Matie 28 - Bibeli do fee

Kujĩi Jesu hai si balɛ

¹ Iyi ajɔi kusĩmiu í lɔ, ajɔ amaazuma daadaakɔ Maari inɛi Madalau do Maari iyi ihɔ̃ à bɔ balɛu ku cɔ.

² Ŋɔi gbakã ilɛ kuyaya nla gɔ í ce nɔ amalekai Ilaaɔ̃ gɔ í kita wa hai lele í naa í tale kutau wa buba si.

³ Wajuɛ wa daana bɛi kuŋɔi ijĩ nɔ nyauɛ ŋa mɔ wa fũuta bɛi iwu tafa.

⁴ Ŋɔi njo í mu woo degbe ŋau hee à waa yaya nɔ à cuku ilɛ bɛi iku ŋa.

⁵ Ŋɔi amalekau í sɔ̃ inaabo ŋau í ni, iŋɛ, i maà jɔ̀ njo ku mu ŋɛ. Ǹ mà iyi Jesu inɛ iyi à kpakpa si jĩi ku gaauui ì waa dɛ ŋa.

⁶ Kù wa ihɛ̃ má, í jĩ hai si balɛ si bɛi í tako í fɔu. I naa i cɔ bii í tako wa sũ wo,

⁷ nɔ i sinda ńya ńya i koo i sɔ̃ mɔcɔɛ ŋa i ni, í jĩ hai si balɛ. Á cua nŋɛ ikpa Galilee. Bɛi aa yɔɔ ŋa. Iyi ǹ nɛ an sɔ̃ ŋɛ mbɛ.

⁸ Ŋɔi à sinda ńya ńya hai bi balɛu do njo. Nɔ baa do iyi à waa ce njo fei à nɛ inɔ didɔ̃ nla nla má. Ŋɔi à sɛi à koo à sɔ̃ mɔcɔɛ ŋa laabaauu.

⁹ Ŋɔi Jesu í kò ŋa í ni, i fɔɔ. Ŋɔi à sɛkɛɛ siɛ wa à naa à mu kutɛɛ à sɛɛbata si wajuɛ.

¹⁰ Nɔ Jesu í sɔ̃ ŋa í ni, i maà jɔ̀ njo ku mu ŋɛ. I koo i sɔ̃ kpaasim ŋa a bɔ Galilee, bɛi aa yɛm.

Idei woo degbe ŋa

¹¹ Waati iyi à wa si kpãa à waa nɛu, inɛ gɔ ŋa si woo degbe ŋau à bɔ inɔ ilu à koo à sisia inɛ ngboi woo weei Ilaaɔ̃ ŋa mii iyi í ceu fei.

¹² Nɔ inɛ ngboi woo weei Ilaaɔ̃ ŋau à ce kutɔtɔɔ do inɛ ngboi Zuifu ŋau à busi njɛ nɔ à mua sooge ŋau fia nkpɔ gɔ,

¹³ à sɔ̃ ŋa à ni, i sɔ̃ inɛ ŋa i ni mɔcɔɛ ŋa à naa idũ laja à naa à ce ilei ikuu waati iyi ì waa sĩ njoo ŋa.

¹⁴ Bii ilu ilɛu í gbɔ ideu, à mà bɛi aa ka ce ku ba ku maà kpã ŋɛ iju.

¹⁵ Sooge ŋau à gba fiau nɔ à ce bɛi à tɔɔ ŋau. Ŋɔi í jɔ̀ ideu í fangaa si inɔi Zuifu ŋa hee do nnyi fei.

Icɛ iyi Jesu í jɔ̀a mɔcɔɛ ŋa

¹⁶ Si anyii nŋu, mɔcɔ maatakã ŋau à bɔ Galilee nɔ à koo à ba Jesu si iri kuta bii í tako í sɔ̃ ŋa wou.

¹⁷ Iyi à yɔɔ, ŋɔi à waa gulɛaa. Amma si inɔ nŋa inɛ gɔ ŋa à waa sika sika.

¹⁸ Ŋɔi Jesu í sɛkɛɛ si ŋa wa í ni, yiikoi lele do ti ilɛ fei à nam nii.

¹⁹ Na nŋu, i koo si dimi fei, i ce ŋa mɔcɔm ŋa. Nɔ i dasi ŋa inyi do irii Baaba do ti amu Amau do ti Hundei Ilaaɔ̃.

²⁰ Nɔ ide ŋa iyi ǹ sɔ̃ ŋɛ fei, i kɔ ŋa si ide ŋau ku jirima ŋa. Nɔ an maa n wɛɛ do iŋɛ ajɔ fei hee kɔɔi andunya.