Neemi 10 - Bibeli do fee

Zamaau í jɛsi nŋu ku jirima wooda

¹ Na irii iyi ihɛ̃ feii í jɔ̀ awa inɛi Izirɛli ŋa à ce kuwã nla nla nɔ à jɔ̀ à kɔɔ si tia. Inɛ ngbo nwa ŋa do inɛi Levii nwa ŋa do woo wee nwa ŋa à tɛ̀ si tia nwau awɔ à cĩmboɛ nɔ à dasi sɛɛda.

² Inɛ ŋa iyi à tɛ̀ si tiau awɔ wee. Neemi ilu ilɛu iyi í jɛ amai Hakalia, do Sedesiasi

³ do Seraya do Azaria do Zeremi,

⁴ do Pasuu do Amaria do Malikiya,

⁵ do Hatusi, do Sebania do Maluku,

⁶ do Harimu do Meremɔti do Abudiasi,

⁷ do Daniɛli do Ginetɔ̃ɔ do Baruku,

⁸ do Mɛsulamu do Abiya do Miyamɛɛ,

⁹ do Maazia do Biligai do Semaya aŋa fei woo wee ŋai à jɛ.

¹⁰ Inɛi Levii ŋa mɔ iyi à dasi awɔ wee. Zozue amai Azania do Binui si inɔi amai Henadadi ŋau do Kadimiɛli,

¹¹ do nyaanze nŋa ŋa Sebania do Hodiya do Kelita do Pelaya do Hanaa,

¹² do Misee do Rehobu do Hasabia,

¹³ do Zakuu do Serebia do Sebania,

¹⁴ do Hodiya do Bani do Beninu.

¹⁵ Inɛ ngboi zamaa ŋau mɔ iyi à dasi awɔ wee. Pareosi do Pahati-Moabu do Elamu do Zatu do Bani,

¹⁶ do Buni do Azugadi do Bebai,

¹⁷ do Adoniasi do Biguvai do Adini,

¹⁸ do Atɛɛ do Ezekiasi do Azuu,

¹⁹ do Hodiya do Hasumu do Bɛtisai,

²⁰ do Harifu do Anatɔti do Nebai,

²¹ do Magipiasi do Mɛsulamu do Hezii,

²² do Mɛsezabɛli do Sadɔku do Yadua,

²³ do Pelatia do Hanaa do Anaya,

²⁴ do Ozee do Hanania do Hasubu,

²⁵ do Halohɛsi do Piliha do Sobɛki,

²⁶ do Rehumu do Hasabunia do Maaseya,

²⁷ do Ahiya do Hanaa do Anaa,

²⁸ do Maluku do Harimu, do Baana.

²⁹ Ŋɔi inɛ ŋa iyi à gbe ŋau, hai woo wee ŋau do inɛi Levii ŋau do woo degbe anu koofa ŋau do woo kɔ̃ iri ŋau do woo ce icɛ inɔ kpasɛ̃i Ilaaɔ̃ ŋau hee do awa iyi à nya ara nwa wa hai si inɔi isɛ mmu ŋau fei ku ba ka naa ka too si woodai Ilaaɔ̃u, awa do abo nwa ŋa do ama inɛmɔkɔ nwa ŋa do ama inaabo nwa ŋa iyi aa yɔkɔ a mà ngɔgɔ nɔ a nɛ bisi fei,

³⁰ awa fei à tɔtɔɔ do inɛ nwa ŋa iyi à jɛ inɛ ngbo nwa ŋau. Ŋɔi à ce kuwã do kugbasi à ni, awa mɔ aa ka too si wooda do asaiyai Aɔ̃ Lafɛ̃ɛ iyi Moizi woo ce icɛɛ í jilɛu nɔ ka jirimaɛ ka maa ceò fei ndɛɛ icɛ.

³¹ À ce kuwã ka maà mua dimi mmui ilɛ ŋa mudɛ̃ɛ nwa ŋa, nɔ ka maà so mudɛ̃ɛ nŋa ŋa ka na ama nwa ŋa.

