Matie 26 - Bibeli do fee

Inɛ ngbo ŋau à waa busi njɛ a kpa Jesu

¹ Iyi Jesu í fɔ ide ŋau fei í tã, ŋɔi í sɔ̃ mɔcɔɛ ŋa í ni,

² ì mà ŋa iyi ajɔ minjii í gbe ka jɛò jingaui Iku ku kua. Nɔ waati bɛɛbɛi aa dasi amu Amai Amanɛ si awɔi inɛ ŋa a kpam si jĩi ku gaau.

³ Waati iyi Jesu wa sɔ̃ mɔcɔɛ ŋa ideu, inɛ ngboi woo weei Ilaaɔ̃ ŋau do inɛ ngboi Zuifu ŋau à tɔtɔɔ kabai Kaifu woo wee nlau.

⁴ Bɛi à waa busi njɛ bɛi aa ce a ba a mu Jesu do bisi a kpaa.

⁵ Amma à waa ni, kù sĩa ku jɛ si waatii jingauu ku ba hoya hoya ku maà dede si zamaau.

Abo gɔ í fãsi irii Jesu tuae

⁶ Jesu í wa Betani kpasɛ̃i Simɔɔ iyi í tako í ce bɔ̃ɔi dintɛu.

⁷ Ŋɔi abo gɔ í naa bi tɛɛ waati iyi à waa jɛ. Wa mu ama caka kusĩa gɔ iyi í nɛ tuae ku nɛ fia gɔ, nɔ í fãsi tuaeu si irii Jesu.

⁸ Iyi mɔcɔ ŋau à yɔɔ, ŋɔi idɔ nŋa í kɔ̃ à ni, na mii í ce abou í koo í ce asɔɔi tuaeu ihɛ̃.

⁹ Aa ka taai wo fia nkpɔ nkpɔ ka kpɛ̃a ilu are ŋa fiau.

¹⁰ Iyi Jesu í gbɔ à waa fɔ bɛɛbɛ, ŋɔi í bee ŋa í ni, na mii í ce ì waa yɛ taalei abou ŋa. Mii jiidai í ceem bɛ.

¹¹ Ntɔ ntɔ, ilu are ŋa aa maa wɛɛ do iŋɛ waati kãma fei, amma amu n kaa n maa n wɛɛ do iŋɛ hee do ajɔ fei.

¹² Abou í fãsi aram tuae do njuma ku ceò sɔɔlui kusim.

¹³ Ntɔ ntɔ, tengi bii inɛ ŋa aa koo a maa waazo laabaau jiidau si andunyau fei, aa sisi ide iyi abou ihɛ̃ í ce a maa yeò gigiɛ.

Zudasi á fita anyii Jesu

¹⁴ Ŋɔi Zudasi Isikariɔti, inɛ akãi mɔcɔ maateeji ŋau, í bɔ bi inɛ ngboi woo weei Ilaaɔ̃ ŋau,

¹⁵ í bee ŋa í ni, mii aa muum ŋa bii ǹ da nŋɛ Jesu si awɔ. Nɔ à ka fia isɔ fũfũ ara kuntaa à naa.

¹⁶ Hai waati bɛɛbɛi, Zudasi wa dɛ kpãa bɛi á ce ku zambaò Jesu ku na inɛ ŋau.

Jesu wa jɛ ijɛi jingaui Iku ku kua do mɔcɔɛ ŋa

¹⁷ Si ajɔ sintei jingaui Pɛ̃ɛ hai nɛ levɛ̃ɛu mɔcɔi Jesu ŋau à naa à beeɛ à ni, iwoi ì bi kaa ceɛ sɔɔlui jingaui Iku ku kuau.

¹⁸ Ŋɔi í jɛ nŋa í ni, i bɔ inɔ ilu bi wãanɛ kasa i sɔ̃ɔ i ni, amu Mɛɛtu ǹ ni, waatim í to. Bi tɛɛi an jɛ jingaui Iku ku kuau amu do mɔcɔm ŋa.

