Matie 7 - Bibeli do fee

Idei kiiti

¹ Jesu wa fɔ má í ni, i maà ya kiiti inɛ ŋa ku ba Ilaaɔ̃ mɔ ku maà kiiti ŋɛ.

² Ntɔ ntɔ, ǹ wa n sɔ̃ ŋɛi, do yaase bɛi ì ya maa kiiti inɛ ŋa, bɛɛbɛ mɔi Ilaaɔ̃ mɔ á na ku kiiti ŋɛ. Nɔ si gũa bii ì wãaò inɛ ŋa, si bɛ mɔi aa wãa iŋɛ mɔ.

³ Na mii í ce ì waa yɛ fɔfɔ keeke iyi í wa si ijui kpaasiɛ nɔ i kù yɛ jĩi ite iyi í wa si titɛɛ.

⁴ Bɛirei aa ce i sɔ̃ kpaasiɛ i ni, jɔ̀ n nyaɛ fɔfɔ si ijuɛ, awɔ iyi jĩi ite í wa si tɛɛ.

⁵ Awɔ ilu muafitii, jɔ̀ i tako i nya jĩi ite iyi í wa si ijuɛ titã ku ba i yɛ ilu sãa sãa, i bɛi i nya fɔfɔ iyi í wa si ijui kpaasiɛ.

⁶ I maà nyɔ lɛgɛ jiida nŋɛ ŋa si wajui kuusɔɔ ŋa ku ba a maà tɛɛsɛɛ. Nɔ i maà ti i na aja ŋa mii kumá ŋa ku ba a maà na a sinda a ŋɔ ŋɛ.

Idei kutɔɔ

⁷ Jesu í ni má, i ya tɔɔ ŋa, aa mu nŋɛ. I ya dɛdɛ ŋa, aa ba ŋa. I ya cã gambo ŋa, aa cĩ nŋɛ.

⁸ Ntɔ ntɔ, inɛ iyi wa tɔɔ fei, aa muaa. Inɛ mɔ iyi wa dɛdɛ fei, á ba. Inɛ mɔ iyi wa cã gambo fei, aa cĩa lafɛ̃ɛ.

⁹ Yooi í wa si inɔ nŋɛ ihɛ̃ iyi bii amaɛ í tɔɔɛ pɛ̃ɛ á so kuta ku naa.

¹⁰ Bɛɛbɛ mɔi inɛ kãma kù wɛɛ iyi bii amaɛ í tɔɔɛ cɛ̃ɛ á so njo ku naa.

¹¹ Debɛi, bii iŋɛ iyi ì ya ce laalɔ ŋa ì mà mii jiida ku na ama nŋɛ ŋa, ì waa tamaa mà Baa nŋɛ iyi í wa lele kaa mua inɛ ŋa iyi à waa tɔɔɛ mii jiida ku re bɛɛbɛ ŋa?

¹² Na nŋu, mii iyi ì bi inɛ ŋa a ya ce nŋɛ fei, iŋɛ mɔ i ce nŋa bɛɛbɛ ŋa, domi iyi bɛi í jɛ icui idei kukɔsii walii ŋau do ti woodai Moizi ŋa.

Andɛ iyi kù cĩ

¹³ Í sɔ̃ ŋa má í ni, koofa nla do kpãa ku cĩ gɔ í wɛɛ, do minjisia ku mongolo gɔ iyi wa bɔ ala nwa. I lɔ do koofa ku mongolou ŋa, domi koofa nlau do kpãa ku cĩu, bi ikui wa bɔ, nɔ inɛ nkpɔi wa too do bɛ.

¹⁴ Amma kpãa iyi wa bɔ bi kuwɛɛ hai tã í mante, andɛɛ kù cĩ. Nɔ inɛ ŋa iyi à yɛ kpãau à waa tooɛ a kù kpɔ.

Idei jĩi do isoɛ

¹⁵ Jesu í ni má, i ya ce laakai ŋa do walii ilu ibo ŋa. À ya naa bi tu ŋɛi bɛi angudã ŋa, amma idɔ nŋa í yɛi bɛi idɔi mbo ŋa.

¹⁶ Aa yɔkɔ i mà ŋa ŋai si kookoosu nŋa ŋa bɛi à ya mà jĩi hai si isoɛ. A ci ya ka isoi rezɛ̃ɛ si agũ. Nɔ a ci ya ka figi si agũ fũfũ.

¹⁷ Jĩi jiida fei iso jiidai í ya so, nɔ jĩi laalɔ mɔ ku so iso laalɔ.

¹⁸ Jĩi jiida kaa yɔkɔ ku so iso laalɔ, bɛɛbɛ mɔi jĩi laalɔ kaa yɔkɔ ku so iso jiida.

¹⁹ Nɔ jĩi iyi kù waa so iso jiida fei à ya daai a dasi ina.

²⁰ Si bɛi à ya mà jĩi hai si isoɛ, bɛɛbɛ mɔi aa mà walii ilu ibo ŋa hai si kookoosu nŋa.

N kù mà ŋɛ ajɔ kãma

²¹ Jesu í ni má, kù jɛ inɛ iyi wa kpem Lafɛ̃ɛ Lafɛ̃ɛ feii á na ku lɔ si bommai Ilaaɔ̃, bii kù jɛ inɛ ŋa iyi à waa ce idɔɔbii Baam iyi í wa lele.

²² Ajɔ nŋu bɛ, inɛ nkpɔi á maa ni, Lafɛ̃ɛ Lafɛ̃ɛ, a kù ce walii do iriɛ? A kù lele inɛi inɔɔko ŋa do iriɛ? A kù ce maamaake nkpɔ do iriɛ?

²³ Amma an sɔ̃ ŋa si wajui inɛ fei n ni, n kù mà ŋɛ ajɔ kãma. I sɛkɛɛ hai bi tom iŋɛ woo ce laalɔ ŋa.

Idei woo ma ile minji gɔ ŋa

²⁴ Jesu í kpa nŋa mɔnda má í ni, na nŋu, inɛ iyi í gbɔ ide iyi ǹ wa n fɔu ihɛ̃ fei nɔ wa jirimaɛ, á yɛi bɛi mɔkɔ ilu bisi iyi í ma ileɛ si kuta.

²⁵ Ijĩ í wɔ, ido í kɔ̃ í nikã, nɔ fufu nla nla í dede si ileu, amma kù cuku, domi si kutai à maa.

²⁶ Amma awɔ iyi ì gbɔ ide iyi ǹ wa n fɔu ihɛ̃ fei nɔ i kù saaluɛ, aa yɛi bɛi mɔkɔ nnyɛi iyi í koo í ma ileɛ si sãai ido.

²⁷ Ijĩ í wɔ, ido í kɔ̃ í nikã, nɔ fufu nla nla í dede si ileu, nɔ í cuku í lɛgɛ fei.

²⁸ Iyi Jesu í fɔ bɛɛbɛ í tã, ŋɔi zamaau í biti do si bɛi wa kɔ ŋa si cio.

²⁹ À bitii si na iyi í jɔ̀ do yiikoi wa kɔ ŋa si, kù jɛ bɛi woo kɔ inɛ ŋa si wooda nŋa ŋau.