Misee 4 - Bibeli do fee

Zeruzalɛmu á na ku wɛɛò laakai ku sũ

¹ Awaati wa naa iyi iri kuta si bii kpasɛ̃i Aɔ̃ Lafɛ̃ɛ í wau, á na ku gboka ku re iri kuta ŋa fei. Á wai hee antaii geete ŋa fei, nɔ inɛ ŋa aa ya naa bɛ mái nkpɔ nkpɔ.

² Ntɔ ntɔ inɛi ilɛ nkpɔ nkpɔi á maa koo bɛ nɔ aa sɔ̃ njɛi a maa ni, i naa wa ŋa ka gũ iri kutai Aɔ̃ Lafɛ̃ɛ tengi bii kpasɛ̃i Aɔ̃ Lafɛ̃ɛi tɔkui Zakɔbu ŋau í wa. Tengi bɛi á kɔ wa si kpãaɛ ŋa, do bɛi aa ka tooɛ, domi hai Siɔ̃ɔi woodaɛ á fita wa, nɔ hai Zeruzalɛmui ideɛ wa naa.

³ Nŋui á kiiti dimi nkpɔ, nŋui á kiiti dimi ŋa iyi à naa hai jĩijĩ nɔ à nɛ gbugbã. Taakuba nŋa ŋai aa so a ceò sɔɔku ŋa, nɔ kaka nŋa ŋa mɔi aa so a ceò kɔɔma ŋa. Ilɛ gɔ kaa bɔ igũ si ilɛ mmu gɔ má, nɔ inɛ kãma kaa maa kɔkɔ igũ ku ce má.

⁴ Á jɔ̀ inɛ baa yooma fei ku wai si abɛ jĩi ndii rezɛ̃ɛɛ do jĩi ndii figiɛ ŋa do laakai ku sũ. Inɛ gɔ kù wɛɛ iyi á na ku bitandi ŋa. Aɔ̃ Lafɛ̃ɛi lele do ilɛui í fɔ bɛɛbɛ.

⁵ Si bɛi dimi baa yooma fei í ya bi ku maa jirima iwɛ̃ɛi, awa, Aɔ̃ Lafɛ̃ɛ nwai aa ka maa jirima hee do ajɔ fei.

Aɔ̃ Lafɛ̃ɛ í jɛ bomma Zeruzalɛmu

⁶ Ajɔ nŋu bɛ, amu Aɔ̃ Lafɛ̃ɛ an gba inɛ ŋa iyi à mɛɛ à waa sukutɛ ŋa wa. An tɔtɔɔ inɛ ŋa iyi ǹ tako ǹ lele ŋau, aŋa iyi ǹ tako ǹ wahala wo.

⁷ An jɔ̀ inɛ ŋa iyi à ba kumɛɛ à waa sukutɛ ŋau, a fita si. Inɛ ŋa iyi à waa jɛ inɛ njoo si ilɛ mmu, an jɔ̀ a baa a jɛ inɛ ŋa iyi ilɛ nŋa í nɛ gbugbã. Nɔ amu Aɔ̃ Lafɛ̃ɛi an jɛ ilaalu nŋa hai waati bɛɛbɛ hee do ajɔ fei si iri kutai Siɔ̃ɔ.

⁸ Nɔ awɔ iri kutai Zeruzalɛmu mɔ iyi ì yɛ bɛi ile kugboka bii woo degbe angudã í ya gũ, aa ba gbugbã nɔ aa jɛ bomma má.

Laakai ku cɔ iyi í naa si Zeruzalɛmu do faabaɛ

⁹ Nsɛi, na mii í ce ì waa dɔ̃ anu, iŋɛ inɛi Zeruzalɛmu ŋa. Na mii í ce ì waa kakaa do ara kuro bɛi inaabo iyi wa bi ku bí ŋa. I kù nɛ ilaalu má ŋai? Woo kɔ nŋɛ ŋau à kui?

¹⁰ I kakaa, i dɔ̃ anu ŋa, bɛi inaabo iyi wa bi ku bí, domi nsɛi aa fita hai ihɛ̃ ŋa. Inɔ sako ŋai aa koo i wa ŋa. Aa bɔ ŋai hee Babilɔni, amma bɛ, Aɔ̃ Lafɛ̃ɛi á faaba ŋɛ. Aɔ̃ Lafɛ̃ɛi á ya ŋɛ hai si awɔi mbɛɛ nŋɛ ŋa.

¹¹ Nsɛi, dimi nkpɔ nkpɔi í tɔtɔɔ ku ba a dede si ŋɛ, nɔ à waa ni, ka bɛjɛ iluu nɔ ka maa cɔ kucukui Siɔ̃ɔ.

¹² Inɛ ŋau a kù mà lasabu iyi Aɔ̃ Lafɛ̃ɛ í ce, a kù mà mii iyi wa bi ku ce, a kù mà iyi wa bi ku tɔtɔɔ ŋai, bɛi bilee iyi à tɔtɔɔ si inya bii à ya kpokpoɛ.

¹³ Iŋɛ inɛi Siɔ̃ɔ ŋa, i dede i tɛɛsɛ mbɛɛ nŋɛ ŋau ŋa. An jɔ̀ i ba gbugbã ŋai bɛi kɛtɛ ŋa iyi à nɛ ngo ku nɛ gbugbã bɛi isɔ, do kɔwe ku nɛ gbugbã bɛi isɔ nkpa. Dimi nkpɔ ŋau fei aa tɛɛsɛ ŋa ŋai. Aa ko amani nŋa ŋau feii ŋa, nɔ amu iyi ǹ jɛ Aɔ̃ Lafɛ̃ɛi ilɛu fei, amui aa jilɛa ŋa.

¹⁴ Amma nsɛi, i tɔtɔɔ sooge nŋɛ ŋa wa iŋɛ inɛi Zeruzalɛmu ŋa, domi inɛ ŋa à bu wa koe, à mu inɛ ngboi iŋɛ inɛi Izirɛli ŋau, à waa cãa do golo si kɛkɛlɛ.