Matie 5 - Bibeli do fee

Inɔ didɔ̃ ntɔ ntɔ

¹ Iyi Jesu í yɛ zamaau ŋɔi í koo í gũ iri kuta gɔ í buba. Nɔ mɔcɔɛ ŋa à koo à tɔtɔɔ siɛ.

² Nɔ í lɔsi cio ku kɔ ŋa si. Si cioɛu í ni,

³ ilu inɔ didɔ̃ ŋai inɛ ŋa iyi à waa tɔɔ Ilaaɔ̃ do ara kukaye, domi aŋai à jɛ inɛi bommai Ilaaɔ̃ ŋa.

⁴ Ilu inɔ didɔ̃ ŋai inɛ ŋa iyi à waa kpata, domi Ilaaɔ̃i á tũ idɔ nŋa.

⁵ Ilu inɔ didɔ̃ ŋai inɛ ŋa iyi daa nŋa í sĩa domi aŋai aa nɛ ilɛu fei.

⁶ Ilu inɔ didɔ̃ ŋai inɛ ŋa iyi à waa gbɔ ari do agbɛi mii iyi Ilaaɔ̃ wa bi a ce, domi Ilaaɔ̃ á jɔ̀ a yo.

⁷ Ilu inɔ didɔ̃ ŋai inɛ ŋa iyi à ya nɛ araarei inɛ ŋa, domi Ilaaɔ̃ mɔ á nɛ araare nŋa.

⁸ Ilu inɔ didɔ̃ ŋai inɛ ŋa iyi idɔ nŋa í má, domi aa yɛ Ilaaɔ̃.

⁹ Ilu inɔ didɔ̃ ŋai inɛ ŋa iyi à waa ce icɛi laakai ku sũ, domi Ilaaɔ̃ á kpe ŋa amaɛ ŋa.

¹⁰ Ilu inɔ didɔ̃ ŋai inɛ ŋa iyi à kpã ŋa iju si na iyi í jɔ̀ à waa ce mii iyi Ilaaɔ̃ í bi, domi aŋai à jɛ inɛi bommai Ilaaɔ̃ ŋa.

¹¹ Iŋɛ ilu inɔ didɔ̃ ŋai, bii à waa bu ŋɛ nɔ à waa kpã ŋɛ iju nɔ à waa má ŋɛ laalɔ baa yooma fei na irim.

¹² I jɔ̀ i nyaanyi i wɛɛò inɔ didɔ̃ nla nla ŋa si na iyi í jɔ̀ riba iyi à jilɛ nŋɛ lelei Aɔ̃ í la. Ntɔ ntɔ bɛɛbɛi à kpã walii ŋa iyi à cua nŋɛ ŋau mɔ iju.

Mɔndai imu do ti inya kumá

¹³ Ŋɔi Jesu í sɔ̃ ŋa má í ni, iŋɛi ì jɛ imu si inɔi inɛi andunya ŋa. Bii didɔ̃i imu í ku, mii aa dasi a jɔ̀ ku dɔ̃ má. Í gbe de a nikãɛ, nɔ inɛ ŋa a tɛɛsɛɛ.

¹⁴ Nɔ iŋɛi ì jɛ inya kumái andunya. Ilu iyi à ma si iri kuta kaa manji.

¹⁵ A ci ya má fitila a biiɛ do caka. Amma à ya kɔaɛi tengi bii á má inya, inɛi kpasɛ̃ fei ku yɛò ilu.

¹⁶ Bɛɛbɛ mɔi i jɔ̀ inya kumá nŋɛ ku má si wajui inɛ ŋa ku ba a yɛ kookoosu jiida nŋɛ ŋa nɔ irii Ilaaɔ̃ Baa nŋɛ iyi í wa lele ku nɛ amboe.

Idei wooda

¹⁷ Jesu í ni má, i maà tamaa bɛi ǹ naa woodai Moizi do cioi walii ŋau ku kpai. Aawo, ǹ naa ku kɔ̃ɔi.

¹⁸ Ntɔ ntɔ, hee lele do ilɛ koo tãò, baa wasalii wooda keeke akã kaa gaizia, í gbe fei ndɛɛ ku kɔ̃i.

