Matie 9 - Bibeli do fee

Jesu í jɔ̀ wɛɛgɛ gɔ í ba iri

¹ Iyi inɛ ŋau à tɔɔɛ ku fita hai ilɛi ide nŋa ŋɔi Jesu í lɔ akɔi inyi í kua icei tenkuu má. Í nɛ ilui nŋu takaɛ.

² Ŋɔi inɛ gɔ ŋa à naa wɛɛgɛ gɔ wa, wa sũ si makɛɛ. Iyi Jesu í yɛ naanɛ ku dasi nŋau, nɔ í sɔ̃ wɛɛgɛu í ni, baakɔɔm, maà ce njo, ǹ kpa idei dulum dɛɛ.

³ Wee woo kɔ inɛ ŋa si wooda gɔ ŋa à wa bɛ. Iyi à gbɔ wa fɔ bɛɛbɛ ŋɔi à waa lasabu si idɔ nŋa à waa ni, inɛɛu ihɛ̃ wa bu Ilaaɔ̃i.

⁴ Jesu í bɛi í mà ide iyi à waa lasabu. Ŋɔi í ni, na mii í ce ì waa ce lasabu laalɔ bɛɛbɛ ŋa.

⁵ Si ide minji ŋau ihɛ̃, yoomai kufɔɛ í faala í re, inɛ ku sɔ̃ inɛ gɔ ku ni nŋu í kpa idei dulum dɛɛ, walakɔ ku ni ku dede ku nɛ.

⁶ Amma ǹ bi i mà ŋa iyi amu Amai Amanɛ ǹ nɛ gbugbã n kpa idei dulum dii inɛ ŋa si andunya. Iyi í fɔ bɛɛbɛ í tã ŋɔi í sɔ̃ wɛɛgɛu í ni, dede i so makɛɛɛ i bɔ kpasɛ̃.

⁷ Ŋɔi wɛɛgɛu í dede í nɛ ideɛ.

⁸ Wee inɛ nkpɔ nkpɔi í wa bɛ. Iyi à yɔɔ bɛɛbɛ ŋɔi njo í mu ŋa à waa saabu Ilaaɔ̃ do iyi í na amanɛ dimii yiikou bɛ.

Jesu í kpe Matie

⁹ Ŋɔi Jesu í dede hai bɛ í bɔ inɔ iluu. Iyi wa nɛ, ŋɔi í yɛ mɔkɔ gɔ iyi à ya kpe Matie wa buba ile bi ku gba fiai lɛmpoo. Ŋɔi í sɔ̃ɔ í ni, toom wa. Nɔ Matie í dede í tooɛ.

¹⁰ Si anyiɛ Jesu wa jɛ kpasɛ̃i mɔkɔu. Ŋɔi woo gba fiai lɛmpoo do inɛ nkpɔ gɔ ŋa má iyi kuwɛɛ nŋa kù sĩa à naa à buba bi Jesu do mɔcɔɛ ŋau.

¹¹ Wee Farisi gɔ ŋa à yɛ ŋa, nɔ à bee mɔcɔɛ ŋau à ni, na mii í ce Mɛɛtu nŋɛ wa jɛ do woo gba fiai lɛmpoo do inɛ laalɔ ŋa.

¹² Iyi Jesu í gbɔ ide nŋau ŋɔi í ni, ilu baani ŋa a kù nɛ bukaatai ilu iwɔ bii kù jɛ bɔ̃ɔ ŋa.

¹³ Ǹ wa n sɔ̃ ŋɛi, n kù naa ku kpe inɛ dee dee ŋa, amma ilu dulum ŋai ǹ naa ku kpe. I koo i bee yaasei kukɔu iyi í ni, Ilaaɔ̃ í ni, ǹ bi i ce araarei njɛ ŋa i re i ceem kuwee.

Idei anu ku dĩ

¹⁴ Wee Zãa woo dasi inyiu mɔ í nɛ mɔcɔ ŋa. Mɔcɔɛ ŋau à naa bi Jesu nɔ à beeɛ à ni, na mii í ce awa do Farisi ŋau à ya ka dĩ anu amma awɔ, mɔcɔɛ ŋa a ci ya dĩ anu.

¹⁵ Nɔ Jesu í jɛ nŋa í ni, kpaasii mɔkɔ titɔ̃ ŋa aa nɛ inɔ kufɔ gɔ waati iyi mɔkɔ titɔ̃u í wa inɔ nŋai? Aawo, amma ajɔ gɔ wa naa iyi aa nya mɔkɔ titɔ̃u hai si inɔ nŋa. Waati bɛɛbɛi aa dĩ anu.

¹⁶ Ŋɔi í kpa nŋa mɔnda í ni, inɛ gɔ kaa sɔ jaaɛ ngbo do titɔ̃ɛ ku tɔtɔɔɛ. Bii í ce bɛɛbɛ, titɔ̃u á ga jaaɛ ngbou ku kɔ̃ɔsi.

¹⁷ Bɛɛbɛ mɔi a ci ya dasi vɛ̃ɛ titɔ̃ iyi wa gba si bɔgɔ bata ngbo ŋa. Bii ì ce bɛɛbɛ, bɔgɔ bata ngbo ŋau aa gai, nɔ vɛ̃ɛu ku nikã, bɔgɔ ŋau mɔ a ce nfe. À ya dasi vɛ̃ɛ titɔ̃i si bɔgɔ titɔ̃ ŋa. Baa bii wa gba, bɔgɔu kaa ga.

