Matie 27 - Bibeli do fee

À bɔò Jesu wajui Pilati

¹ Ŋɔi daadaakɔ inɛ ngboi woo weei Ilaaɔ̃ ŋa do inɛ ngboi Zuifu ŋa fei à jilɔɔ si aŋa a kpa Jesu.

² Nɔ à dũu à koo à daa Pilati ilu ilɛu si awɔ.

Ikui Zudasi

³ Zudasi, nŋu iyi í zamba Jesuu, í yɛ bɛi à yɛ taaleɛ a kpaa, ŋɔi inɔɛ í fɔ. Nɔ í nyiò fiai isɔ fũfũ kuntaau bi inɛ ngboi woo weei Ilaaɔ̃ ŋa do inɛ ngboi Zuifu ŋau.

⁴ Í sɔ̃ ŋa í ni, ǹ ce dulum si bɛi ǹ zamba inɛ dee deeu ihɛ̃ a kpaa. Amma à jɛaa à ni, yoomai í yɛ wa. Í jɛ idei iriɛ.

⁵ Ŋɔi Zudasi í nyɔ fiau si kpasɛ̃i Ilaaɔ̃ bɛ í nɛɛ. Nɔ í koo í dasi kɔ̃ɔɛ ikũ lele í kpa araɛ.

⁶ Inɛ ngboi woo weei Ilaaɔ̃ ŋau à so fiau à ni, bɛirei aa ka ceò fiau ihɛ̃. A kù nɛ kpãa ka dasi kpakoi kpasɛ̃i Ilaaɔ̃ si na iyi í jɔ̀ fia iyi à sã na a nikãò njɛi inɛ gɔi.

⁷ Iyi à busi njɛ à tã, nɔ à so fiau à raò ikoi woo ma caka gɔ, à ce bi ku si isɛ mmu ŋa.

⁸ Na ŋɔi í jɔ̀ à ya kpe ikou ikoi njɛ baa nnyi.

⁹ Bɛɛbɛi idei Zeremii waliiu í ce si bɛi í ni, à so fiai isɔ fũfũ kuntaau, fia iyi inɛi Izirɛli ŋa à jɛsi aŋa a sã na iriɛu,

¹⁰ nɔ à raò ikoi woo ma cakau, si bɛi Aɔ̃ Lafɛ̃ɛ í dasim.

Pilati wa bee Jesu ide ŋa

¹¹ Ŋɔi à koo à leekĩ Jesu si wajui Pilati ilu ilɛu, nɔ í beeɛ í ni, awɔi ì jɛ ilaalui Zuifu ŋa? Nɔ Jesu í jɛaa í ni, awɔi ì fɔɔ.

¹² Si anyii nŋu, inɛ ngboi woo weei Ilaaɔ̃ ŋa do inɛ ngboi Zuifu ŋau à waa máa ide, nɔ kù ni nŋa ide kãma.

¹³ Ŋɔi Pilati í beeɛ í ni, i kù waa gbɔ ide ŋa iyi inɛ ŋa à fɔ à waa yɛò taaleɛ ba.

¹⁴ Amma Jesu kù jɛaa baa gbakã hee biti í muu.

À yɛ taalei Jesu a ba a kpaa

¹⁵ Wee si jingaui Iku ku kua fei ilu ilɛu í ya jɔ̀ inɛi piisɔ̃ɔ akã iyi zamaa í bii.

¹⁶ Waati bɛɛbɛ inɛ gɔ í wa ile piisɔ̃ɔ bɛ, à ya kpoo Barabasi, nɔ inɛ fei í màa.

¹⁷ Ŋɔi í jɔ̀ iyi zamaau í tɔtɔɔ, Pilati í bee ŋa í ni, yooi ì bi n jɔ̀ nŋɛ, Barabasi de, mà Jesu iyi à ya kpe Kirisiu.

¹⁸ Í fɔ bɛɛbɛi si na iyi í jɔ̀ wa mà sãa sãa iyi na igui í jɔ̀ à daa nŋu Jesu si awɔ.

¹⁹ Waati iyi Pilati wa buba bi ku ce kiitiu, ŋɔi aboɛ í bɛ siɛ inɛ gɔ wa í ni, maà dasi idei inɛ dee deeu bɛ baa, domi idũ, iyi ǹ wa n sũ, ǹ yɛ wahala jiida jiida si ala na iriɛ.

²⁰ Amma inɛ ngboi woo weei Ilaaɔ̃ ŋa do inɛ ngboi Zuifu ŋau à wasi ku mante zamaau à waa ni a sɔ̃ Pilati ku nyaa aŋa Barabasi nɔ ku jɔ̀ a kpa Jesu.

²¹ Nɔ Pilati í bee ŋa í ni, si amanɛ minji ŋau bɛ, yoo nŋai ì bi n jɔ̀ nŋɛ. Nɔ à ni, Barabasi.

²² Nɔ Pilati í ni, to, bɛirei an cea Jesu iyi à ya kpe Kirisiu. Ŋɔi aŋa fei à ni, kpakpaɛ si jĩi ku gaau.