¹⁹ Nɔ mɔcɔ ŋau à ce bɛi Jesu í sɔ̃ ŋa, à ce sɔɔlui ijɛi jingauu.

²⁰ Iyi alɛ í lɛ, Jesu do mɔcɔ maateeji ŋau à waa jɛ.

²¹ Waati iyi à waa jɛ ŋɔi Jesu í ni, ntɔ ntɔ, inɛ akã nŋɛ á zambam.

²² Ŋɔi inɔi mɔcɔ ŋau í fɔ ntɔ ntɔ, à wasi ku beeɛ akã akã à waa ni, isa kù jɛ amu ya Lafɛ̃ɛ.

²³ Ŋɔi Jesu í jɛ nŋa í ni, inɛ iyi í gũsi pɛ̃ɛ si inɔ jɛɛ awaò ajɔ, lafɛ̃ɛi á zambam.

²⁴ Amu Amai Amanɛ an ku si bɛi kukɔi idei Ilaaɔ̃ wa fɔ. Amma inɛ iyi á zambam á yɛ ijuukpã nla nla. Á tiaa inɛɛu bii í jɛ a kù buu mɔm wo.

²⁵ Zudasi iyi á zambaɛu mɔ í so ide í ni, isa kù nɔ kù jɛ amu ya Mɛɛtu. Nɔ Jesu í jɛaa í ni, awɔi ì fɔɔ.

Ijɛ iyi aa ka yeò gigii ikui Jesu

²⁶ Waati iyi à waa jɛ, ŋɔi Jesu í so pɛ̃ɛ nɔ í saabu Ilaaɔ̃ titã í bɛi í bububuɛ í na mɔcɔɛ ŋau, í ni, iyi ihɛ̃i í jɛ aram, i gba i jɛ ŋa.

^27-28 Si anyii nŋu, nɔ í so kɔɔfu si bii à dasi vɛ̃ɛ í saabu Ilaaɔ̃ nɔ í na ŋa í ni, iyi ihɛ̃i í jɛ njɛm. Nŋui í jɛ nyindai akabuu iyi Ilaaɔ̃ í dĩ do amanɛ ŋa. An nikãɛ na irii inɛ nkpɔ ku ba n kpa idei dulum du ŋa. Iŋɛ fei, i mɔ ŋa.

²⁹ An sɔ̃ ŋɛ, hai nnyi n kaa n mɔ atɛ̃ vɛ̃ɛ má í gbe hee ajɔ iyi awaɛ ŋa fei aa ka mɔ vɛ̃ɛ titɔ̃ si bommai Baam.

³⁰ Si anyiɛ à kɔ̃ iri ŋa nɔ à fita à bɔ geetei Olivieu.

Jesu wa fɔ iyi Piɛɛ á jã ku ni kù mà nŋu

³¹ Ŋɔi Jesu í sɔ̃ mɔcɔɛ ŋa í ni, idũuyi mɔm, iŋɛ fei aa nyiò anyi na irim ŋa. Bɛi Ilaaɔ̃ í fɔ si kukɔi ideɛ, bɛɛbɛi á ce. Í ni, an kpa woo degbeu nɔ angudã ŋau a fangaa bii fei.

³² Amma an jĩ hai si balɛ nɔ n cua nŋɛ n bɔ ilɛi Galilee.

³³ Ŋɔi Piɛɛ í sɔ̃ɔ í ni, baa bii inɛ fei wa nyiò anyi na iriɛ, amu n kaa n nyiò anyi pai.

³⁴ Ŋɔi Jesu í sɔ̃ɔ í ni, ntɔ ntɔ, idũuyi mɔm, hee ajɛɛ ku maa kɔ, aa jã isɛ gbɛɛta i ni i kù màm.