³² Nɔ bii à naaò sɔnda walakɔ iwo mmu gɔ ku ta wa si ajɔi kusĩmi do si ajɔi jingau ŋa a kaa ka ra. Nɔ si adɔ̃ mɛɛjesia fei aa ka ya jɔ̀ ilɛ nwa ŋa a sĩmii nɔ ka kpa gbese fei.

³³ À jilɛa ara nwa wooda ka ya ce amuai isɔ fũfũ garamu mɛɛ na icɛi kpasɛ̃i Aɔ̃ Lafɛ̃ɛ nwa si adɔ̃ akã fei.

³⁴ Amuaui á jɛ mii iyi aa ya raò pɛ̃ɛ iyi aa ya jilɛa Aɔ̃ Lafɛ̃ɛ ajɔ fei, do kuweei iyafũ iyi à ya ce ajɔ fei, do kuwee iyi à ya jo si ina fei sãa sãa ajɔ fei, do kuweei ajɔi kusĩmi ŋau fei, do ti cukpa titɔ̃ ŋau do ti jingau ŋau do ti kuwee mmu ŋa iyi à jɛ ti Ilaaɔ̃ do ti kuwee ŋa iyi à ya kpaò idei dulum dii inɛi Izirɛli ŋa do ti mii ŋa iyi à ya ce kpasɛ̃i Aɔ̃ Lafɛ̃ɛ nwau fei.

³⁵ Awa woo wee ŋau do inɛi Levii ŋau do zamaau fei à ta kpasa ku ba ka mà waati iyi nyaanze ikã ikã fei à ya naaò jĩi wa si kpasɛ̃i Aɔ̃ Lafɛ̃ɛ nwa iyi aa koò ina si bi kuweei Aɔ̃ Lafɛ̃ɛ nwa si bɛi à kɔɔ si wooda.

³⁶ Si anyiɛ má, nɔ à ce kuwã iyi aa ka ya naaò amaajɛ sintei ilɛ nwa ŋa do iso sintei jĩi ndu nwa ŋa wa si kpasɛ̃i Aɔ̃ Lafɛ̃ɛ.

³⁷ Nɔ ka naa woo wee ŋa iyi à waa ce icɛ si kpasɛ̃i Aɔ̃ Lafɛ̃ɛ nwa ama yemma nwa ŋau wa do ama sintei mɛɛmu nwa ŋau, hai kɛtɛ nwa ŋa do angudã nwa ŋa do iwo nwa ŋa, si bɛi à kɔɔ si wooda.

³⁸ Ka ya naaa woo wee ŋau iyafũ sinte nwa ŋau wa si inɔ kpasɛ̃i Aɔ̃ Lafɛ̃ɛ nwa do amua nwa ŋa, do isoi jĩi ndu wa ŋa fei, do vɛ̃ɛ titɔ̃ ŋau do ikpo. Nɔ si amaajɛi ilɛ nwa ŋa, si mɛɛwa fei ka ya na inɛi Levii ŋau akã. Aŋa taka nŋai à nɛ à ya gbaa wa si ilu ŋa bii inɛ ŋa à waa ce logoo fei.

³⁹ Woo wee iyi í jɛ dimii Arɔ̃ɔ nŋui á sì inɛi Levii ŋau waati iyi aa koo a gba akã si mɛɛwa fei. Nɔ inɛi Levii ŋau mɔ si mɛɛwa fei aa nya akã a naaò wa si kpasɛ̃i Aɔ̃ Lafɛ̃ɛ nwai si ile bi ku singa amani ŋau.

⁴⁰ Inɛi Izirɛli ŋa do inɛi Levii ŋa aa naaò amuai bilee ŋa wa do ikpo ŋa do vɛ̃ɛ titɔ̃ ŋa si inɔ ile ŋau bɛ. Bɛi jĩnɛi ile kumá ŋau à wa, nɔ bɛi woo wee ŋa iyi à waa ce icɛu à wa, do woo degbe anu koofa ŋau do woo kɔ̃ iri ŋau. Do yaase bɛɛbɛ, a kaa ka fũsi kpasɛ̃i Aɔ̃ Lafɛ̃ɛ nwau awɔ.