Neemi 1 - Bibeli do fee

Neemi í gbɔ laabaau ŋa si gãmɛi Zeruzalɛmu

¹ Idei Neemi amai Hakalia wee. Si adɔ̃ kɔnfiasiai bomma ku jɛi ilaalu Aatakusɛɛsi, si cukpai Kisile, amu Neemi ǹ wa Suze ilu ku nɛ gbugbãu.

² Ŋɔi Hanani inɛ akãi nyaanzem ŋau í to wa hai ilɛi Zudaa, nŋu do inɛ gɔ ŋa. Nɔ ǹ bee ŋa ide si gãmɛi Zuifu ŋa iyi à gbe si ilɛu do inɛ ŋa iyi à baa hai bii à waa jɛ aruu, do si gãmɛi Zeruzalɛmu.

³ Ŋɔi à jɛɛm à ni, inɛ ŋa iyi à gbe ŋau do inɛ ŋa iyi à baa, à wa si ilɛi Zudaa bɛ, amma si wahala do si anyɔ nla nlai à wa. Iyi í jɛ idei Zeruzalɛmu mɔ, bindiɛ ŋau à lɛgɛ, nɔ gamboɛ ŋau à jo.

Kutɔɔi Neemi na Zuifu ŋa

⁴ Iyi ǹ gbɔ ide ŋau ŋɔi ǹ buba ǹ kpata, nɔ ǹ ce ajɔ bututu si inɔ kufɔ. Ǹ dĩ anu, nɔ ǹ tɔɔ Ilaaɔ̃ iyi í wa lele

⁵ ǹ ni, Aɔ̃ Lafɛ̃ɛ, awɔ Ilaaɔ̃ iyi ì wa lele, ì la nɔ ì nɛ amboe. Awɔi ì waa mu akabuuɛ, nɔ ì ya ce araarei inɛ ŋa iyi à biɛ nɔ à waa jirima woodaɛ ŋa.

⁶ Cĩ ijuɛ ŋa nɔ i de itĩ i gbɔ kutɔɔ iyi amu woo ce icɛɛ ǹ wa n ce dasãò idũ. Ǹ wa n tɔɔɛi, kpa idei dulum du wa, awa inɛi Izirɛli woo ce icɛɛ ŋa. Ntɔ ntɔ, amu do kpasɛ̃i baam à ce dulum.

⁷ À ce kurara bi tɛɛ si bɛi a kù jirima ide ŋa do wooda ŋa do ikɔ ŋa iyi ì jilɛa Moizi woo ce icɛɛu.

⁸ Jɔ̀ i ye gigii ide iyi ì tako ì ni Moizi ku sɔ̃ wau ì ni bii a kù jirima woodaɛ, aa fangaa wa si inɔi dimi mmu ŋa,

⁹ amma bii à nyi wa bi tɛɛ, nɔ à waa jirima woodaɛ ŋa nɔ à waa ceò icɛ, aa tɔtɔɔ wa má. Baa bii í jɛ hee kɔɔi andunyai à koo à waa mu wa aru, aa tɔtɔɔ wa nɔ i baaò wa wa si inya bii ì cica ì ni aa maa wau.

¹⁰ Awa woo ce icɛɛ ŋai nɔ à jɛ zamaaɛ ŋa iyi ì ya do gbugbã nla nlaɛ.

¹¹ Lafɛ̃ɛ, jɔ̀ i sotĩ i gbɔ kutɔɔm, amu woo ce icɛɛ, do ti woo ce icɛɛ ŋa iyi à bi aŋa a mà bɛɛrɛɛ. Jɔ̀ isɛɛnɛm nɔu ku dɔ̃ bi ilaaluu, nɔ ku cɔm do iju jiida. Waati bɛɛbɛ amui ǹ jɛ woo bu atɛ̃i ilaaluu.