Nahumu 3 - Bibeli do fee

Ikui wa kɔ̃ si ilui woo kpa inɛ ŋau

¹ Irei ì gbɔ inɔ kufɔ iyi í jɛ ti ilui woo kpa inɛ ŋau. Inɛi ilu ŋau à waa jɛ kuwɛɛ nŋai do inɛ ku zamba, do gbugbã ku taa inɛ ŋa, do mii ndii inɛ ku bata ku gba waati kãma fei.

² Si iluu à waa gbɔ ibai kpɔtɔɔ iyi à waa cãò acĩ ŋa, do ibai kutɛi sarɛti ŋa. Acĩ ŋa à waa sɛi, sarɛti ku ce igũ ŋa à fo à waa dingaa.

³ Masa ŋau à waa bɔ bi ku ce igũu do saasa. Jĩnɛi igũ nŋa ŋau à yɛ bɛi amɛi ina, nɔ kaka nŋa ŋau à yɛ bɛi ina iyi wa la. Iku ŋa à waa kɔ̃i bii fei, nɔ iku ŋau à kpele si njɛi. Inɛ kãma kaa yɔkɔ ku ka ŋa. Sooge ŋa à ya maa koosɛ si iku ŋaui.

Anyɔi í jɛ ti Ninivu

⁴ Ninivu í ce sakarai dubu ikɔ nkpɔ nkpɔ. Ninivuu, ilu kusĩai nɔ í ya maa fa inɛ ŋa do dobu dobu. Í sinda zamaa nkpɔ nkpɔ arui na sakaraɛ do dobu dobuɛu.

⁵ Ŋɔi Aɔ̃ Lafɛ̃ɛi lele do ilɛ í ni, na nŋu bɛ, an jɔ̀ ijuukpã ku naa siɛi. An wu ibɔ sisɔ iyi ì waa dasii hee si wajuɛ, nɔ n jɔ̀ inɛi ilɛ mmu ŋa a yɛ basĩɛ. Do yaase bɛɛbɛ, inɛi bomma mmu ŋa aa yɛ kukayeɛ.

⁶ An kosiɛ riisi ŋai ku ba n kayeɛ i maà nɛ bɛɛrɛ má, nɔ inɛ ŋa a maa cɔɛ.

⁷ Inɛ ŋa iyi aa yɛɛ fei, aa ya maa sai. Aa ya dɔ̃ anui a maa ni, Ninivu í ce nfe. Yooi á ce araareɛ. Hee iwoi an koo n baaɛ woo tũ idɔ ŋa wa.

Mii iyi í ba Tɛbɛɛsii á ba Ninivu mɔ

⁸ Ninivu, awɔ ì tia Tɛbɛɛsi ilu iyi inyii idoi Nili í kaakoɛui? Ido nlai Niliui í jɛ bɛi bindi ku nɛ gbugbã iyi í kaako iluu nɔ wa degbeɛ bɛi bindii idĩ.

⁹ Hai bi inɛi Etiopi do inɛi Ezibiti ŋai wa ba gbugbã hai nɛ kɔɔ wa. Aŋaò inɛi Putu do inɛi Libii ŋai à nɛ anu akã.

¹⁰ Do nŋu fei à mu inɛi ilui Tɛbɛɛsi ŋau mɔ à nɛò ŋa ilɛ mmu. Mbɛɛ ŋau à kpã amaɛ ŋa iju si kpãa koko ŋa fei. Inɛ ŋa iyi à jɔɔ igũ ŋau, à ta kpasai à ceò ikpɛ̃i inɛ ngbo ŋau, nɔ à dĩ ilu bɛɛrɛɛ ŋau mɔ do sesee.

¹¹ Awɔ mɔ Ninivu, aa yɛ ara kuro ntɔ ntɔ, nɔ aa sa i maa manji. Aa na i maa sai i maa dɛdɛ bi ku manji na irii mbɛɛɛ ŋa.

Ninivu kaa yɔkɔ ku leekĩ

¹² Inya ku nɛ gbugbãɛ ŋau fei à yɛi bɛi isoi jĩi ndii figi iyi í jĩa tã. Bii à yaga jĩi ndii figi ŋau gbakã, à ya cukui a dasi gɛlɛi inɛ iyi wa bi ku jɛ ŋau.

¹³ Soogeɛ ŋa à baa à jɛ bɛi inaabo hai nɛ gbugbã ŋa. Gambo ku nɛ gbugbãi ilɛɛu í cĩi do araɛ si wajui mbɛɛɛ ŋa, nɔ ina í jo sɔkɔɛ ŋau fei.

¹⁴ Iŋɛ inɛi ilui Ninivu ŋa, i kpã inyi kosĩa i maa jilɔɔ ŋa na ilu nŋɛ iyi aa na a bu koeu. I teese i muaa bindi nŋɛ ŋau gbugbã ŋa. I teese i jojo si pɔkɔdɔ ŋa, nɔ i ce sɔɔlui biiki ku nya ŋa.

¹⁵ Amma aa ku ŋai si goobai ilu nŋɛ, walakɔ mɔ a kpa ŋɛ si igũ. Aa ce nfe ŋai bɛi kɛtɛngbo ŋa à ya ŋɔ wua ŋa a ce nfe nŋa. Ilui Ninivu í nɛ zamaai wo nkpɔ nkpɔ bɛi kɛtɛngbo ŋa iyi à tɔtɔɔ nkpɔ nkpɔ.

Inɛ kãma kaa gbe si iluu

¹⁶ Woo nya sĩaɛ ŋa à tako à kpɔ wo à re baa leleaɔ̃ ŋa. Amma nsɛi, aŋa fei à nɛ. À yɛi bɛi kɛtɛngbo ŋa iyi à ya jɛ mii ŋa, nɔ a fo a nɛ.

¹⁷ Woo degbe nŋɛ ŋau à kpɔi bɛi kɛtɛngbo ŋa, nɔ akawe nŋɛ ŋau mɔ à kpɔi bɛi mii ku fo wɛwɛɛ ŋa iyi à desi ama jĩi tũtũ ŋa si waatii tũtũ. Waati iyi inunu í na wa gbãa wa, à ya fangaai nɔ i kaa mà baa bii à wa má.

Asɔɔ iyi kaa teese

¹⁸ Ilaalui Asiri, inɛ ngboi ilɛɛ ŋau à waa sĩ njoo. Inɛ ngboi soogeɛ ŋau a kù waa yaga má. Inɛɛ ŋau à fangaa si iri kuta ŋa, nɔ inɛ kãma kù waa tɔtɔɔ ŋa wa.

¹⁹ Asɔɔ iyi kù nɛ kuteesei í baɛ bɛ. Kumɛɛɛ ŋa iyi ì bau, kumɛɛ ku kpa inɛi. Inɛ ŋa iyi à gbɔ mii iyi í baɛu fei, à ya maa dakpɛɛi na wahalaɛu, domi laalɔ iyi ì ya maa ce wo, í to si aŋa fei.