¹⁹ Na nŋu, inɛ iyi í kua wooda, baa bii í jɛ wooda keeke akã gɔi, nɔ í sɔ̃ inɛ gɔ ŋa mɔ í ni a ce bɛɛbɛ, aa kpe lafɛ̃ɛ inɛ iyi í kere í re si bommai Ilaaɔ̃. Amma inɛ iyi wa jirima wooda ŋau nɔ wa kɔ inɛ gɔ ŋa mɔ si, aa kpe lafɛ̃ɛ inɛ nla si bommai Ilaaɔ̃.

²⁰ Ǹ wa n sɔ̃ ŋɛi, i kaa jɛ inɛi bommai Ilaaɔ̃ ŋa bii kù jɛ ì waa ce mii iyi Ilaaɔ̃ í bi i ce ŋa ku re woo kɔ inɛ ŋa si wooda ŋa do Farisi ŋau.

Idei idɔɔkɔ̃

²¹ Jesu í sɔ̃ ŋa má í ni, ì gbɔ ŋa iyi Moizi í sɔ̃ bala nŋɛ ŋa í ni, i maà kpa inɛ, nɔ inɛ iyi í kpa inɛ fei aa bɔòɛ si wajui woo kiiti ŋa a nyisiɛ bɔ̃nɛ.

²² Amma amu, an sɔ̃ ŋɛ, inɛ iyi wa ce idɔɔkɔ̃ do kpaasiɛ aa bɔòɛ si wajui woo kiiti ŋa a kpãa iju, nɔ inɛ iyi wa cɔ kpaasiɛ nfe aa kiitiɛ si wajui inɛ ngbo ŋau, inɛ mɔ iyi wa cɔ kpaasiɛ nnyɛi á lɔ si ina iyi ci ya kuu.

²³ Na nŋu, bii ì naaò amuai Ilaaɔ̃ wa bi kuwee nɔ bɛi ì ye gigi iyi kpaasiɛ gɔ wa mu taaleɛ,

²⁴ jɔ̀ amuaɛu bi kuweeu bɛ titã, i koo i teese ideu gbakã, awɔ do kpaasiɛ. Si anyiɛ, i bɛi i nyi wa i cea Ilaaɔ̃ amuaɛ.

²⁵ Bii í jɛ inɛ gɔ wa bɔòɛ ile kiiti na idei gbese gɔ, ce kookaai hai kpãa awɔ do lafɛ̃ɛ i gbɔsi njɛ ŋa ku ba ku maà dasiɛ awɔi woo kiiti. Bii kù jɛ bɛɛbɛ, woo kiitiu á dasiɛ si awɔi polisi, nɔ polisiu mɔ ku dasiɛ ile piisɔ̃ɔ.

²⁶ Ntɔ ntɔ ǹ wa n sɔ̃ɛi, bii à dasiɛ piisɔ̃ɔ, bii i kù sã gbeseu fei i kaa fita. Nkãma kaa gaizia si.

Idei sakara

²⁷ Jesu í ni má, ì gbɔ ŋa iyi Moizi í ni, i maà ce sakara.

²⁸ Amma amu, an sɔ̃ ŋɛ, awɔ inɛmɔkɔ iyi í cɔ inaabo hee binɛɛ í dede, ì ce sakara mbɛ tã si idɔɛ.

²⁹ Na nŋu, bii iju njɛɛi wa dasiɛ dulum, nyaa i nyɔɔ ku jĩiɛ. Á tiaɛ i nyɔ ikɔ̃ akãi araɛ gɔ do iyi aa sɔsi araɛ fei si ina iyi ci ya ku.

³⁰ Bii í jɛ awɔ njɛɛi wa dasiɛ dulum, buu i nyɔɔ ku jĩiɛ. Á tiaɛ i nyɔ ikɔ̃ akãi araɛ gɔ do iyi aa sɔsi araɛ fei si ina iyi ci ya ku.

Idei abo ku kɔ̀si

³¹ Nɔ Jesu í sɔ̃ ŋa má í ni, Moizi í ni, inɛ iyi wa kɔ̀si aboɛ á náa tiai njɛ kukɔ̀sii.

³² Amma amu, ǹ wa n sɔ̃ ŋɛ, inɛ iyi í kɔ̀si aboɛ nɔ kù jɛ na sakara, mɔkɔu í dasiɛ sakarai. Nɔ mɔkɔ mɔ iyi í so abo iyi à kɔ̀siu, í ce sakarai.

