Matie 8 - Bibeli do fee

Jesu í jɔ̀ dintɛ gɔ í ba iri

¹ Jesu í sɔ̃ ŋa ide ŋau ihɛ̃ feii í bɛi wa kita wa hai si antaii iri kutau. Waati iyi í kita wa ŋɔi zamaa nla gɔ wa tooɛ.

² Nɔ dintɛ gɔ í naa í sɛɛbata si wajuɛ í ni, Lafɛ̃ɛ, bii ì bi, aa yɔkɔ i jɔ̀ n ba iri n jɛ inɛ iyi í maaju.

³ Ŋɔi Jesu í yɔ awɔɛ í luu nɔ í ni, ǹ bi. Ba iri nɔ i jɛ inɛ kumaaju. Bɛ gbakã í ba iri hai si bɔ̃ɔɛu.

⁴ Nɔ Jesu í sɔ̃ɔ í ni, gbɔ, maà sɔ̃ inɛ gɔ ideu ihɛ̃, amma koo nyisi araɛ bi woo weei Ilaaɔ̃u, nɔ i ce kuwee iyi Moizi í jilɛu. Kuweeu bɛi á nyisi inɛ ŋa iyi ì jɛ inɛ iyi í má bɛbɛi.

Jesu í jɔ̀ amaacɛi inɛ ngboi sooge gɔ ŋa í ba iri

⁵ Ŋɔi Jesu í bɔ Kapɛranumu. Waati iyi í lɔ inɔ iluu ŋɔi inɛ ngboi sooge cĩɔ gɔ í koo í tɔɔɛ ku faaba nŋu,

⁶ í ni, Lafɛ̃ɛ, amaacɛm wa ce bɔ̃ɔ kpasɛ̃, ci ya yɔkɔ ku dede nɔ wa kpãa iju ntɔ ntɔ.

⁷ Ŋɔi Jesu í ni, í sĩa, an koo n faabaɛ.

⁸ Amma inɛ ngboi sooge ŋau í jɛaa í ni, Lafɛ̃ɛ, n kù to i lɔ kpasɛ̃m. Baa hai ihɛ̃ fɔ ide, amaacɛm nɔu á ba iri.

⁹ Amu takam, ǹ nɛ inɛ ngbo ŋa iyi ǹ wa n jirima, nɔ ǹ nɛ sooge gɔ ŋa mɔ iyi ǹ wa n gbã. Inɛ akã nŋa iyi ǹ bɛ á kooi, inɛ iyi ǹ kpe mɔ á naai, nɔ icɛ iyi ǹ ni amaacɛm ku ce nŋui í ya ce.

¹⁰ Iyi Jesu í gbɔ ideu í biti nɔ í sɔ̃ inɛ ŋa iyi à waa tooɛu í ni, ntɔ ntɔ, baa si inɔi inɛi Izirɛli ŋa fei n kù yɛ inɛ iyi í yɔkɔ í dasim naanɛ nla bɛi inɛɛu ihɛ̃.

¹¹ An sɔ̃ ŋɛ, hai jɛ Zuifu nkpɔ á na ku naa hai do bii fei a buba si bommai Ilaaɔ̃. Aŋai aa jɛ do Aburahamu do Izaaki do Zakɔbu bala nŋɛ ŋa ajɔ.

¹² Amma iŋɛ, tɔku nŋa ŋa iyi í jɔ iŋɛò ŋa i wa bɛ aa nyɔ ŋɛ angule si ilu kuku. Tengi bɛi aa lesi awɔ si iri i maa kpataò ŋa.

¹³ Nɔ Jesu í sɔ̃ inɛ ngboi sooge ŋau í ni, bɔ kpasɛ̃ɛ. Fei ndɛɛ á ce si bɛi ì dasi naanɛu. Bɛ gbakã amaacɛu í ba iri.

Jesu í jɔ̀ bɔ̃ɔ nkpɔ í ba iri

¹⁴ Si anyiɛ, Jesu í bɔ kpasɛ̃i Piɛɛ, í koo í ba iyei aboi Piɛɛ kù waa nɛ baani, wa sũò ara gbãa.

¹⁵ Ŋɔi Jesu í lu awɔɛ nɔ ara gbãau í nya. Nɔ abou í dede í yaaɛ.

¹⁶ Iyi alɛ í lɛ, à naa Jesu inɛ ŋa iyi à nɛ inɛi inɔɔko ŋa wa nkpɔ nkpɔ. Nɔ í lele inɛi inɔɔko ŋau do ide ku fɔ, nɔ inɛ ŋa iyi à waa ce bɔ̃ɔ fei í jɔ̀ à ba iri.

