Misee 6 - Bibeli do fee

Aɔ̃ Lafɛ̃ɛ wa yɛ taalei inɛɛ ŋa

¹ I de itĩ i gbɔ ide iyi Aɔ̃ Lafɛ̃ɛ wa sɔ̃ iŋɛ inɛɛ ŋa. I dede i fɔ ide ŋa, i kɔ̀ò ara nŋɛ si wajui iri kuta do geete ŋau ŋa nɔ a gbɔ nŋɛ.

² Iŋɛ iri kuta ŋa, do iŋɛ iyi ì jɛ icu ku nɛ gbugbãi ilɛu, i sotĩ i gbɔ ŋa. Aɔ̃ Lafɛ̃ɛ wa bi ku kiiti inɛi Izirɛli ŋa iyi à jɛ inɛɛ ŋa ku yɛ taale nŋa.

³ Nɔ í bee ŋa í ni, iŋɛ inɛm ŋa, mii ǹ ce nŋɛ. Si mii ǹ gbɛɛji ŋɛ. I jɛɛm wa.

⁴ Amui ǹ nya bala nŋɛ ŋa wa hai ilɛi Ezibiti bii à waa jɛ aru, nɔ ǹ jɔ̀ Moizi do Arɔ̃ɔ do Mariama à gbã ŋa wa.

⁵ Iŋɛ inɛm ŋa, i ye gigii laalɔ iyi Balaki ilaalui Moabu í lasabu ku cea bala nŋɛ ŋa wo, nɔ i ye gigii ide iyi Balamu amai Beɔɔ í jɛɛa wa. Hai Sitimu hee ku naa Giligali, bala nŋɛ ŋa à yɛ jiida ŋa iyi amu Aɔ̃ Lafɛ̃ɛ ǹ ce nŋa.

Mii iyi Aɔ̃ Lafɛ̃ɛ wa bi amanɛ ku ce

⁶ Amua yoomai an bɔò si wajui Aɔ̃ Lafɛ̃ɛ, waati iyi ǹ bɔ ku tɔɔ nŋu Aɔ̃ Lafɛ̃ɛ iyi í wa hee leleu. Ama kɛtɛi komboi adɔ̃ akã ŋai ǹ nɛ n koo n ceaò kuwee ŋa iyi à ya jo si ina fei sãa sãa?

⁷ Kuweei angudã kombo nkpɔ nkpɔi Aɔ̃ Lafɛ̃ɛ í bi? Mà kuweei ikpo tuu nkpɔ nkpɔi í bi. Ama yemmam nii ǹ nɛ n koo n ceaò kuwee ku bɛi ku kpa kuraram do dulum dom ŋa?

⁸ Awɔ amanɛ, à jɔ̀ ì mà mii iyi í jɛ jiida, do mii iyi Aɔ̃ Lafɛ̃ɛ í bi i ce. Í bi i ce mii iyi í tɛ, do mii iyi í jɛ dee dee, nɔ i maa nɛ do ara ku kaye do nŋu Ilaaɔ̃ Lafɛ̃ɛɛ.

Aɔ̃ Lafɛ̃ɛ á kpã woo ce laalɔ ŋa iju

⁹ Aɔ̃ Lafɛ̃ɛ í ba inɛi ilu ŋau ide ku fɔ. Á faaba inɛ ŋa iyi à mà bɛɛrɛɛ. Iŋɛ inɛi Zudaa ŋa iyi ì tɔtɔɔ si inɔ iluu, i de itĩ i gbɔ ŋa.

¹⁰ N kaa n jɔ̀ kpasɛ̃i inɛ laalɔ ku maa kɔ̃ do amani iyi í ba wa do zamba. N kaa n jɔ̀ ku maa ceò gũa iyi kù jɛ dee dee icɛ.

¹¹ An yɛ taalei inɛ ŋa iyi à waa ceò gũa hai jɛ dee dee ŋau icɛ. An kiiti inɛ ŋa iyi à waa ceò kiloo hai jɛ dee dee ŋau icɛ.

¹² Ilu amani ŋau à ya maa taa inɛ ŋa gbugbãi. Inɛi ilu ŋau iboi à ya bi. Nɔ do idei gɛlɛ nŋai à ya maa zambaò inɛ ŋa.

¹³ Na ŋɔi í ce an jɔ̀ wahala ku naa si ŋɛ, nɔ n ce nfe nŋɛ na irii dulum du ŋɛ ŋau.

¹⁴ I kaa ya jɛ i yo ŋa, nɔ iyi bɛi á ya bí nŋɛ bitandi si inɔ nŋɛ. Kosĩa iyi ì jilɛ kaa ya to ŋɛ, nɔ iyi ì jilɛu ŋa, an jɔ̀ a ce nfeɛi si igũ.

¹⁵ Aa gbɛ̃ amma i kaa da ŋa, aa fɔ̃ isoi jĩi ndii olivi nŋɛ ŋa, amma i kaa ba ikpo ŋa. Aa fɔ̃ isoi jĩi ndii rezɛ̃ɛ nŋɛ ŋau, amma i kaa ba vɛ̃ɛ ŋa.

¹⁶ Ikɔi ilaalu Ɔmurii ì ya maa gbɔ ŋa, nɔ ì ya maa too si ikɔ do kucei amaɛ Akabu do ti inɛi kpasɛ̃ɛ ŋau ŋa. Na ŋɔi í ce an fũsi ŋɛ awɔ a ce nfe nŋɛ. An jɔ̀ a tɛɛsɛ ŋɛi i jɛ dɔ̃anyi ŋa, nɔ iŋɛi aa yɛ anyɔi inɛm ŋau ŋa.