Neemi 13 - Bibeli do fee

Mii ikã ikã ŋa iyi Neemi í teese í jilɛ Njɛ ku fɛɛfɛ do dimi mmu ŋa

¹ Si waati akãu bɛ, ŋɔi à cio tia iyi Moizi í kɔ. Ŋɔi à yɛ bii à kɔ à ni inɛi Amɔɔ ŋa do inɛi Moabu ŋa a kù nɛ a tɔtɔɔ do inɛi Izirɛli ŋa a tɔɔ Ilaaɔ̃ ajɔ kãma,

² si na iyi í jɔ̀ a kù bɔ inɛi Izirɛli ŋa ku ko do sɔnda do inyi, do si na iyi í jɔ̀ à koo à na Balamu fia à ni ku naa ku ceekpe ŋa. Amma Ilaaɔ̃ Lafɛ̃ɛ nwa í kpaasi ikpeu do kuwee.

³ Iyi à gbɔ woodau ihɛ̃, ŋɔi à nya isɛ mmu ŋa fei hai si anini nŋa.

⁴ Hee nŋu bɛ ku maa ce, à cica Eliasibu woo weeu tã ku maa cɔ ile ŋa iyi à wa kpasɛ̃i Aɔ̃ Lafɛ̃ɛ nwau. Eliasibuu nyaanzei Tobiyai wa jɛ.

⁵ Si bɛi wa jɛ nyaanzei Tobiya, nŋui í jɔ̀ í jilɛa ile nla gɔ kú jɛ tɛɛ. Ile nŋui í jɛ tengi bii à ya tako a maa dasi kuweei iyafũ ŋa do tuaeu do jĩnɛi kpasɛ̃i Ilaaɔ̃ ŋau, do ikpɛ̃ iyi à ya na woo wee ŋau do si mɛɛwa fei akã iyi à ya nya si amaajɛ ŋau do atɛ̃ vɛ̃ɛ titɔ̃ do ikpoi isoi jĩi ndii olivi ŋa iyi à jɛ ti inɛi Levii ŋa do woo kɔ̃ iri ŋa do woo degbe anu koofai kpasɛ̃u.

⁶ Waati iyi nŋu bɛ fei í ce n kù wa Zeruzalɛmu bɛ, domi ǹ nyi bi Aatakusɛɛsi ilaalui Babilɔniu si adɔ̃ kuntaa do minjisiai bomma ku jɛɛu. Iyi adɔ̃u í kpa iri, ŋɔi ǹ tɔɔɛ ǹ ni

⁷ ku jɔ̀ n bɔ Zeruzalɛmu má, nɔ í jɛɛm si. Iyi ǹ to bɛ ŋɔi ǹ yɛ mii laalɔ iyi Eliasibu í ce. Í so ile akã si bantumai kpasɛ̃i Ilaaɔ̃ í na Tobiya.

⁸ Ŋɔi idɔm í kɔ̃ siɛ ntɔ ntɔ. Nɔ ǹ nya mii iyi í jɛ ti Tobiya fei hai inɔ ileu, ǹ nyɔɔ waduude.

⁹ Ŋɔi ǹ ni a cea ile ŋau buki iyi á jɔ̀ a maaju, si anyiɛ nɔ ǹ sindo jĩnɛi kpasɛ̃i Ilaaɔ̃ ŋau si agbɛ nŋa do kuweei iyafũ ŋau do tuaeu.

Akã ku nya si mɛɛwa fei

¹⁰ Ǹ nyi ǹ gbɔ má iyi a ci ya na inɛi Levii ŋa ikpɛ̃ nŋa. Nɔ aŋaò woo kɔ̃ iri ŋa iyi à waa ce icɛi kpasɛ̃i Ilaaɔ̃u à sa, inɛ fei í nɛ ilɛɛ.