¹⁷ Í ce nŋu ŋau bɛi ku ba ide iyi walii Ezai í fɔu ku kɔ̃ iyi í ni, nŋu takaɛ í so gbugbã hai nɛ nwa nɔ í nya bɔ̃ɔ nwa ŋa.

Inɛ ŋa iyi à bi Jesu ku too

¹⁸ Ajɔ nŋu gɔ, zamaa nla gɔ í kaako Jesu. Iyi Jesu í yɛ ŋa ŋɔi í sɔ̃ mɔcɔɛ ŋau í ni aŋa a bɔ icei tenkuu do ikpa ihɔ̃.

¹⁹ Hee a maa nɛ ŋɔi woo kɔ inɛ ŋa si wooda gɔ í naa bi tɛɛ nɔ í ni, Mɛɛtu, an tooɛ bii ì waa bɔ fei.

²⁰ Nɔ Jesu í sɔ̃ɔ í ni, mɛɛmu ŋa à nɛ kolo ŋa nɔ baa yɛi ŋa mɔ à nɛ bi ku sũ. Amma amu Amai Amanɛ n kù nɛ bii an koo n sũ n sĩmi.

²¹ Nɔ inɛ akãi mɔcɔi Jesu gɔ mɔ í ni, Lafɛ̃ɛ, jɔ̀ n koo n si baam wa titã.

²² Amma Jesu í jɛaa í ni, awɔ de toom wa, nɔ i jɔ̀ iku ŋa a si iku nŋa ŋa.

Jesu í leekĩ fufu si tenku

²³ Si anyii nŋu, Jesu í lɔ akɔi inyi nɔ mɔcɔɛ ŋa mɔ à lɔ à tooɛ.

²⁴ Iyi à waa nɛ ŋɔi fufu nla gɔ í dede si tenkuu hee kutãngãm dii inyiu wa bii akɔu. Amma Jesu wa sĩ njoo.

²⁵ Ŋɔi mɔcɔ ŋau à koo à jũu à ni, Lafɛ̃ɛ, faaba wa, à waa bɔ nfe ku ce.

²⁶ Ŋɔi Jesu í sɔ̃ ŋa í ni, naanɛ ku dasi nŋɛ kù la. Na mii í ce ì jɔ̀ njo wa mu ŋɛ ŋa. Iyi í fɔ bɛɛbɛ í tã, ŋɔi í dede í la si inyiu do fufuu nɔ à coko sɔ̃m sɔ̃m.

²⁷ Nɔ mɔcɔ ŋau fei à biti à waa ni, inɛ dimi yoomai ihɛ̃. Baa inyi do fufu ŋa fei à waa jirima ideɛ.

Jesu í lele inɛi inɔɔko ŋa hai si inɛ minji gɔ ŋa

²⁸ Iyi Jesu í to icei tenkuu do ikpa ihɔ̃ si ilɛi Gadara, ŋɔi amanɛ minji gɔ ŋa à fita wa hai bi ku si iku ŋa à kòo wa. Inɛ ŋau à nɛ inɛi inɔɔko kugaabu ntɔ ntɔ hee í jɔ̀ inɛ gɔ ci ya jɛ ku too kpãau.

²⁹ Nɔ à dɔ̃ anu à ni, mii í wa si gãmɛi awaɛ ŋa, awɔ Amai Ilaaɔ̃. Ì naa ku kpã wa iju hai waatiu kù toi?

³⁰ Nɔ à hɔ̃nnɛ kuusɔɔ gaa nla nla gɔ ŋa waju à waa jɛ.

³¹ Nɔ inɛi inɔɔko ŋau à tɔɔ Jesu à ni, bii ì waa lele wai, jɔ̀ kaa mu kuusɔɔ gaa ŋau ihɔ̃.

³² Ŋɔi Jesu í sɔ̃ ŋa í ni a koo. Nɔ à fita hai si inɛ ŋau à koo à mu kuusɔɔ ŋau. Nɔ kuusɔɔ gaa ŋau fei à sɛi wa hai antaii iri kutau à na à dasi tenkuu, inyi í jɛ ŋa.

³³ Woo degbe kuusɔɔ ŋau à sa à nɛ inɔ ilu à koo à sisia inɛ ŋa ideu fei do bɛi à cea inɛ minji ŋau.

³⁴ Nɔ inɛi inɔ ilu ŋau fei à fita à bɔ Jesu ku cɔ. Iyi à koo à yɔɔ ŋɔi à tɔɔɛ ku fita hai ilɛi ide nŋa.