Neemi 3 - Bibeli do fee

Zuifu ŋa à teese à waa ma bindii Zeruzalɛmu

¹ Ŋɔi Eliasibu woo wee nlau í dede, nŋu do woo wee mmu ŋau à ma anu koofa iyi à ya kpe anu koofai angudã ŋau. Ŋɔi à ce si kuwee ku ba ku jɛ ti Ilaaɔ̃. Nɔ aŋai à na à dasi gambo minji ŋau má. Nɔ à ma bindii iluu hee ku bɔ si bi ku degbei Mea, nɔ à mɔsi má hee bi ku degbei Hananeɛliu. Nɔ à ce si bindiu mɔ kuwee.

² Do cingaai Eliasibu ŋa, inɛi Zeriko ŋai à waa ma bɛ. Kɔkɔ nŋa Zakuu amai Imurii wa ma bɛ.

³ Amai Senaa ŋai à ma anu koofa iyi à ya kpe anu koofai cɛ̃ɛ ŋau. Aŋai à dasi jĩi ndii anu koofau à bɛi à dasi gamboɛ ŋa do sɔkɔɛ ŋa do isɔ ku gaauɛ ŋa.

⁴ Do cingaa nŋa Meremɔti amai Uri tɔkui Hakotii wa ce icɛ bɛ. Kɔkɔɛ bɛi Mɛsulamu amai Berekia tɔkui Mesezabeɛli wa ce icɛ. Do cingaai nŋu mɔ bɛi Sadɔku amai Baana wa ce icɛ.

⁵ Do cingaai nŋu mɔ bɛi inɛi Tekoa ŋa à waa ce icɛ. Amma inɛ ngbo nŋa ŋau a kɔ̀ ku sũa inɛ ŋa iyi à jɛ inɛ ngboi icɛ ŋau iri ilɛ.

⁶ Yoyada amai Pasea do Mɛsulamu amai Besodia ŋai à teese anu koofa iyi à ya kpe anu koofa nwou. Aŋai à dasi jĩi ndii anu koofau, nɔ à dasi gamboɛ ŋau do sɔkɔɛ ŋau do isɔ ku gaauɛ ŋau.

⁷ Inɛ ŋa mɔ iyi à waa ce icɛ kɔkɔ nŋa ŋa wee. Melatia inɛi Gabaɔ̃ɔ do Yadɔ̃ɔ inɛi Meronɔti do inɛi Gabaɔ̃ɔ do Misipa ŋa. Inɛ ŋau bɛ, inɛ ŋa iyi ilu ilɛ iyi í wa do ikpa nunui alɛi idoi Efarata í jilɛ à waa ce icɛ do iriɛ mbɛ.

⁸ Do kɔkɔ nŋa bɛi Uziɛli woo ce icɛi wura amai Haraya wa ce icɛ, nɔ do cingaai nŋu mɔ Hanania woo ce tunzãm nɔui wa ce icɛ bɛ. Aŋai à teese Zeruzalɛmu hee ku bɔ tengi bii bindiu í koo í cĩu.

⁹ Kɔkɔ nŋai Refaya amai Uu inɛ ngboi bubui ilui Zeruzalɛmuu wa ce icɛ.

¹⁰ Kɔkɔɛi Yedaya amai Harumafu wa ce icɛ do wajui kpasɛ̃i nŋu takaɛ, nɔ do cingaaɛ Hatusi amai Hasabunia wa ce icɛ.

¹¹ Malikiya amai Harimu do Hasubu amai Pahati-Moabu ŋai à teese mbɔi bindiu do bi ku degbe iyi à ya kpe bi ku sɔ̃ kaa ŋau.

¹² Do cingaa nŋai Salumu amai Halohɛsi inɛ ngboi bubui ilui Zeruzalɛmu iyi ihɔ̃u wa ce icɛ do ama inaaboɛ ŋa.