²³ Ŋɔi Pilati í bee ŋa í ni, laalɔ yoomai í bɛi í ce. Amma bɛi Pilati wa fɔ fei, bɛɛbɛ mɔi inɛ ŋau à ya dɔ̃ anu hee lele a maa ni, kpakpaɛ si jĩi ku gaau.

²⁴ Iyi Pilati í yɛ mii iyi nŋu wa ce fei ngbɛi, nɔ wakatau wa kɔ̃ɔsi mɔm nii, ŋɔi í bu inyi í wɔɔ si wajui zamaau í nyisi iyi baai nŋu kù wa si ideu, í ni, njɛi mɔkɔ dee deeu ihɛ̃ kunikãɛ kù yɛm, í jɛ idei iri nŋɛ.

²⁵ Ŋɔi inɛ ŋau fei à jɛ à ni, kunikãi njɛɛu ku jɛ idei irii awa do ama nwa ŋa.

²⁶ Ŋɔi Pilati í jɔ̀ nŋa Barabasi, nɔ í jɔ̀ à tɛa Jesu kpɔtɔɔ. Si anyii nŋu, nɔ í daa sooge ŋa si awɔ a koo a kpakpaɛ si jĩi.

Sooge ŋa à waa yaako Jesu

²⁷ Si anyii nŋu, ŋɔi sooge ŋau à gbã Jesu à lɔòɛ kabai ilu ilɛu, nɔ à tɔtɔɔ soogeɛ ŋa iyi à gbe ŋau fei bɛ.

²⁸ À bɔ jĩnɛ ŋa iyi wa dasi nɔ à daa si ibɔ nkpa sisɔ gɔ.

²⁹ Nɔ à ba fulai agũ à lea si iri, nɔ à naa kpokpoo si awɔ njɛɛ, à bɛi à gulɛ si wajuɛ à waa yaakoɛ à waa ni, fɔɔ ilaalui Zuifu ŋa.

³⁰ Ŋɔi à tu siɛ antɔ nɔ à gba kpokpoou à cãa si iriɛ.

³¹ Iyi à yaakoɛ à tã, ŋɔi à bɔaa ibɔ nkpau à bɛi à daa si ibɔɛ à gbãa à waa bɔ ku kpakpaɛ si jĩi ku gaau.

À kpakpa Jesu si jĩi ku gaau

³² Waati iyi à waa fita hai inɔ iluu, ŋɔi à ko inɛi Sirɛni gɔ à ya kpoo Simɔɔ. Ŋɔi sooge ŋau à tilasiɛ à kãa jĩi ku gaau bii aa kpakpa si Jesuu.

³³ Nɔ à waa bɔ inya gɔ iyi à ya kpe Gɔɔgɔta, waatɔ inya iyi í jɔ kokoi iri. Waati iyi à to bɛ,

³⁴ à na Jesu atɛ̃ vɛ̃ɛ iyi à yɔgɛɛ do alolo. Amma iyi í tiɛɛ kù bi nŋu ku mɔɔ.

³⁵ Ŋɔi à kpakpaɛ si jĩi ku gaauu nɔ à ta kpasa si jĩnɛ ŋa iyi wa dasiu à ce ikpɛ̃ɛ.

³⁶ Nɔ à buba à waa degbeɛ.

³⁷ Si antaii iriɛ do lele, à kɔ ide iyi wa fɔ taale iyi í ce à ni, inɛ ihɛ̃i í jɛ Jesu, ilaalui Zuifu ŋa.

³⁸ Ŋɔi à kpakpa ile minji gɔ ŋa bɛ má, inɛ akã ikpa awɔ njɛɛ, inɛ akã mɔ ikpa awɔ cangaɛ.

³⁹ Inɛ ŋa iyi à waa too do bɛ à ya maa gbugbã irii a buu

⁴⁰ a maa ni, kù jɛ awɔi ì ni aa lɛgɛ kpasɛ̃i Ilaaɔ̃ nɔ i maa má si afei ajɔ mɛɛta? To, bii awɔ Amai Ilaaɔ̃i, faaba araɛ bɛ bɛi, kita wa hai si antaii jĩi ku gaauu.

⁴¹ Bɛɛbɛi inɛ ngboi woo weei Ilaaɔ̃ ŋau do woo kɔ inɛ ŋa si wooda ŋau do inɛ ngboi Zuifu ŋau à ya maa yaakoɛ a maa ni,

⁴² í faaba inɛ gɔ ŋa amma í mɔngɔ ku faaba araɛ. Kù jɛ í ni nŋu ilaalui inɛi Izirɛli ŋai? To, ku kita wa hai si antaii jĩi nɔu ku ba ka dasiɛ naanɛ.

⁴³ Í dasi Ilaaɔ̃ naanɛ nɔ í ni nŋu Amai Ilaaɔ̃i. Debɛi, bii Ilaaɔ̃ í nɛ kubiɛ ntɔ ntɔi ku faabaɛ.

⁴⁴ Bɛɛbɛ mɔi ile ŋa iyi à kpakpa do Jesu ajɔu à waa yaakoɛ.

