Nahumu 1 - Bibeli do fee

¹ Ide iyi walii Nahumu í fɔ si gãmɛi inɛi ilui Ninivu ŋa. Ilaaɔ̃i í sɔ̃ walii Nahumu inɛi ilui Elikɔsu ideu ihɛ̃ si kuyɛ nɔ í kɔɔ si tia.

Idɔɔkɔ̃i Aɔ̃ Lafɛ̃ɛ do jiida ku jɛɛ

² Aɔ̃ Lafɛ̃ɛ í jɛ Ilaaɔ̃ iyi í nɛ kubi, nɔ kù bi inɛɛ ŋa a maa tɔɔ iwɛ̃ ŋa. Inɛ ŋa iyi à waa ce ide ku kɔ̀ si wajuɛ, í ya sã nŋa gbeseɛi. Idɔɔkɔ̃i Aɔ̃ Lafɛ̃ɛ í gaabu ntɔ ntɔ. Mii iyi mbɛɛɛ ŋa à cea, í ya sã nŋa gbeseɛi. Kugaabuɛ í ya wa si mbɛɛɛ ŋaui.

³ Aɔ̃ Lafɛ̃ɛ í nɛ temua. Gbugbãɛ í la ntɔ ntɔ. Inɛ iyi í ce taale, Aɔ̃ Lafɛ̃ɛ ci ya maa cɔɔ bɛi inɛ iyi kù nɛ taale. Bii Aɔ̃ Lafɛ̃ɛ wa nɛ, fufu nla nlai í ya dede. Kudũi ijĩ í ya dedei bɛi ilulu bii wa nɛ.

⁴ Aɔ̃ Lafɛ̃ɛ í ya la si inyii tenkui nɔ ku gbɛ. Í ya jɔ̀ inyii ido nla ŋa fei a gbɛi. Nɔ Basãa bi ku jɛi mɛɛmu ŋa do lɔɔmai Kaamɛli ŋau fei à ya gbɛi. Kokoi jĩi ndii Libãa ŋau fei à ya gbɛi.

⁵ Í ya jɔ̀ iri kuta ŋa a yagai nɔ geete ŋa mɔ a lɛgɛ. Í ya jɔ̀ ilɛ ku yaya, do inɛ ŋa iyi à wa si fei.

⁶ Yooi á yɔkɔ ku leekĩ si wajui Aɔ̃ Lafɛ̃ɛ waati iyi idɔɛ í kɔ̃. Yooi á yɔkɔ ku leekĩ si wajui idɔɔkɔ̃ nla nlaɛ. Idɔɔkɔ̃ɛ í ya fangaai bɛi ina, nɔ í ya lɛgɛ kuta ŋa.

⁷ Aɔ̃ Lafɛ̃ɛ í jɛ inɛ ncɛɛ. Nŋui í jɛ bi ku manji jiida si ajɔi wahala. Í mà inɛ ŋa iyi à ba bi ku manji bi tɛɛ

⁸ si waati iyi wahala nla nla á naa. Amma á ce nfei mbɛɛɛ ŋa, nɔ ku lele ŋa ku bɔò ŋa hee si bi kuwai iku ŋa.

Laabaau ŋa iyi à jɛ ti Zudaa do ti Ninivu

⁹ Iŋɛ inɛi Zudaa ŋa, bɛirei ì waa cɔ Aɔ̃ Lafɛ̃ɛ ŋa. Nŋui á ce nfei mbɛɛ nŋɛ ŋa, nɔ a kaa wahala ŋɛ isɛ gbeejisia má.

¹⁰ Baa bii í jɛ à yɛ bɛi agũ ŋa iyi à tɔtɔɔ inya akã nkpɔ nkpɔ, aŋa iyi à ya mɔ atɛ̃ nŋa hee kú maa kpa ŋa, aa ce nfe nŋai mam mam bɛi ina í ya cea fɔfɔ ngbɛ.

¹¹ Ninivu, hai bi titɛɛi inɛ iyi wa ce sɔɔlui laalɔ si gãmɛi Aɔ̃ Lafɛ̃ɛ í fita. Inɛɛu í nɛ lasabui laalɔ ŋa ku ce.

¹² Amma Aɔ̃ Lafɛ̃ɛ í sɔ̃ inɛi Zudaa ŋa í ni, baa bii í jɛ mbɛɛ nŋɛ ŋau à kpɔ nɔ à nɛ gbugbã, aa ce nfei, baa inɛ akã kaa gbe. Ǹ tako ǹ jɔ̀ ì yɛ anyɔ ŋa tã wo, amma n kaa n jɔ̀ i yɛ anyɔu má ŋa.

¹³ Nsɛiu ihɛ̃ bɛbɛi, aso iyi à jɔ̀ wa wɔ̀ ŋɛu, an sɔ nŋɛ asoui, nɔ n fũ sesee iyi à dĩ ŋɛ dou.

¹⁴ Iŋɛ inɛi ilui Ninivu ŋa, mii iyi Aɔ̃ Lafɛ̃ɛ í dasi idɔ nŋu ku ce si gãmɛ nŋɛ wee. I kaa nɛ tɔku ŋa iyi aa maa kpe ŋa do iri nŋɛ ŋa má ŋa. Si ilei iwɛ̃ nŋɛ ŋa, jĩi iyi ì gbe ŋa í jɛ iwɛ̃ nŋɛ, do isɔ iyi ì yɔ ŋa í jɛ iwɛ̃ nŋɛ, an lɛgɛ ŋai. An ce sɔɔlui balɛ nŋɛ, domi i kù jɛ nkãma má ŋa.