Misee 5 - Bibeli do fee

Betelehɛmu ilui ilaalu woo faabau

¹ Ŋɔi Aɔ̃ Lafɛ̃ɛ í ni, awɔ Betelehɛmu iyi ì wa si ilɛi Efarata, awɔ iyi ì jɛ ilu keeke si ilɛi Zudaa, hai bi tɛɛi an jɔ̀ inɛ iyi á gbã inɛi Izirɛli ŋa do irim ku fita, nŋu iyi í wɛɛ hai ku kpɛ.

² Na ŋɔi í ce, Aɔ̃ Lafɛ̃ɛ á fũsi inɛɛ ŋa awɔ hee koo to waati iyi abo iyi á bí amau ku bí, nɔ inɛɛ ŋa iyi à gbe à wɛɛ si hunde ilɛ mmu a baa a na a tɔtɔɔ do inɛi Izirɛli ŋau.

³ Inɛ iyi à cea inɛ ŋa kuwãɛu á dedei ku maa gbã ŋa do gbugbãi Aɔ̃ Lafɛ̃ɛ do yiikoi irii Aɔ̃ Lafɛ̃ɛɛ. Nɔ aa wɛɛi si laakai ku sũ, domi hai waati bɛɛbɛ, amboeɛ á fangaai hee kɔɔi andunya fei.

⁴ Nŋui á jɔ̀ laakai ku sũ ku wɛɛ nŋa. Bii inɛi Asiri ŋa à naa si ilɛ nwa, waati iyi aa lɔ si kabai bomma nwa ŋa, aa ka jɔ̀ inɛ ngbo nkpɔ nkpɔ nwa ŋa a dede si ŋa.

⁵ Aa gbã inɛi Asiri ŋaui do taakuba, nɔ aa tɛɛsɛ inɛi Nimirodu ŋai mam mam. Inɛ iyi á maa gbã waui á nya wa hai si awɔi inɛi Asiri ŋa bii à naa si ilɛ nwa nɔ à bii si ilɛu.

Inɛi Izirɛli ŋa iyi à wa si inɔi dimi mmu ŋa

⁶ Tɔkui Zakɔbu ŋa iyi à ba à fita si nɔ à wa si inɔi dimi nkpɔ nkpɔu, aa yɛ bɛi ikpã iyi wa naa hai bi Aɔ̃ Lafɛ̃ɛ, do bɛi ijĩ iyi wa wɔ kpɛlɛ kpɛlɛ si fɔfɔ ŋa. Kaaba nŋa kù wa si amanɛ, nɔ a kù waa cɔ siɛ nkãma.

⁷ Tɔkui Zakɔbu ŋa iyi à ba à fita si nɔ à wa si inɔi dimi nkpɔ nkpɔu, aa yɛi bɛi muusu nla si inɔi mɛɛmui sako ŋa, walakɔ bɛi ama muusu nla si inɔi angudã ŋa. Bii wa lɔ fei, í ya foi ku bata mɛɛmu ŋa ku maa ŋɔ ŋa, nɔ inɛ gɔ kù wɛɛ iyi á gba ŋa.

⁸ Iŋɛ tɔkui Zakɔbu ŋa, i dede si mbɛɛ nŋɛ ŋa, nɔ i kpa ŋa fei ŋa.

Aɔ̃ Lafɛ̃ɛ á kpa ilu ibo ŋau fei

⁹ Aɔ̃ Lafɛ̃ɛ í ni, ajɔ wa naa si bii an kpa acĩ nŋɛ ŋau, nɔ n jɔ̀ sarɛti ku ja igũ nŋɛ ŋau fei a ce nfe.

¹⁰ An ce nfei ilui ilɛ nŋɛ ŋaui, nɔ n lɛgɛ inya ku nɛ gbugbã nŋɛ ŋau fei.

¹¹ An ce nfei mii ŋa iyi ì ya ceò dobu dobu ŋaui, nɔ si ilɛu i kaa nɛ woo ce alisi kãma gɔ má ŋa.

¹² An lɛgɛ iwɛ̃ nŋɛ ŋa do kuta ŋa iyi ì gũ ŋau ŋa. Nɔ do yaase bɛɛbɛ, i kaa gulɛ si wajui mii ŋa iyi ì ce do awɔ nŋɛ i maa tɔɔ ŋa má ŋa.

¹³ An tu jĩi ŋa iyi i gũ ŋa na iwɛ̃ nŋɛ iyi à ya kpe Aseraui nɔ an lɛgɛ ilu nŋɛ ŋaui.

¹⁴ Do idɔɔkɔ̃ nla nlai an dede si dimi ŋa iyi à kɔ̀ ku gbɔ idem n sã nŋa gbesei ide ku kɔ̀ nŋa.