Misee 3 - Bibeli do fee

Misee í ni inɛ ngbo ŋa a ce laakai

¹ Misee í ni, iŋɛ iyi ì jɛ inɛ ngboi tɔkui Zakɔbu ŋa, iŋɛ woo kiitii inɛi Izirɛli ŋa, i sotĩ i gbɔ ŋa. Aɔ̃ Lafɛ̃ɛ í ni, kù jɛ iŋɛi í sĩa i mà wooda ŋa?

² Ì cé mii iyi í jɛ jiida ŋai, nɔ iyi í jɛ laalɔi ì bi ŋa. Ì ya gba mii iyi inɛ ŋa à nɛ feii ŋa, nɔ ì jɔ̀ ŋa basĩ ŋa.

³ Ì ya bɔ batai inɛm ŋai, nɔ ì ya lɛgɛ kũkũ nŋa ŋai bɛi iŋa iyi à bu à kɛkɛɛ si inɔ caka. Ì ya ŋɔ ŋa ŋai mam mam ŋa.

⁴ Na nŋu, aa dɔ̃ anu si Aɔ̃ Lafɛ̃ɛ ŋa, amma kaa jɛ nŋɛ. Á singa nŋɛ wajuɛi si waatiu bɛ, si na iyi í jɔ̀ ì ce mii laalɔ ŋa.

Misee í ni walii ŋa iyi à waa lɛlɛ inɛ ŋa a ce laakai

⁵ Aɔ̃ Lafɛ̃ɛ í fɔ ide si gãmɛi walii ŋa iyi à ya maa nyɔ inɛm ŋa, í ni, bii à mu nŋa ngɔgɔ, idei laakai ku sũi à ya fɔ. Amma inɛ ŋa iyi a kù mu nŋa ngɔgɔ, idei igũi à ya fɔ.

⁶ Na nŋu, idũ á dũ, i kaa ce kuyɛ kãma má ŋa. Ilu á kuku, nɔ iŋɛ walii ilu ibo ŋau i kaa yɛ nkãma má ŋa. Ilu kuku á bii ŋɛi bɛi waati iyi inunu í lɔ, nɔ i kaa yɛ nkãma má ŋa.

⁷ Woo yɛ ŋau do woo ce alisi ŋau fei, aa dasi anyɔi. Aŋa fei aa maa singa waju nŋai domi Aɔ̃ Lafɛ̃ɛ kaa jɛ nŋa.

⁸ Amma amu Aɔ̃ Lafɛ̃ɛ í jɔ̀ ǹ nɛ gbugbã, ǹ nɛ hundeɛ. Í jɔ̀ ntɔ í wɛɛm nɔ ǹ nɛ wɔɔkɔ. Iyi bɛi á jɔ̀ n yɔkɔ n sɔ̃ tɔkui Zakɔbu ŋa kurara nŋa, n sɔ̃ inɛi Izirɛli ŋa dulum du ŋa.

Misee wa fɔ idei nfe ku cei Zeruzalɛmu

⁹ Iŋɛ inɛ ngboi tɔkui Zakɔbu ŋa, do iŋɛ woo kiitii inɛi Izirɛli ŋa, i sotĩ i gbɔ ŋa, iŋɛ iyi i ci ya bi mii iyi í jɛ dee dee ŋa, iŋɛ iyi ì ya maa bɛjɛ ntɔ ŋa,

¹⁰ ì waa ma ilui Siɔ̃ɔ iyi à ya kpe Zeruzalɛmu do amanii inɛ ŋa iyi ì kpa ŋa do ti inɛ ŋa iyi ì taa gbugbã ŋa.

¹¹ Woo kiiti nŋɛ ŋa, kiiti iyi à waa ce fei do amua hai nɛ yaase ŋai. Woo wee nŋɛ ŋa, ikɔ nŋa do isãi. Walii nŋɛ ŋa, kuyɛ nŋa do fiai. Nɔ à waa ni, awa inɛi Aɔ̃ Lafɛ̃ɛ ŋai, laalɔ kaa ba wa, Aɔ̃ Lafɛ̃ɛ í wɛɛ do awa.

¹² Na nŋu, na iri nŋɛ, Siɔ̃ɔ á yɛi bɛi ilɛ iyi à fa. Zeruzalɛmu á kpɔò bomma. Nɔ bɛɛbɛi iri kuta kumá bii kpasɛ̃i Ilaaɔ̃ í wau á baa ku yɛi bɛi agbo.