Neemi 4 - Bibeli do fee

¹ Iyi Sanbala do Tobiya do inɛi Arabi ŋa do inɛi Asidodi ŋa à gbɔ iyi icɛi bindii Zeruzalɛmu ku teese ku mau wa mɔsi, nɔ à waa dĩ foo ŋa iyi à wa bɛu, ŋɔi idɔ nŋa í kɔ̃ hee í caa.

² Ŋɔi aŋa fei à dĩ tɔɔsi wa a naa Zeruzalɛmu igũ ku ba a fɔtɔtɔi inɛ ŋa.

³ Ŋɔi à tɔɔ Aɔ̃ Lafɛ̃ɛ nwa, nɔ à jilɛ woo degbe ŋa dasãò idũ ku ba ka ganji kunaa nŋau wa.

⁴ Amma waati bɛɛbɛ inɛi Zudaa ŋa à waa weewea à wasi ku ni, woo so aso ŋau à gbɛɛji nɔ wee mii kuku ŋau í kɔ̀ wa kpɔ hee nsɛi. A kaa ka yɔkɔ ka ma bindiu pai.

⁵ Nɔ mbɛɛ nwa ŋa à waa tamaa a kaa ka gbɔ ide kãma, a kaa ka nɔ ka yɛ nkãma hee ajɔ iyi aa faata si wa wa ku ba a kpa wa, a leekĩò icɛ nwau.

Neemi í na woo ce icɛ ŋau jĩnɛi igũ ŋa

⁶ Zuifu ŋa iyi à wa kɔkɔi mbɛɛ nwa ŋau à naa bi tu wa tuuba mɛɛwa à na à sɔ̃ wa hai do tengi bii mbɛɛ nwa ŋau à waa bi a lɔò si wa wa.

⁷ Na ŋɔi í jɔ̀ ǹ kpɛ̃ zamaau nyaanze do nyaanze ǹ jilɛ ŋa do anyii bindiu tengi bii kugbokaɛ kù to bii gɔ ŋa, aŋa fei do taakuba nŋa ŋa do kaka nŋa ŋa do bioo nŋa ŋa.

⁸ Ŋɔi ǹ dede ǹ koo ǹ cɔ inɛ ŋa iyi ǹ jilɛ ŋau, si anyiɛ nɔ ǹ sɔ̃ inɛ ngbo ŋau do woo ce kiiti ŋa do inɛ ŋa iyi à gbe fei ǹ ni, i maà ce njo ŋa. I ye gigi ŋa iyi Aɔ̃ Lafɛ̃ɛ í la nɔ í nɛ amboe. I jaa kpaasi nŋɛ ŋa do ama nŋɛ ŋa do abo nŋɛ ŋa do kpasɛ̃ nŋɛ ŋa.

⁹ Ŋɔi mbɛɛ nwa ŋau à gbɔ iyi à sɔ̃ wa mii iyi aŋa à dasi idɔ a ceu fei, nɔ à mà iyi Ilaaɔ̃ í ganji aŋai. Si anyiɛ, awa fei à nyi tengi bii à waa ce icɛ nwa.

¹⁰ Hai ajɔ nŋu bɛ, bubui inɛm ŋau à ya maa ce icɛi, nɔ inɛ mbɔ ŋa à ya dasi ibɔi isɔi nɔ a maa mu kaka ŋa do tɛli ŋa do afa ŋa. Nɔ inɛ ngbo ŋau fei à ya maa leekĩi do anyii inɛi Zudaa ŋa.

¹¹ Inɛ ŋa iyi à waa ma bindiu do woo ce icɛi aso ku so ŋa wa à ya maa ce icɛi do awɔ akã, awɔ akã iyi ihɔ̃u mɔ ku maa mu mii ku ja igũ.

¹² Aŋa fei à dĩ taakuba nŋa ŋai si kpaka à waa ceò icɛ. Nɔ woo fã kuu í wa kɔkɔm.

¹³ Ŋɔi ǹ sɔ̃ inɛ ngbo ŋau do woo ce kiiti ŋa do inɛ ŋa iyi à gbe ŋau fei ǹ ni, icɛu í la nɔ í cĩ. Nɔ à fangaa si bindiu à jĩò njɛ.

¹⁴ Bii ì gbɔ imui kuu ŋa, i ya tɔtɔɔ wa bi tu wa do ikpa bii ì gbɔɔu ŋa. Aɔ̃ Lafɛ̃ɛ nwa á ja nwa.

¹⁵ Bɛɛbɛi à waa mɔsi icɛu, nɔ inɛ bubu nwa ŋa à ya maa mu kaka nŋa bɛ hai amɛɛjuumá hee idũ koo dũò.

¹⁶ Si waati akãu bɛ, ǹ sɔ̃ zamaau má ǹ ni, inɛ fei ku ya sũ Zeruzalɛmu idũ, nŋu do woo ce icɛɛ a ya degbe idũ, nɔ dasã, a ya ce icɛ.

¹⁷ Nɔ amu do kpaasim ŋa do woo ce icɛm ŋa do woo degbe ŋa iyi à waa toom ŋau, kãma nwa ci ya bɔ jaaɛ ŋa. Inɛ fei í ya maa mu jĩnɛi igũɛi baa bii wa bɔ ku wɛ.