Matie 6 - Bibeli do fee

Idei amua ku cea ilu are ŋa

¹ Jesu í fɔ má í ni, bii ì waa ce mii iyi Ilaaɔ̃ í jilɛ nŋɛ, i ya ce laakai ŋa i maà coo si bantuma. Bii ì waa coo si bantuma ku ba inɛ ŋa a yɔɔ, i kaa ba riba kãma hai bi Baa nŋɛ iyi í wa lele.

² Na nŋu, bii ì waa mua ilu are ŋa ngɔgɔ ŋa, i maà ti i cã kɛsɛɛdɛ bɛi ilu muafiti ŋa à ya ce. À ya ce amua nŋa ŋai si ile bii à ya ce kutɔtɔɔ ŋa do si kpãa ŋa ku ba inɛ ŋa a saabu ŋa. Ntɔ ntɔ, inɛ nŋu ŋa à ba riba nŋa fei tã.

³ Amma iŋɛ, waati iyi ì waa mua ilu are ŋa ngɔgɔ ŋa, i maà jɔ̀ awɔ canga nŋɛ ku mà mii iyi awɔ njɛu wa ce,

⁴ ku ba amua iyi ì waa ce ŋa i coo si afei iŋɛ minji. Nɔ Ilaaɔ̃ Baa nŋɛ iyi wa yɛ mii fei á sã nŋɛ ribaɛ.

Idei kutɔɔ

⁵ Jesu í ni, bii ì waa ce kutɔɔ ŋa i maà ya ce bɛi ilu muafiti ŋa à ya ce. À ya bi aŋa a leekĩ a ce kutɔɔ ile bii à ya ce kutɔtɔɔ ŋa do bi tafa ŋa ku ba inɛ fei ku yɛ ŋa. Ntɔ ntɔ, inɛ nŋu ŋa à ba riba nŋa fei tã.

⁶ Amma iŋɛ, bii ì waa ce kutɔɔ ŋa, i lɔ hee ilaawa i cĩmbo ŋa, i tɔɔ Ilaaɔ̃ Baa nŋɛ bɛ tengi bii inɛ gɔ kù waa yɛ ŋɛ, nɔ Baa nŋɛ iyi wa yɛ mii iyi wa manji fei á sã nŋɛ.

⁷ Bii ì waa ce kutɔɔ ŋa i maà ya fɔ ide akã i maa sisi ŋa bɛi hai mà Ilaaɔ̃ ŋa à ya ce. À waa tamaa na ide nkpɔ ku fɔi aŋai Ilaaɔ̃ á gbɔò kutɔɔi aŋa.

⁸ I maà ya jɔ ŋa ŋa, domi hee i maa tɔɔ ŋa, Baa nŋɛ í mà bukaatai mii iyi ì nɛ tã ŋa.

⁹ Bɛi í sĩa i ya ce kutɔɔ ŋa wee. Ilaaɔ̃ Baa nwa iyi í wa lele, jɔ̀ inɛ fei ku mà iyi awɔi ì jɛ inɛ kumaaju.

¹⁰ Naa i jɛ bommaɛ. Jɔ̀ inɛ fei ku ce idɔɔbiɛ si ilɛu ihɛ̃ bɛi à waa ce lele.

¹¹ Mu nwa ijɛi ajɔ fei nwa.

¹² Kpa idei dulum du wa bɛi awa mɔ à ya ka kpa idei kurara iyi inɛ ŋa à ce nwa.

¹³ Maà ti i jɔ̀ ka dasi kulɛlɛ, amma nya wa hai si awɔi Seetam. [Domi awɔi ì nɛ bomma do gbugbã do amboe hee do ajɔ fei. Ami.]

¹⁴ Nɔ í nyi í ni má, bii ì ya kpa idei kurara iyi inɛ ŋa à ce nŋɛ, Ilaaɔ̃ Baa nŋɛ mɔ á kpa idei dulum du ŋɛ.

¹⁵ Amma bii iŋɛ mɔ i ci ya kpa idei kurara iyi inɛ ŋa à ce nŋɛ, Baa nŋɛ mɔ kaa kpa idei dulum du ŋɛ.

Idei anu ku dĩ

¹⁶ Jesu í ni má, bii ì waa ce anu ku dĩ ŋa, i maà ya jɔ̀ waju nŋɛ ku nyisi wahala nŋɛ bɛi ilu muafiti ŋa à ya ce. À ya kpaasi waju nŋa ku ba inɛ fei ku yɔɔ iyi à waa dĩ anu. Ntɔ ntɔ ǹ wa n sɔ̃ ŋɛi, inɛ nŋu ŋa à ba riba nŋa fei tã.