¹³ Hanuu do inɛi Zanoa ŋai à teese anu koofa iyi à ya kpe anu koofai lɔɔmau. Aŋai à maa nɔ à dasi gamboɛ ŋa do sɔkɔɛ ŋa do isɔ ku gaauɛ ŋa. Nɔ à ma bindiu má agbãawɔ dubu hee ku bɔ anu koofa iyi à ya kpe anu koofai iri ankitãu.

¹⁴ Nɔ Malikiya amai Rekabu inɛ ngboi ilui Bɛti-Hakɛmi í teese anu koofai iri ankitãu. Nŋui í maa nɔ í dasi gamboɛ ŋau do sɔkɔɛ ŋau do isɔ ku gaauɛ ŋa.

¹⁵ Salunu amai Kolu-Hoze inɛ ngboi ilui Misipau í teese anu koofai isɔ̃u. Nŋui í maa, nɔ í kɔɔ nɔ í dasi gamboɛ ŋa do sɔkɔɛ ŋau do isɔ ku gaauɛ ŋa. Nɔ í nyi í ma bindi iyi í wa fatamai Siloe iyi í wa kɔkɔi lamboi ilaaluu hee ku bɔ tengi bii à ma bi ku gũ ku bɔ ilui Davidiu.

¹⁶ Si anyiɛ nɔ Neemi amai Azibuku inɛ ngboi bubui ilui Bɛti-Suu wa teese hee wajui balɛi Davidi ŋa hee ku bɔ bi fatama iyi à mau ku naa si kpasɛ̃i woo ja igũ ilu wɔɔkɔi Davidi ŋau.

¹⁷ Si anyiɛ inɛi Levii ŋai à waa ce icɛ bɛ do Rehumu amai Bani. Kɔkɔi aŋa mɔ Hasabia inɛ ngboi bubui ilui Keilai wa ce icɛ bɛ do inɛɛ ŋa si tuubai iluɛ.

¹⁸ Kpaasi nŋa ŋa iyi à gbe iyi à waa ce icɛ kɔkɔ nŋa ŋau wee. Bavai amai Henadadi iyi í jɛ inɛ ngboi bubui ilui Keilau,

¹⁹ do Ezɛɛ amai Zozue inɛ ngboi Misipau iyi wa teese mbɔi bindiu bii gɔ do wajui bi ku gũ ku lɔò ile bi ku jilɛ jĩnɛi igũ ŋa si gontau.

²⁰ Si anyiɛ nɔ Baruku amai Zabai í teese bii gɔi bindiu do himma, hai bi gontau hee ku bɔ anu koofai kpasɛ̃i Eliasibu woo wee nlau.

²¹ Si anyiɛ nɔ Meremɔti amai Uri tɔkui Hakoti í teese hai anu koofau hee ku bɔ kɔɔi kpasɛ̃u.

²² Si anyiɛ nɔ woo wee ŋa iyi à naa hai ilu ŋa iyi à wa kɔkɔi Zeruzalɛmu à ce icɛ.

²³ Si anyi nŋa nɔ Bɛnzamɛɛ do Hasubu à ce icɛ do wajui kpasɛ̃ nŋa. Si anyi nŋa nɔ Azaria amai Maaseya tɔkui Anania í ce icɛ kɔkɔi kpasɛ̃ɛ.

²⁴ Si anyiɛ nɔ Binui amai Henadadi í teese hai kpasɛ̃i Azaria hee ku bɔ gontau hee si kɔkɔlɛɛ.

²⁵ Nɔ Palali amai Uzai í ce icɛ do wajui gontau do bi ku degbe iyi í wa kɔkɔi bantumai kpasɛ̃ bii woo degbe ilaalu ŋau à wa wo. Si anyiɛ nɔ Pedaya amai Pareosi í ce icɛ.

