Neemi 2 - Bibeli do fee

Aatakusɛɛsi í jɛsi Neemi ku nyi Zeruzalɛmu

¹ Ilaalu Aatakusɛɛsi wa jɛ ajɔ nŋu gɔ si adɔ̃ kɔnfiasiai bomma ku jɛɛ si cukpai Nisãa. Ŋɔi ǹ bu atɛ̃ vɛ̃ɛ ǹ naa. Amma waati bɛɛbɛu, inɔ kufɔ nla nlai ǹ wɛɛò. Ajɔ kãma n kù leekĩ si wajuɛ do inɔ kufɔ.

² Ŋɔi í beem í ni, bɛirei í ce ì waa wu bɛɛbɛ. I kù nɔ i kù jɔ inɛ iyi wa ce bɔ̃ɔ mɛɛ. Á yɔkɔ ku jɛ inɔ kufɔi í wa siɛ. Ŋɔi njo í mum ntɔ ntɔ.

³ Amma do nŋu fei ǹ jɛa ilaaluu ǹ ni, Ilaaɔ̃ ku muɛ hunde sisɔ. Bɛirei n kaa n ce n wu, bii ilu bii à si balam ŋa í kpɔò bomma nɔ gamboɛ ŋau à jo.

⁴ Ŋɔi í beem í ni, mii ì bi n ce. Nɔ gbakã ǹ tɔɔ Ilaaɔ̃ iyi í wa lele titã

⁵ ǹ bɛi ǹ jɛa ilaaluu ǹ ni bii á dɔ̃a si, nɔ bii í cɔ amu woo ce icɛɛ do iju jiida, kú jɔ̀ n bɔ ilɛi Zudaa si ilu bii à si balam ŋau ku ba n koo n teese n maa.

⁶ Ajɔ nŋu aboi ilaaluu í wa kɔkɔɛ wa buba. Ŋɔi ilaaluu í beem má í ni ajɔ fɛloi an koo n ce bɛ nɔ waati yoomai an baa. Ŋɔi ǹ sɔ̃ɔ ajɔi kubaam. Ŋɔi ilaaluu í jɛsi n koo.

⁷ Ǹ bɛi ǹ sɔ̃ɔ ǹ ni, bii ì yɔɔ iyi í sĩai, jɔ̀ a nam tia ŋa na inɛ ngboi ilɛi icei ido ŋau ku ba a jɔ̀ n lɔ n to ilɛi Zudaa.

⁸ Si anyiɛ nɔ a nam tia akã má iyi á jɛ ti Azafu woo degbe agboɛu ku ba ku nam jĩi ŋa iyi aa ka ceò gamboi ile ku nɛ gbugbã iyi í ya wa kɔkɔi kpasɛ̃i Aɔ̃ Lafɛ̃ɛu do ti bindii iluu do ti ile bii an koo n wa. Ŋɔi ilaaluu í nam tia ŋau, domi awɔ jiidai Ilaaɔ̃ Lafɛ̃ɛm wa bii anyim.

⁹ Si anyii nŋu, nɔ í ni inɛ ngboi sooge gɔ ŋa do masa gɔ ŋa a sim. Nɔ awaò ŋa à dede à dasi kpãa à nɛ hee icei idou. Iyi à to bɛ, ŋɔi à bɔ bi inɛ ngbo ŋau nɔ ǹ na ŋa tia ŋa iyi ilaalu í nam wau.

¹⁰ Ŋɔi Sanbala inɛi Horɔ̃ɔ do Tobiya inɛi Amɔɔ iyi í jɛ minjisiaɛu, à gbɔ ideu nɔ inɔ nŋa í fɔ ntɔ ntɔ do bɛi inɛ gɔ wa naa inɛi Izirɛli ŋa ku cea jiida.

Neemi wa cɔ bindi ŋau

¹¹ Waati iyi ǹ to Zeruzalɛmu ǹ ce ajɔ mɛɛta bɛ,

¹² n kù sɔ̃ inɛ kãma mii iyi Aɔ̃ Lafɛ̃ɛ í daam si idɔ n cea Zeruzalɛmu. Si anyiɛ ǹ dede idũ gɔ awaò inɛ gɔ ŋa. N kù kooò mɛɛmu kãma bii kù jɛ gbankɛlɛm.

¹³ Idũ lajai ǹ fita hai do bi anu koofa iyi à ya kpe anu koofai lɔɔmau ǹ wa n bɔ ikpa isɔ̃ iyi à ya kpe isɔ̃i akandamau do ikpa anu koofa iyi à ya kpe anu koofai iri ankitãu, ǹ wa n cɔò bindii Zeruzalɛmu ŋau bɛi í nɛ foo ŋa do gamboɛ ŋa iyi à jou.

¹⁴ Ŋɔi ǹ koo ǹ too kɔkɔi anu koofa iyi à ya kpe anu koofai isɔ̃ tengi bii fatamai ilaaluu í wa. Nɔ ǹ ba wee bii kãma kù wɛɛ bii mɛɛmu iyi ǹ wa n gũu a lɔò.

¹⁵ Idũu má, nɔ ǹ too do acãi inyiu, ǹ wa n cɔ bindiu. Si anyiɛ nɔ ǹ sinda ǹ nyi wa ǹ na ǹ koo ǹ lɔò wa hai do bi anu koofai lɔɔmau ǹ baaò wa.

¹⁶ Inɛ ngbo ŋau a kù mà bii ǹ bɔ do iyi ǹ wa n ce, domi waati bɛɛbɛ n kù sɔ̃ Zuifu ŋau ide kãma titã hee má jɛ woo wee ŋau do inɛ ngbo ŋau do inɛ ngbo ilu bɛɛrɛi ilu ŋau, do inɛ ŋa iyi à gbeu fei.

¹⁷ Amma waati iyi ǹ baa, ǹ sɔ̃ ŋa ǹ ni, i cɔ wahala nla nla iyi à wa si ŋa. Zeruzalɛmu í kpɔò bomma nɔ gamboɛ ŋau à jo. I jɔ̀ ka teese ka ma bindii Zeruzalɛmuu ŋa ku ba ka fita si anyɔ.

¹⁸ Nɔ ǹ sisi nŋa bɛi Aɔ̃ Lafɛ̃ɛ í bii anyim do awɔ jiidaɛ do ide ŋa iyi ilaaluu í sɔ̃m. Ŋɔi à ni, ka dede ka ce kumau. Ŋɔi à dasi gbugbã si icɛ jiidau bɛ.

¹⁹ Iyi Sanbala inɛi Horɔ̃ɔu do Tobiya inɛi Amɔɔ iyi í jɛ minjisiaɛu do Gesɛmu inɛi ilɛi Arabiu à gbɔ ideu, ŋɔi à nyaanyi wa à waa yaako wa. À waa ni nwa, mii ì waa ce bɛ ŋa ya. Ì waa bi i dedeò ide ku kɔ̀ bi ilaaluu ŋai ba.

²⁰ Ŋɔi ǹ jɛ nŋa ǹ ni, Ilaaɔ̃ nŋu iyi í wa lele á jɔ̀ ka kpa irii icɛu. Awa iyi à jɛ woo ce icɛɛ ŋau aa ka dede nɔ ka maa. Amma iŋɛ, i kù nɛ baa kãma si ilui Zeruzalɛmu ŋa, i kù nɔ i kù nɛ kpãai inɛ ngbo gɔ ku jɛ si iluu ŋa. Inɛ kãma kaa nɔ kú ye gigi nŋɛ si ilui Zeruzalɛmuu.