¹¹ Ŋɔi ǹ kpe woo ce kiiti ŋau ǹ gbagba si ŋa, nɔ ǹ ni, bɛirei í ce à fũsi kpasɛ̃i Ilaaɔ̃u awɔ. Ŋɔi ǹ tɔtɔɔ inɛi Levii ŋau do woo kɔ̃ iri ŋau, nɔ ǹ sindo ŋa si icɛ nŋa.

¹² Ŋɔi inɛi Zudaa fei wa naaò si mɛɛwa fei akã iyi í nya si amaajɛɛ do ti vɛ̃ɛ titɔ̃ do ikpoi oliviɛ wa si ile bi ku jilɛ aso ŋau.

¹³ Ŋɔi ǹ jɔ̀a Selemia woo weeu ile ŋau ku maa cɔ ŋa, nŋu do Sadɔku woo mà woodau, do Pedaya inɛ akãi inɛi Levii ŋau. Nɔ ǹ ma nŋa si Hanaa amai Zakuu tɔkui Matania. Ǹ ce bɛɛbɛi si na iyi í jɔ̀ kuce nŋa í nɛ naanɛ. Aŋai à nɛ a ya kpɛ̃a nyaanze nŋa ŋa amua ŋau.

¹⁴ Na nŋu Aɔ̃ Lafɛ̃ɛm, jɔ̀ i ye gigim. Maà gbɛjɛ icɛ iyi ǹ ce do naanɛ si gãmɛi wooda ŋa iyi à jɛ ti kpasɛ̃ɛu.

Ajɔi kusĩmi

¹⁵ Si waati nŋu bɛ, si ilɛi Zudaa, ǹ yɛ inɛ gɔ ŋa à ya maa fɔ̃ isoi rezɛ̃ɛ si ajɔi kusĩmiu. Nɔ inɛ gɔ ŋa à ya kãa gbankɛlɛ nŋa ŋa kamboi bilee ŋa wa a baaò wa ide, hee do atɛ̃ vɛ̃ɛ do isoi rezɛ̃ɛ ŋa do ti figi ŋa do mii ikã ikã fei, à ya baaò ŋa wa Zeruzalɛmu si ajɔi kusĩmiu. Ŋɔi ǹ sɔ̃ ŋa ǹ ni a maà ya ta nkãma ajɔ nŋu bɛ.

¹⁶ Nɔ má, inɛi Tii ŋa iyi à buba Zeruzalɛmu à ya naaò cɛ̃ɛ ŋa wa inɔ iluu do iwo dimi ikã ikã fei, a naa a maa taa inɛi Zudaa ŋa si ajɔi kusĩmiu.

¹⁷ Ŋɔi ǹ gbagba si inɛ ngboi Zudaa ŋau, nɔ ǹ bee ŋa ǹ ni, na mii í jɔ̀ ì waa ce laalɔ dimi bɛ ihɛ̃ ì waa bɛjɛò ajɔi kusĩmiu ŋa.

¹⁸ Bɛɛbɛi bala nŋɛ ŋa à ce, nɔ Ilaaɔ̃ Lafɛ̃ɛ nwa í jɔ̀ wahala ŋau ihɛ̃ fei à naa si wa do si iluu. Nɔ iŋɛ mɔ ì nyi ì waa bɛjɛ ajɔi kusĩmiu má ŋa ì waa fa si wa idɔɔkɔ̃ɛ wa má ŋa.

¹⁹ Ŋɔi ǹ ni a ya cĩmbo gamboi Zeruzalɛmu ŋau hai amɛɛbii wa tɔtɔɔ gbakã hee kusĩmiu ku maa sinti. Nɔ a maà ya cũu bii kusĩmiu kù tã. Nɔ ǹ jilɛ woo ce icɛm gɔ ŋa si anu koofa ŋau ku ba a ya ganji a lɔò iwo ŋa wa si ajɔi kusĩmiu.

²⁰ Ŋɔi sĩa ŋau do woo ta iwo dimi ikã ikã ŋau fei à sũ do anyii bindii Zeruzalɛmuu isɛ gbeeji.

