Nahumu 2 - Bibeli do fee

¹ Iŋɛ inɛi Zudaa ŋa, i cɔ woo bɛ gɔ wa naa hai do ikpa antaii iri kuta ŋau. Laabaau jiida iyi wa fɔ idei laakai ku sũi wa naaò wa. I ce jingau nŋɛ ŋa. I naa Ilaaɔ̃ mii iyi ì ceaa kuwãɛ wa ŋa. Inɛ laalɔu kaa naa si ilɛ nŋɛ má, domi à ce nfei gbugbãɛ mam mam.

² Iŋɛ inɛi Ninivu ŋa, sooge ŋa à waa naa si ŋɛ. Iŋɛ soogei Ninivu ŋau mɔ, i degbe bindi ku nɛ gbugbãu, nɔ i maa cɔ kpãau ŋa. I ce sɔɔlui igũ ŋa. I dasi wɔɔkɔ nɔ i jɔ̀ i nɛ gbugbã ntɔ ntɔ ŋa.

³ À ce nfei Zakɔbu do Izirɛli bɛi à ya ce asɔɔi amaawɔi jĩi ndii rezɛ̃ɛ ŋa. Amma Aɔ̃ Lafɛ̃ɛ í jɔ̀ à nɛ bɛɛrɛ má.

À jɛ ilui Ninivu igũ nɔ à ko mii ndɛɛ ŋa

⁴ Sooge mbɛɛ ŋau, ila nkpai à jɔsi tɛli nŋa. Inɛmɔkɔ kaasãanɛ ilu wɔɔkɔ ŋau mɔ, ibɔ nkpa ŋai à waa dasi. Bii à tã sɔɔlui igũ ku ce, sarɛtii igũ nŋa ŋau à ya maa daanai bɛi amɛi ina, nɔ kaka nŋa ŋa à ya maa yagai.

⁵ Sarɛti ŋau à ya maa sɛii si kpãa ŋa do si bantuma ŋa a maa bɔ bi ku ce igũu. À yɛi bɛi ina jugula, nɔ à gbãai bɛi kuŋɔi ijĩ.

⁶ Ŋɔi ilaalui Ninivuu í kpe inɛ ngboi soogeɛ ŋa, amma iyi à ce isɛɛnɛ à waa naa à waa koosɛ wai, nɔ mbɛɛ ŋau à sɛi à waa nɛ ikpa bi bindii iluu tengi bii aa ba a koo a manji.

⁷ Ŋɔi anu akã, gambo ŋa iyi à wa ikpa bi ido ŋau à cĩ, nɔ kabai bommau í lɛgɛ.

⁸ Nɔ mbɛɛ ŋau à so iwɛ̃ nŋau à nɛò. Inaabo ŋa iyi à ya maa gbɔau à dɔ̃ anu à waa kũnguò bɛi ankasiidi ŋa. Si inɔ kufɔ nŋau à wasi gɛndɛ nŋa ŋa ku cã.

⁹ Ninivu í baa í yɛi bɛi bi ku jilɛ inyi iyi inyi iyi í wa si inɔɛ fei í jo. Ŋɔi à dɔ̃ anu à ni, i leekĩ ŋa, i leekĩ ŋa. Amma woo sa ŋau, baa inɛ akã nŋa kù sinda wa.

¹⁰ Baa bii à ko wura do isɔ fũfũ ŋau, amanii iluu kaa tã. Amani jiida dimi ikã ikãi wa kɔ̃ si iluu.

¹¹ À ce ile mii fei. À lɛgɛ gɔgɔ ŋa, nɔ à ce asɔɔ nŋa, hee inɔi inɛ ŋa í fɔ, nɔ bancaka nŋa ŋa à kɛɛba, nɔ ara nŋa fei wa yaya, nɔ waju nŋa fei í kpaasi.

Ninivu í yɛi bɛi muusu nla iyi à jɛ igũ

¹² Bɛirei bi kuwai muusu nlau í na í jɛ. Ama muusu nla ŋau à waa ba sɔnda nŋa. Waati iyi muusu nlau í bɔ adɛ, inɛ kãma ci ya lu amaɛ ŋau.

¹³ Muusu nla akɔ í ya kpaa muusu iye do amaɛ ŋa iŋa ŋa wa. Í ya kɔ̃ koloɛ ŋaui do iŋai mɛɛmu ŋa iyi í kpa nɔ í gagagaau.

¹⁴ Aɔ̃ Lafɛ̃ɛi lele do ilɛu í ni, an naa siɛi n kpãɛ iju Ninivu. An jɔ̀ sarɛti ku ja igũɛ ŋau a joi a maa ce cua, nɔ aa kpa soogeɛ ŋau iyi à jɛ bɛi ama muusu nla ŋaui si igũ. An leekĩ ile ŋa iyi ì ya maa ce si ilɛui, nɔ a kaa ya gbɔ idei woo bɛɛ ŋau má.