Misee 7 - Bibeli do fee

Kuweeweai Misee

¹ Misee í ni, ǹ nɛ inɔ kufɔ nla nla, ǹ yɛ bɛi inɛ iyi í bɔ isoi jĩi ŋa ku fengee waati iyi à ka isoi jĩi ŋa à tã, nɔ kù ba isoi jĩi kãma kù jɛ, kù nɔ kù ba baa isoi figi gɔ iyi í bi kù jɛ.

² Si ilɛu, inɛ dee dee gɔ kù wɛɛ má, inɛ ŋa iyi à waa too ntɔ ŋa a kù wɛɛ má. Inɛ ku kpai inɛ nkpɔ nŋa fei í mu. Inɛ ŋa à ya maa zamba njɛi.

³ Inɛ ŋau icɛi laalɔ ku cei à mà. Amanlu ŋau do woo kiiti nŋa ŋau à ya maa tilasi inɛ ŋa si amua ŋa ku cei. Inɛ nla nŋa ŋau, binɛ nŋa í fitai gbugbãa, aŋa fei à ce anu akãi ku ba a maa ce iyi à bi.

⁴ Inɛ iyi í daama si inɔ nŋa í yɛi bɛi agũ. Inɛ iyi í jɛ inɛ dee dee si inɔ nŋa í re baa wua ku nɛ agũ. Walii woo degbe ŋau, à sɔ̃ ŋɛ idei ajɔ gɔ iyi á na ku naa, iyi aa ba ijuukpã ŋa, ajɔu í to wa tã mɔm. Nɔ bɛbɛi ì wa si biti ŋa.

⁵ I maà dasi inɛi kɔkɔ nŋɛ naanɛ ŋa. I maà naanɛ baa kpaasi jiida nŋɛ ŋa. Baa aboɛ, maà ya fɔ ide fei si wajuɛ.

⁶ Ama inɛmɔkɔ á ya maa bu baaɛi. Ama inaabo á ya maa ce ide ku kɔ̀ do iyeɛi. Abo à so mɔkɔ mɔ á ya maa ce ide ku kɔ̀ do iyei mɔkɔɛi. Inɛi kpasɛ̃ nŋɛ ŋai aa jɛ mbɛɛ nŋɛ ŋa.

⁷ Amma amu, ikpa bi Aɔ̃ Lafɛ̃ɛi an sinda, siɛi kpãa ku cɔm í wa, nŋui á jɛɛm nɔ ku faabam.

Kpãa ku cɔi inɛ ŋau do kutɔɔ nŋa

⁸ Iŋɛ mbɛɛ nwa ŋa, i maà wɛɛò inɔ didɔ̃ si mii iyi í ba wa ŋa, domi bii à cuku, aa ka dede má. Nɔ baa bii à wa si ilu kuku, Aɔ̃ Lafɛ̃ɛ á má nwa inya.

⁹ Aa ka temuai si idɔɔkɔ̃i Aɔ̃ Lafɛ̃ɛu, si na iyi í jɔ̀ à ce dulum bi tɛɛ. Hee koo to ajɔ iyi á kɔ̀ò wa, ku na wa ntɔ. Nŋui á jɔ̀ ka wa si inya kumá nɔ nŋui á faaba wa na dee dee ku jɛɛ.

¹⁰ Mbɛɛ nwa ŋa aa yɔɔ, nɔ anyɔi á bii ŋa, aŋa iyi à waa ni, iwoi Aɔ̃ Lafɛ̃ɛ nŋɛ í wa. Aa ka yɛ a cukui hee ilɛ, nɔ a tɛɛsɛ ŋa bɛi pɔkɔdɔ si kpãa ŋa.

¹¹ Iŋɛ inɛi Izirɛli ŋa, ajɔ iyi aa teese i ma bindii ilu nla nŋɛu má, ajɔ nŋu bɛi, aa kɔ̃ɔsi kɔɔi ilɛ nŋɛu.

¹² Si ajɔ nŋu bɛ, hai Asiri do hai ilui Ezibiti ŋau, do inɛi kɔkɔi ido nlai Ezibiti ŋau, hee ku bɔ si inɛ ŋa iyi à wa bubaai tenkuu, do inɛ ŋa iyi à wa si inyai iri kuta ŋau, aŋa fei aa baai bi tu ŋɛ.

¹³ Ilɛ mmu ŋa iyi à gbe fei aa ce nfe nŋai, na irii kuce laalɔi inɛ nŋa ŋau.

¹⁴ Aɔ̃ Lafɛ̃ɛ, gbã inɛɛ ŋa iyi à jɛ titɛɛ ŋau wa do goloɛ. Inɛɛ ŋau à wa si inɔ sako nla aŋa akã si aninii jĩi ŋa. Gbã ŋa wa bɛi ì tako ì gbã ŋa si ilɛ jiidai Basãa do Galaadiu.

¹⁵ Ce nwa maamaake ŋa bɛi ì cea bala nwa ŋa si ajɔ iyi ì nya ŋa wa hai ilɛi Ezibitiu.

¹⁶ Dimi mmu ŋa aa yɛ mii iyi ì ceu, nɔ aa dasi biti baa do iyi à nɛ gbugbã fei. A kaa yɔkɔ a fɔ ide na bitiu. Aa cei bɛi dekĩ.

¹⁷ Ilùlùi aa maa ya bɛi njo do mii ku cã ilɛ ŋa. Aa fita wai hai bi kuwa ku nɛ gbugbã nŋau do njo a maa bɔ ikpa bi awɔ Aɔ̃ Lafɛ̃ɛ nwa. Njo á maa mu ŋai nɔ zigi nŋa á maa da na iriɛ.

¹⁸ Iwɛ̃ yoomai í yɛ bɛi awɔ Aɔ̃ Lafɛ̃ɛ, awɔ iyi ì ya kpa idei kurara nɔ ì ya cea inɛɛ ŋa iyi à gbe suurui dulum du ŋa. I ci ya maa mu idei idɔɔkɔ̃ hee do ajɔ fei, domi kubiɛ fei si jiida ku cei í ya wa.

¹⁹ Aa nyi i ce araare nwa má, i kaa kpã wa iju na kurara nwa ŋa má. Aa so dulum du wa ŋa fei i koo i nyɔ ŋai hee si inɔ tenku.

²⁰ Aa nyisi jiida ku jɛɛ iyi ci ya kpaasi si gãmɛi awa tɔkui Zakɔbu ŋa do Aburahamu ŋa, si bɛi ì cea bala nwa ŋau kuwãɛ do kugbasi hai ku kpɛ.