Waati iyi Jesu í ku

⁴⁵ Ŋɔi dasã nkpau ilu í kuku si ilɛu fei hee í koo í to isɔ mɛɛtai alɛ.

⁴⁶ Nɔ si isɔ mɛɛtau Jesu í dɔ̃ anu hee lele í ni, Eli, Eli, lema sabatani, waatɔ Ilaaɔ̃ Lafɛ̃ɛm, Ilaaɔ̃ Lafɛ̃ɛm, na mii í ce ì fũsim awɔ.

⁴⁷ Ŋɔi inɛ gɔ ŋa iyi à wa bɛu à gbɔ anu ku dɔ̃u. Nɔ à ni, wa kpe Elii.

⁴⁸ Ŋɔi gbakã inɛ akã nŋa í sɛi í koo í dĩ kanya si golo gɔ í sɔsi inyiikã í bɛi í naa í toa Jesu ku cɔ̃ɔcɔ̃ɔɛ.

⁴⁹ Amma inɛ ŋa iyi à gbe ŋau à ni, jɔ̀ɔ titã, ka cɔ bii Elii á naa ku faabaɛ.

⁵⁰ Nɔ Jesu í dɔ̃ anu má hee lele í bɛi í ku.

⁵¹ Asee, waati bɛɛbɛ si ilui Zeruzalɛmu, ridoo iyi í wa kpasɛ̃i Ilaaɔ̃u í ga í kpɛ̃ minji hai lele hee ku bɔ ilɛ, nɔ ilɛ í yaya hee kuta ŋa à la.

^52-53 Balɛ ŋa à cĩ, nɔ woo dasi Ilaaɔ̃ naanɛ nkpɔ ŋa iyi à tako à ku wo à jĩ má, à fita hai inɔ balɛ. Si anyii kujĩi Jesu nɔ à bɔ Zeruzalɛmu ilu kumáu à tusɛ ara nŋa bi inɛ nkpɔ.

⁵⁴ Ŋɔi inɛ ngboi sooge ŋa do inɛ ŋa iyi à wa bi tɛɛ à waa degbe Jesuu à yɛ kuyayai ilɛu do mii ŋa iyi í ce fei. Ŋɔi njo nla nla í mu ŋa à waa ni, ntɔ ntɔ, inɛɛu ihɛ̃ Amai Ilaaɔ̃i.

⁵⁵ Inaabo nkpɔ gɔ ŋa à wa bɛ, à waa cɔ Jesu wa hai jĩijĩ. À too Jesu wai hai Galilee a naa a gbɔaa.

⁵⁶ Si inɔ nŋa Maari inɛi Madalau do Maari iyei Zaaki do Zozɛfu, do iyei amai Zebedee ŋa, aŋa fei à wa bɛ.

À dasi ikui Jesu balɛ

⁵⁷ Iyi alɛ í lɛ, ŋɔi mɔkɔ ilu fia gɔ í koo bɛ. À ya kpoo Zozɛfu, inɛi Arimateei. Nŋu mɔ mɔcɔi Jesui wa jɛ.

⁵⁸ Ŋɔi í bɔ bi Pilati í tɔɔɛ ikui Jesu. Nɔ Pilati í yɔɔdaa í ni a naa.

⁵⁹ Zozɛfu í so ikuu í woo do acɔ fũfũ titɔ̃ gɔ.

⁶⁰ Nɔ í koo í suu si isai kuta gɔ iyi í jɔ̀ à gbea nŋu takaɛ wo. Si anyiɛ nɔ í bimbili kuta nla gɔ í dĩò andɛi balɛu í bɛi í nɛ.

⁶¹ Maari inɛi Madalau do Maari iyi ihɔ̃u à wa bɛ à waa buba kɔkɔi balɛu.

Balɛ ku degbe

⁶² Iyi iju í má, si ajɔi kusĩmiu, ŋɔi inɛ ngboi woo weei Ilaaɔ̃ ŋa do Farisi ŋau à bɔ bi Pilati ajɔ.

⁶³ À ni, lafɛ̃ɛ, à ye gigii ide iyi ilu ibou í fɔ si waati iyi í wɛɛ si andunya í ni si ajɔ mɛɛtasia nŋu á jĩ hai si balɛ má.

⁶⁴ Na nŋu, jɔ̀ a maa degbe balɛu hee ku to zakai ajɔ mɛɛta, ku ba mɔcɔɛ ŋa a maà naa a nya ikuu, a bɛi a koo a sɔ̃ inɛ ŋa a ni, í jĩ hai si balɛ. Waati bɛɛbɛ iboi ankãanyiu ihɛ̃ á na ku re baa ti takou má.

⁶⁵ Ŋɔi Pilati í sɔ̃ ŋa í ni, i gbã sooge ŋau a koo a degbeɛ bɛi ì bi ŋa.

⁶⁶ Nɔ aŋaò ŋa fei à bɔ bi balɛu. À ce nyinda gɔ si kutau ku ba inɛ gɔ ku maà cũu. Nɔ à jilɛ sooge ŋa bɛ à waa degbeɛ.