Misee 2 - Bibeli do fee

Inɛ ŋa iyi à waa taa inɛ ŋa gbugbã

¹ Inɔ kufɔi á jɛ ti inɛ ŋa iyi à ya nɛ lasabu laalɔ. Idũ bii à waa sũ à ya wɛɛò sɔɔluɛi. Nɔ hai amɛɛjuumá gbakã, à ya cooi bii à ba kpãaɛ.

² Bii à ce binɛi ikoi inɛ ŋa, à ya gbaai. Bii à ce binɛi kpasɛ̃i inɛ ŋa, à ya gbaai. À ya taa ilu kpasɛ̃ do inɛɛ ŋa gbugbãi nɔ mii iyi inɛ ŋau à nɛ fei, à ya kooi.

³ Na ŋɔi í ce Aɔ̃ Lafɛ̃ɛ í ni, cɔ, wee ǹ ce sɔɔlui laalɔ na dimiu bɛ tã. Nɔ i kaa fita si ŋa, i kaa nɔ i nɛ i wu iri lele ŋa, domi awaatii laalɔi á jɛ.

⁴ Ajɔ nŋu bɛ, idei ijuukpãi aa gbɔ à waa fɔ. Inɛ ŋa aa maa kɔ̃ irii inɔ kufɔi na iri nŋɛ, a maa ni, awa à gbe ngbɛ mbɛ mam mam, Aɔ̃ Lafɛ̃ɛ í jɔ̀ à gba ilɛ nwa ŋa fei, nɔ à koo à kpɛ̃a mbɛɛ nwa ŋa.

⁵ Na nŋu, baa inɛ akã nŋɛ kaa ba tubu si ilɛ ŋa iyi aa na a sisi a kpɛ̃a inɛi Aɔ̃ Lafɛ̃ɛ ŋa.

Inɛ ŋa iyi à waa jã idei waliiu

⁶ À sɔ̃m à waa ni, maà fɔ ide nkpɔ, maà fɔ dimii ideu bɛ, nɔ à ni, hai nɛ yaasei, awɔ iyi ì waa ni laalɔu kaa fo iri nwa.

⁷ Iŋɛ tɔkui Zakɔbu ŋa, iŋɛi ì waa fɔ bɛɛbɛ ŋa? Aɔ̃ Lafɛ̃ɛ í mɔngɔ temuai? Bɛɛbɛi í ya ce nwa wo? Ide jiidai ǹ ya n fɔa inɛ ŋa iyi à waa ce isɛɛnɛ iyi í tɛ.

⁸ Amma iŋɛi Aɔ̃ Lafɛ̃ɛ wa sɔ̃ wa ni ì ce inɛi nŋu ŋa mbɛɛ ŋa. Ì mu ŋa, ì bɔ jĩnɛ nŋa ŋa, waati iyi à waa baa hai igũ do naanɛu.

⁹ Aboi inɛm ŋa, ì lele ŋa ŋa hai si kpasɛ̃ iyi à biu. Nɔ ì nya bɛɛrɛi ama nŋa ŋau hee do ajɔ fei ŋa.

¹⁰ I dede i nɛ ŋa, domi ilɛu bɛ kù jɛ inya bii aa sĩmi ŋa na kuriisiɛ. Wahala ŋai á bí nŋɛ, wahala nla nla ŋa.

¹¹ Inɛ ŋau à ya bi inɛ iyi wa fɔ ide si fufu wa sɔ ibo nɔ wa ce ide nkpɔ wa ni, aa ba atɛ̃ vɛ̃ɛ do atɛ̃ ku nɛ gbugbã i mɔ ŋa.

¹² Nɔ Aɔ̃ Lafɛ̃ɛ í ni, ntɔ ntɔ, iŋɛ tɔkui Zakɔbu ŋa, an tɔtɔɔ inɛ nŋɛ ŋa fei wai. An tɔtɔɔ inɛi Izirɛli ŋa iyi à gbeu wai. An tɔtɔɔ ŋɛ wai bɛi angudã ŋa si inɔ aro. An tɔtɔɔ ŋɛ wai bɛi kɛtɛ gaa ŋa iyi à bɔò degbe. Bɛ, aa tɔtɔɔ ŋai nkpɔ nkpɔ nɔ i maa ce wakata ŋa.

¹³ Misee í ni, inɛ iyi í cĩ kpãau, nŋui wa cua nŋɛ do waju, nŋui á cĩ nŋɛ koofau nɔ i fita ŋa, Aɔ̃ Lafɛ̃ɛ nŋɛ iyi í jɛ ilaalu nŋɛu nŋui á maa gbã ŋɛ.