¹⁷ Amma iŋɛ, bii ì waa dĩ anu, i wɛɛju sãa sãa ŋa nɔ i jɔsi waju nŋɛ ikpo

¹⁸ ku ba inɛ ŋa a maà mà iyi ì waa dĩ anu ŋa, í gbe Ilaaɔ̃ Baa nŋɛ iyi í wa bii a kù waa yɔɔ. Nɔ Baa nŋɛ iyi wa yɛ mii iyi wa manji fei, á sã nŋɛ.

Amanii lele ku dɛ

¹⁹ Í sɔ̃ ŋa má í ni, i maà ti i dɛdɛ amani si andunyau ihɛ̃, bii tũtũ ŋa aa jɔɔ, do bii á mu atɛ, do bii ile ŋa aa lɔ do gbugbã a koo a ce ileɛ.

²⁰ Amma i dɛdɛ amanii lele bii kaa mu atɛ nɔ tũtũ ŋa a kaa yɔkɔ a bɛjɛɛ, nɔ ile ŋa mɔ a kaa yɔkɔ a lɔ a ce ileɛ.

²¹ Ntɔ ntɔ, í sĩa i dɛdɛ amanii lele ŋa domi bii amani nŋɛ í wa, bɛi laakai nŋɛ mɔ í ya wa.

Inya kumái ara

²² Í ni má, ijui í jɛ fitilai ara. Bii ijuɛ wa nɛ baani, araɛ fei í wa si inya kumái.

²³ Amma bii ijuɛ kù waa nɛ baani, araɛ mɔ fei í wa si ilu kukui. Na nŋu, mii iyi í nɛ ku ceɛ inya kumá, bii ilu kukui í ce, ilu kukuu á la ku caa.

I dasi Ilaaɔ̃ naanɛ ŋa

²⁴ Jesu í sɔ̃ ŋa má í ni, inɛ gɔ kaa yɔkɔ ku cea lafɛ̃ɛ minji icɛ ajɔ. Ntɔ ntɔ, á cé inɛ akã nɔ ku bi inɛ akã, walakɔ á jirima inɛ akã nɔ ku donda inɛ akã. I kaa yɔkɔ i too Ilaaɔ̃ do fia ajɔ ŋa.

²⁵ Na nŋu ǹ wa n sɔ̃ ŋɛi, i maà ya jɔ̀ zigi nŋɛ ku maa da do mii iyi aa jɛ i maa wɛɛò ŋa, walakɔ do jĩnɛ iyi aa dasi ŋa. Kuwɛɛi amanɛ í re ijɛ, ara mɔ í re jĩnɛ.

²⁶ I cɔ yɛi ŋa iyi à waa fo lele. A kù waa gbɛ̃ hee a da ngɔgɔ a dasi suu. Do nŋu fei, Baa nŋɛ iyi í wa lele wa wo ŋa. I kù mà ŋa iyi bɛɛrɛ nŋɛ í re ti yɛi ŋau bɛ?

²⁷ Yooi si inɔ nŋɛ na zigiidaɛ á yɔkɔ ku kɔ̃ɔsi kusɔi adɔ̃ɛ baa keeke.

²⁸ To, na mii í ce ì ya jɔ̀ zigi nŋɛ ku maa da do idei jĩnɛ ŋa. I cɔ bɛi wua ŋa à ya da koko si inɔ sako mɛɛ. A kù waa ce icɛ a ci ya nɔ a wɔ̃ acɔ.

²⁹ Amma ǹ wa n sɔ̃ ŋɛ, baa Salomɔɔ ilaalu nlau, do amboe nla nlaɛ fei kù nɛ jĩnɛ iyi boodaɛ í to kokoi jĩi ŋau bɛ baa akã.

³⁰ Fɔfɔ í wɛɛi nnyi do kusĩaɛ amma ala aa dasiɛ inai. To, bii Ilaaɔ̃ í mua fɔfɔ ŋa iyi aa na a dasi ina booda kusĩa bɛɛbɛ, kaa yɔkɔ ku mu nŋɛ nyau ku re fɔfɔ ŋau bɛ de. I kù yɛ naanɛ nŋɛi kù la?

³¹ Na nŋu, i maà ya jɔ̀ zigi nŋɛ ku maa da i maa ni ŋa, mii aa ka jɛ, mii aa ka mɔ, walakɔ mii aa ka biiò ara nwa.

³² Hai mà idei Ilaaɔ̃ ŋai à ya maa kpataa mii ŋau bɛ fei, amma Baa nŋɛ iyi í wa lele í mà iyi ì nɛ bukaatai mii ŋau bɛ fei ŋa.

³³ Na nŋu, i hanya titã ŋa i ce idɔɔbii Ilaaɔ̃ do bɛi aa ce i jɔ̀ bommaɛ ku bɔ waju. Iyi í gbe bɛi fei Ilaaɔ̃i á kɔ̃ɔ nŋɛ si.

³⁴ Ajɔ fei wahalaɛ í ya tooi. Na nŋu, i maà kpataò ala ŋa, domi ala mɔi á mà tɛɛ.