ŋɔi à fangaa nɔ à koo à waa ceò kuwãu icɛ.

¹⁴ Ilaalu Aatakusɛɛsi í tako í som ǹ jɛ irii inɛi Zudaa ŋa fei si ilɛu. Í som ǹ jɛ inɛ ngboi ilɛu hai si adɔ̃ kɔnfiasiai bomma ku jɛɛ hee ku bɔ si adɔ̃ kuntaa do minjisiaɛ. Nɔ si afei adɔ̃ maateejiu bɛ, amu takam, walakɔ inɛ nwa ŋa, kãma nwa kù lasabu nŋu ku gba mii ŋa iyi à jɛ ti ilu ilɛu.

¹⁵ Amma hee n maa n to bɛ ilu ilɛ ŋa iyi à tako à wa bɛ ŋau à ya daa inɛ ŋa mii nkpɔ nkpɔi iyi aa sã. Inɛ akã fei isɔ fũfũ kpɛkɛlɛ ciijii à ya gba siɛ do sɔnda do atɛ̃. Si anyiɛ, woo ce icɛ nŋa ŋau à ya taa inɛ ŋa gbugbãi. Amma amu n kù ce bɛɛbɛ si na iyi í jɔ̀ ǹ wa n jirima Ilaaɔ̃.

¹⁶ Iyi í re mɔm, ǹ ce icɛ si bindiu ku teese, a kù nɔ a kù ra iko baa akã. Nɔ woo ce icɛm ŋa à waa ce icɛi bindiu ku teese ajɔ.

¹⁷ Zuifu ŋa do woo ce kiiti nŋa ŋa iyi à ya jɛ kpasɛ̃m à wɛɛi aŋa cĩɔ do ciitaa baka inɛ njoo ŋa iyi à ya naa hai ilɛ mmu ŋa baasi.

¹⁸ Nɔ ajɔ akã kɛtɛ akãi à ya kpa nwa do angudã jiida mɛɛfa do ajɛɛ ŋa nɔ si ajɔ mɛɛwa fei à ya ce nwa sɔɔlui vɛ̃ɛ iyi à nɛ bukaataɛ wai fei. Do nŋu fei, n kù ni inɛ ŋau a sãam fia iyi à nɛ kpãai a nam, si na iyi í jɔ̀ icɛ iyi à waa ceu í la si ŋa tã.

¹⁹ Ilaaɔ̃ Lafɛ̃ɛm, ye gigim na mii iyi ǹ cea zamaau ihɛ̃ fei nɔ i cɔm do iju jiida.