Matie 4 - Bibeli do fee

Seetam í lɛlɛ Jesu

¹ Si anyii nŋu, ŋɔi Hundei Ilaaɔ̃ í bɔò Jesu si gbaa ku ba Seetam ku lɛlɛɛ.

² Ŋɔi Jesu í ce anu ku dĩ dasã ciiji do idũ ciiji, si anyiɛ nɔ ari wa kpaa.

³ Ŋɔi Seetam woo lɛlɛu, í naa siɛ í ni, bii awɔ Amai Ilaaɔ̃i do ntɔ, jɔ̀ kuta ŋau ihɛ̃ a kpɔò pɛ̃ɛ.

⁴ Ŋɔi Jesu í jɛaa í ni, kukɔi idei Ilaaɔ̃ í ni, amanɛ ci ya wɛɛ na ijɛ nŋu akã, amma á maa wɛɛi na ide iyi Ilaaɔ̃ wa fɔ fei.

⁵ Nɔ Seetam í bɔòɛ Zeruzalɛmu, ilu kumáu, nɔ í gũòɛ hee si antaii ile lelei kpasɛ̃i Ilaaɔ̃u.

⁶ Ŋɔi í ni má, bii awɔ Amai Ilaaɔ̃i, fo i dingaa ilɛ, domi kukɔi idei Ilaaɔ̃ í ni, Ilaaɔ̃ á na amalekaɛ ŋa wooda na iriɛ, a maa muɛ si awɔ ku ba i maà ti i koosɛ si kuta.

⁷ Nɔ Jesu í jɛaa í ni, amma kukɔi idei Ilaaɔ̃ í ni má, maà ti i sii Aɔ̃ Lafɛ̃ɛɛ.

⁸ Si anyii nŋu, Seetam í bɔò Jesu hee antaii iri kuta nla gɔ má nɔ í nyisiɛ bommai andunya fei do amboe nŋa.

⁹ Nɔ í ni, bii ì gulɛ ì tɔɔm, mii ŋau ihɛ̃ fei an muuɛ.

¹⁰ Nɔ Jesu í jɛaa í ni, sɛkɛɛ bɛ Seetam. Kukɔi idei Ilaaɔ̃ í ni, Aɔ̃ Lafɛ̃ɛɛi aa gulɛa, nɔ nŋu akãi aa tɔɔ.

¹¹ Ŋɔi Seetam í bɛi í sɛkɛɛ hai bi tɛɛ, nɔ amaleka ŋa à koo à sobiɛ.

Jesu í sinti waazo ku ce Galilee

¹² Ŋɔi Jesu í gbɔ à ni à mu Zãa à dasiɛ piisɔ̃ɔ. Nɔ í sinda í nyi ilɛi Galilee.

¹³ Amma iyi í to Nazarɛti, kù buba bɛ, Kapɛranumui í koo í buba, ilu iyi í wa kɔkɔi tenku iyi à ya kpe Galilee, si ilɛi Zabulɔ̃ɔ do Nɛfitali.

¹⁴ Iyi bɛ í cei ku ba ide iyi walii Ezai í tako í fɔu ku kɔ̃ waati iyi í ni,

¹⁵ inɛi Zabulɔ̃ɔ do inɛi Nɛfitali ŋa, aŋa iyi à wa kɔkɔi kpãa iyi wa bɔ Tenku, aŋa iyi à wa ikpa icei idoi Zuudɛ̃ɛu, aŋa iyi à wa ilɛi Galilee bii dimi mmu ŋa à wa,

¹⁶ aŋa iyi à wa si ilu kuku wo, aŋai à yɛ inya kumá nla nla. Aŋa iyi à wa si ilɛ bii iku do ilu kuku í wa, aŋai inya kumá í naa si.

¹⁷ Hai waati bɛɛbɛi Jesu í sinti ku waazo, í ni, i kpaasi idɔ nŋɛ si na iyi í jɔ̀ waati í maai wa iyi Ilaaɔ̃ á jɛ bommaɛ.

Jesu í kpe sɔɔkɔ mɛɛ gɔ ŋa

¹⁸ Ajɔ nŋu gɔ Jesu wa nɛ si itĩi tenku iyi à ya kpe Galilee, ŋɔi í yɛ sɔɔkɔ minji gɔ ŋa, Simɔɔ iyi à ya kpe Piɛɛ do ifɔɛ Anderee, à waa le taao si inɔ tenkuu.

¹⁹ Nɔ í sɔ̃ ŋa í ni, i toom wa ŋa, nɔ n ce ŋɛ woo dɛdɛ inɛ ŋa iyi aa jɛ ti Ilaaɔ̃.

²⁰ Bɛ gbakã à jɔ̀ taao nŋa ŋa à tooɛ.

²¹ Iyi í to waju nɔ í yɛ inɛ minji gɔ ŋa má, Zaaki do Zãa ifɔɛ, amai Zebedee ŋa. Inɛ ŋau à wa si akɔi inyi gɔ do baa nŋa, à waa teese taao nŋa ŋa. Nɔ Jesu í kpe ŋa.

²² Bɛ gbakã aŋa mɔ à jɔ̀ akɔu do baa nŋa à waa tooɛ.

²³ Nɔ Jesu í dabii si ilɛi Galilee fei wa kɔ inɛ ŋa si cio ile bii Zuifu ŋa à ya ce kutɔtɔɔ nŋa ŋa, wa sisi nŋa laabaau jiida si bɛi Ilaaɔ̃ wa ce sɔɔlu ku na ku jɛ bommaɛ, nɔ í jɔ̀ inɛ ŋa à waa ba iri si bɔ̃ɔ dimi ikã ikã nŋa ŋa fei.

²⁴ Nɔ baauɛ í fangaa bii fei si ilɛi Siri fei, hee inɛ ŋa à wasi ku naaò bɔ̃ɔ nŋa ŋa wa bi tɛɛ. Inɛ ŋa iyi à nɛ dimii bɔ̃ɔ ikã ikã fei do inɛ ŋa iyi à nɛ wahalai ara kuro nkpɔ do inɛ ŋa iyi inɛi inɔɔko ŋa à mu, do inɛ ŋa iyi à waa ce bɔ̃ɔi cukuuna do wɛɛgɛ ŋa, à naaò aŋa fei wa bi tɛɛ, nɔ í jɔ̀ aŋa fei à ba iri.

²⁵ Nɔ zamaa nla gɔ í too fitiɛ wa hai ilɛi Galilee do hai ilui Zeruzalɛmu do ilɛi Zudee hee do icei idoi Zuudɛ̃ɛu bii Ilu Mɛɛwa ŋau à wa fei.