²⁶ Nɔ woo ce icɛ si kpasɛ̃i Aɔ̃ Lafɛ̃ɛ ŋa iyi à wa si iri kuta iyi à ya kpe Ofɛli à ce icɛ ikpa anu koofa iyi à ya kpe anu koofai inyi ŋau do ikpa nunui daakɔ kɔkɔi bi ku degbe iyi í wa antaii ilei ilaaluu.

²⁷ Si anyi nŋa nɔ inɛi Tekoa ŋa à teese hai bi ku degbe nla iyi í wa antaii ilei ilaaluu hee ku bɔ bi bindi iyi í wa kɔkɔi iri kutai Ofɛliu.

²⁸ Hai tengii anu koofa iyi à ya kpe anu koofai acĩ ŋau, woo wee ŋa à waa ce icɛ nŋa, inɛ fei do wajui kpasɛ̃ɛ.

²⁹ Si anyi nŋa nɔ Sadɔku amai Imɛɛ í ce ti anu kpasɛ̃ɛ. Si anyiɛ nɔ Semaya amai Sekania woo degbe anu koofa iyi à ya kpe koofai nunui daakɔu í ce icɛ.

³⁰ Si anyi nŋa nɔ Hanania amai Selemia do Hanuu ama mɛɛfasiai Salafu aŋai à teese mbɔi bindiu bii gɔ. Si anyi nŋa nɔ Mɛsulamu amai Berekia í ce ti wajui ileɛ.

³¹ Si anyiɛ nɔ Malikiya woo ce icɛi wurau í ce hai idei woo ce icɛ si kpasɛ̃i Aɔ̃ Lafɛ̃ɛ ŋa do ti sĩa ŋau si wajui anu koofai Mifikadi hee ku bɔ bi ku degbe iyi í wa tengii gontai bindiu.

³² Nɔ woo ce icɛi wura ŋa iyi à gbe ŋau do sĩa ŋau à ce icɛ si afei bi ku degbe iyi í wa tengii gontai bindiu do bi anu iyi à ya kpe anu koofai angudã ŋau.

Mbɛɛ ŋa à waa bi a leekĩ icɛu

³³ Waati iyi Sanbala í gbɔ iyi awa Zuifu ŋa à waa ce icɛi bindii Zeruzalɛmu ku teese, ŋɔi idɔɛ í kɔ̃ hee í caa. Nɔ wa yaako wa

³⁴ si wajui kpaasiɛ ŋa do si wajui soogei Samari ŋa wa ni, icɛ ngbɛ yoomai Zuifu hai nɛ gbugbã ŋau ihɛ̃ à waa ce. Aa teese a ma ilu nŋau ku ba a maa ce kuwee ŋa bɛ? Aa bɛi a yɔkɔ a kpa iriɛ nnyi? Aa yɔkɔ a baaò kuta ŋa iyi à jo à ce kukuu wa si agbɛ nŋa má?

³⁵ Tobiya inɛi Amɔɔ í wa kɔkɔɛ nɔ í ni, aŋa de a maa má. Baa bii í jɛ akã santoa gɔi í dingaa si, á yɔkɔ ku lɛgɛ bindii kuta nŋau bɛ.

³⁶ [Waati iyi amu Neemi ǹ gbɔ ideu, ŋɔi ǹ ce kutɔɔ ǹ ni,] Aɔ̃ Lafɛ̃ɛ nwa, gbɔ bɛi inɛ ŋa à kere wa í to. Jɔ̀ arabu nŋa ku cuku si antaii nŋa. Nɔ i jɔ̀ a jɛ ŋa igũ a mu ŋa aru a nɛò ŋa ilɛ mmu.

³⁷ Maà ce nŋa suuru si kurara nŋa, nɔ i maà kpa idei dulum du ŋa. À bu wa ijuò iju si na iyi í jɔ̀ à waa ma bindiu.

³⁸ Amma icɛi kumau í mɔsi. À ma bindiu à koo hee kugbokaɛ í bɔ anini, domi inɛ ŋa à so icɛu do inɔ akã.