Idei ama inaaboi Zairusi do inaabo iyi í lu ibɔi Jesu

¹⁸ Si waati iyi Jesu wa sɔ̃ ŋa ideu ihɛ̃, ŋɔi inɛ ngbo gɔ í naa í sɛɛbata si wajuɛ í ni, ama inaabom wee í ku nsɛi nsɛi, amma naa i lesiɛ awɔ ku jĩ má.

¹⁹ Nɔ Jesu í dede do mɔcɔɛ ŋa à too mɔkɔu.

²⁰ Waati iyi à dasi kpãa à waa nɛ, inaabo gɔ wa too ŋa. Abou wa ce bɔ̃ɔi awɔ ku mu hai adɔ̃ maateeji wa. Ŋɔi í bɔ do anyii Jesu í koo í lu itĩi ibɔɛ.

²¹ Í ce bɛɛbɛi si na iyi í jɔ̀ í fɔ si idɔɛ í ni, baa bii ibɔɛi ǹ ba ǹ lu an ba iri.

²² Ŋɔi Jesu í sinda í cɔɔ nɔ í ni, abooyi, maà ce njo, naanɛɛi í faabaɛ. Bɛ gbakã abou í ba iri.

²³ Ŋɔi Jesu í mɔsi isɛɛnɛɛ í to kpasɛ̃i inɛ ngbou í yɛ woo fã gaasiai iku ŋa do zamaa nla nla gɔ wa dɔ̃ anu.

²⁴ Nɔ í ni, i fita hai ihɛ̃. Ama inaabou kù ku, wa sĩ njooi. Nɔ à waa yaakoɛ.

²⁵ Ŋɔi Jesu í jɔ̀ inɛ ŋau à fita nɔ í lɔ í mu awɔi mudɛ̃ɛu nɔ í dede.

²⁶ Nɔ laabaaui ideu í fangaa si ilɛu fei.

Jesu í jɔ̀ fɛɛju minji gɔ ŋa à yɛ ilu

²⁷ Nɔ Jesu í nɛ hai bɛ. Si isɛɛnɛɛu fɛɛju minji gɔ ŋa à tooɛ à waa dɔ̃ siɛ anu, à waa ni, tɔkui ilaalu Davidi, ce araare nwa i jɔ̀ ka yɛ ilu.

²⁸ Ŋɔi Jesu í nɛ hee í to kpasɛ̃. Nɔ fɛɛju ŋau à naa bi tɛɛ nɔ í bee ŋa í ni, ì dasi naanɛ ŋa iyi an yɔkɔ n coo? Nɔ aŋa mɔ à ni, oo, Lafɛ̃ɛ.

²⁹ Nɔ Jesu í lu iju nŋau í ni, ku ce nŋɛ si bɛi ì dasi naanɛu ŋa.

³⁰ Nɔ à yɛ ilu. Nɔ Jesu í sɔ̃ ŋa í kɔnkɔn du ŋa í ni, i gbɔ ŋa, i maà sɔ̃ inɛ gɔ ideu ihɛ̃.

³¹ Amma iyi à sɛkɛɛ gbakã à lɔsi laabaaui Jesuu ku sisi si ilɛu fei.

Jesu í jɔ̀ dekĩ gɔ í fɔ ide

³² Nɔ Jesu do mɔcɔɛ ŋa à nɛ hai bɛ, ŋɔi à naa Jesu inɛ gɔ wa. Inɛɛu inɛi inɔɔko dekĩ gɔ í muu.

³³ Nɔ Jesu í lele inɛi inɔɔkou. Iyi í leleɛ gbakã nɔ mɔkɔu í lɔsi ide ku fɔ. Inɛ ŋa à biti à wasi ku ni, a kù yɛ dimiɛ si ilɛi Izirɛli ajɔ kãma.

³⁴ Amma Farisi ŋau à ni, Seetam ilaalui inɛi inɔɔko ŋaui í muaa gbugbã ku leleò ŋa.

Jesu í ce araarei inɛ ŋa

³⁵ Jesu wa dabii dabii si ilu nla ŋa do si ilɛɛko ŋa, wa kɔ inɛ ŋa si cio ile bii Zuifu ŋa à ya ce kutɔtɔɔ nŋa ŋa, nɔ wa sisi laabaau jiidai bommai Ilaaɔ̃ nɔ í jɔ̀ bɔ̃ɔ ŋa do kɔ̃ɔ ŋa fei à ba iri.

³⁶ Iyi í yɛ zamaau, araare fei í muu, domi à wɛɛ do biti, inɔ nŋa fei í fɔ, à wɛɛ nŋa bɛi angudã ŋa iyi a kù nɛ woo degbe.

³⁷ Ŋɔi í sɔ̃ mɔcɔɛ ŋa í ni, amaajɛ iyi í jĩa í to ku da í kpɔ, amma woo da ŋau a kù kpɔ.

³⁸ Na nŋu, i tɔɔ ilu ikou ku bɛ woo da ŋa wa má.