²¹ Ŋɔi ǹ koo ǹ sɔ̃ ŋa ǹ ni, na mii í ce ì waa sũ do anyii bindiu ŋa. Bii ì sisi má ŋa an lesi ŋɛ awɔ. Hai waati bɛɛbɛ a kù naa si ajɔi kusĩmi má.

²² Ŋɔi ǹ ni inɛi Levii ŋau mɔ a cea ara nŋa buki iyi á jɔ̀ a maaju nɔ a naa a degbe anu koofa ŋau ku ba a jɔ̀ ajɔi kusĩmiu ku má. Na nŋu, jɔ̀ i ye gigim Aɔ̃ Lafɛ̃ɛm, nɔ i degbem na didɔ̃ nla nlaɛ.

Abɔdɔ̃ do dimi mmu ŋa

²³ Si waati akãu bɛ má, ǹ yɛ Zuifu ŋa iyi à so abo ŋa hai bi inɛi Asidodi ŋa do bi inɛi Amɔɔ ŋa do bi inɛi Moabu ŋa.

²⁴ Bubui ama nŋa ŋa, feei inɛi Asidodi ŋai à ya maa fɔ walakɔ feei dimi mmu ŋa. A kù waa gbɔ feei baa nŋa ŋa iyi à ya fɔ si ilɛi Zudaa.

²⁵ Ŋɔi ǹ koo ǹ gbagba si ŋa, nɔ ǹ ceekpe ŋa. Ŋɔi ǹ cã gɔgɔ nŋa ŋa, nɔ ǹ tu ntoi iri nŋa, nɔ ǹ jɔ̀ à ce kugbasi do irii Ilaaɔ̃ à ni aŋa a kaa mua dimi mmu ŋau mudɛ̃ɛ nŋa ŋa, nɔ a kaa dɛdɛa awaasũ nŋa ŋa mudɛ̃ɛi dimi mmu ŋa hee má jɛ aŋa taka nŋa.

²⁶ Nɔ ǹ sɔ̃ ŋa ǹ ni, kù jɛ nŋui í jɔ̀ Salomɔɔ ilaalui Izirɛli í ce dulum? Ilaalu saaɛ kãma kù nɔ kù wɛɛ si ilɛ nkpɔ nkpɔ ŋau ihɛ̃. Aɔ̃ Lafɛ̃ɛ í buui, nɔ í soo ilaalu si ilɛi Izirɛli fei. Do nŋu fei abo dimi mmu ŋa à faa si dulum.

²⁷ A kù bi ka gbɔ a ni ì waa ce dulum nla nla bi Aɔ̃ Lafɛ̃ɛ nwa iyi í to hee ì waa so abo dimi mmu ŋau má ŋa.

²⁸ Inɛ akãi amai Yoyada, tɔkui Eliasibu woo wee nlau í nɛ abo gɔ iyi Sanbala inɛi Horɔ̃ɔui í jɛ baaɛ. Ŋɔi ǹ lele amai Yoyadau í jĩò bi tom.

²⁹ Aɔ̃ Lafɛ̃ɛm, maà gbɛjɛ laalɔ nŋau bɛ, domi à bɛjɛ icɛi woo wee ŋau nɔ a kù jirima akabuu iyi woo wee ŋa do inɛi Levii ŋau à dĩ do awɔ.

Idei ankãanyi

³⁰ Ŋɔi ǹ jɔ̀ à nya inɛ iyi í jɛ isɛ mmu fei hai si anini nŋa. Nɔ ǹ teese ǹ jilɛ wooda iyi woo wee ŋau à nɛ a jirima aŋaò inɛi Levii ŋa, nɔ ǹ jilɛ inɛ fei si icɛɛ.

³¹ Nɔ ǹ teese ǹ jilɛ wooda amuai jĩi ŋau do ti amaajɛ sinte ŋa si waati ikã ikãu. Aɔ̃ Lafɛ̃ɛm, ye gigim do inɔ akã.