I maà ya gbasi do ngɔgɔ

³³ Jesu í sɔ̃ ŋa má í ni, ì nɔ ì gbɔ iyi Moizi í sɔ̃ bala nŋɛ ŋau í ni, ide iyi ì gbasi si wajui Aɔ̃ Lafɛ̃ɛ ì ni aa ce, jɔ̀ i coo.

³⁴ Amma amu, ǹ wa n sɔ̃ ŋɛi, i maà ya ce kugbasi ŋa pai. I maà ya gbasi do lele ŋa domi batai bommai Ilaaɔ̃i.

³⁵ Nɔ i maà ya gbasi do ilɛ ŋa, domi bi ku lesi isɛɛi. Nɔ i maà ya gbasi do Zeruzalɛmu ŋa domi ilui Ilaaɔ̃ amanlu nlaui.

³⁶ Nɔ i maà ya gbasi do iri nŋɛ ŋa si na iyi í jɔ̀ i kaa yɔkɔ i fũuta baa ntoi iri akã nŋɛ hee má jɛ i jɔ̀ ku dũ ŋa.

³⁷ I jɔ̀ ide ku fɔ nŋɛ ku jɛ ntɔ. Bii ì ni ooi ku jɛ oo do ntɔ, bii aawo mɔi, ku jɛ aawo. Iyi aa lesi antaiɛ bɛbɛi fei ŋa, hai bi Seetam inɛ laalɔui wa naa.

Idei laalɔ ku sã

³⁸ Jesu í sɔ̃ ŋa má í ni, ì gbɔ ŋa iyi Moizi í fɔ wo í ni, inɛ iyi í nya ijui inɛ gɔ, aa nya ti nŋu mɔ. Inɛ mɔ iyi í cɛ inyíi inɛ gɔ, aa cɛ ti nŋu mɔi.

³⁹ Amma amu, ǹ wa n sɔ̃ ŋɛi, i maà ya sãa inɛ laalɔ iyi í ce nŋɛ. Bii inɛ í sambalaɛ si njɛ, toaa cangau má.

⁴⁰ Bii inɛ gɔ í bɔòɛ kiiti ku ba ku gba danzigiɛ, naa kumbooɛ mɔ má.

⁴¹ Bii inɛ gɔ í tilasiɛ i soa nŋu aso i nɛò zakai kiloo akã, so i nɛaa ku to kiloo minji gbakã.

⁴² Bii inɛ gɔ í tɔɔɛ mii gɔ, muaa. Bii inɛ gɔ í naa mii gɔ ku kãaye bi tɛɛ, maà kɔ̀.

Idei mbɛɛ ŋa ku bi

⁴³ Jesu í ni má, ì gbɔ ŋa iyi à fɔ wo à ni, bi kpaasiɛ, nɔ i cé mbɛɛɛ.

⁴⁴ Amma amu, ǹ wa n sɔ̃ ŋɛi, i ya bi mbɛɛ nŋɛ ŋa, nɔ i ya cea inɛ ŋa iyi à waa kpã ŋɛ iju kutɔɔ ŋa.

⁴⁵ Bii ì waa ce bɛɛbɛ ŋa ì waa nyisi inɛ ŋa iyi ì jɛ amai Ilaaɔ̃ Baa nŋɛ iyi í wa lelei, domi Ilaaɔ̃ í jɔ̀ inunuɛ wa má inya si inɛ jiida do si inɛ laalɔ ŋa. Nɔ í jɔ̀ ijĩ wa wɔa inɛ ŋa iyi à waa ce idɔɔbiɛ hee do bi inɛ ŋa iyi a kù waa coo fei.

⁴⁶ Bii inɛ ŋa iyi à bi ŋɛ aŋa akãi iŋɛ mɔ ì bi ŋa, to, riba yoomai aa ba ŋa. Baa woo gba fiai lɛmpoo ŋa mɔ à ya ce dimiɛ.

⁴⁷ Bii kpaasi nŋɛ ŋa aŋa akãi ì ya ce fɔɔ ŋa, to, iŋɛ mɔ yooi ì tia ŋa. Baa hai dasi Ilaaɔ̃ naanɛ ŋa mɔ à ya ce bɛɛbɛ.

⁴⁸ Na nŋu, i jɔ̀ jiida ku jɛ nŋɛ ku kɔ̃ bɛi ti Ilaaɔ̃ Baa nŋɛ iyi í wa lele í kɔ̃.