³⁵ Amma Piɛɛ í jɛaa í ni, n kaa n kɔ̀siɛ pai, baa bii í jɛ an ku do awɔ ajɔi. Nɔ mɔcɔ ŋau mɔ fei à fɔ bɛɛbɛ.

Jesu wa ce kutɔɔ Gɛsemanee

³⁶ Ŋɔi Jesu do mɔcɔɛ ŋa à bɔ inya gɔ iyi à ya kpe Gɛsemanee. Iyi à to bɛ nɔ í sɔ̃ ŋa í ni, i buba ihɛ̃ titã ŋa n koo n ce kutɔɔ wa.

³⁷ Ŋɔi í gbã Piɛɛ do ama minjii Zebedee ŋau à bɔ waju. Nɔ inɔ kufɔ í naa siɛ hee araɛ fei í rɔ.

³⁸ Ŋɔi í sɔ̃ ŋa í ni, inɔ kufɔ í naa sim nla nla hee wa bi ku kpam. I wa ihɛ̃, i bam njoo ku wɔ ŋa.

³⁹ Iyi í fɔ bɛɛbɛ í tã, ŋɔi í bɔ waju keeke í koo í sɛɛbata ilɛ wa ce kutɔɔ í ni, Baam, bii á ce, jɔ̀ wahalau ihɛ̃ ku jĩim. Amma do nŋu fei, ku maà ti ku jɛ ti idɔɔbim, jɔ̀ idɔɔbiɛ ku ce.

⁴⁰ Si anyiɛ, ŋɔi í nyi wa bi mɔcɔ mɛɛta ŋau í ba ŋa à waa sĩ njoo. Ŋɔi í bee Piɛɛ í ni, debɛi, i kù yɔkɔ i kù bam njoo ku wɔ baa isɔ akã ŋa?

⁴¹ I wɔ njoo nɔ i maa ce kutɔɔ ŋa ku ba i maà na i dasi kulɛlɛi inɛ ŋa. Idɔi amanɛ í bi, amma araɛ í kua gbugbãɛ.

⁴² Nɔ í jĩò ŋa isɛ gbeejisia má í koo í ce kutɔɔ í ni, Baam, bii í jɛ wahalau ihɛ̃ kaa jĩim, bii í jɛ kù nɛ bɛi á ce iyi n kù yɔɔi, jɔ̀ idɔɔbiɛ ku ce.

⁴³ Iyi í ce kutɔɔ í tã, ŋɔi í nyi wa bi tu ŋa má nɔ í ba ŋa à waa sĩ njoo má, domi njoo wa kpa ŋa.

⁴⁴ Jesu í jɔ̀ ŋa má, í koo í ce kutɔɔ isɛ gbɛɛtasiaɛ si ide akãu.

⁴⁵ Nɔ í nyi wa bi tu ŋa má í sɔ̃ ŋa í ni, ì sũ ì waa sĩmi ŋai hee nsɛi? I cɔ, waati í gbe keeke iyi aa mu amu Amai Amanɛ a daa ilu dulum ŋa si awɔ.

⁴⁶ Inɛ iyi á zambam wa to wa. I dede kaa kòo ŋa.

À mu Jesu

⁴⁷ Iyi Jesu wa fɔ bɛɛbɛ gbakã, ŋɔi Zudasi, inɛ akãi mɔcɔ maateeji ŋau í to wa. Zamaa nla gɔ wa tooɛ wa à waa mu taakuba ŋa do golo ŋa. Inɛ ngboi woo weei Ilaaɔ̃ ŋa do inɛ ngboi Zuifu ŋaui à bɛ ŋa wa.

⁴⁸ Zudasi nŋu iyi á zamba Jesuu, í tako í sɔ̃ zamaau nyinda gɔ iyi nŋu á ce. Í ni, inɛ iyi an koo n ya n baabaaɛ, lafɛ̃ɛ mbɛ, i muu.

⁴⁹ Hai Zudasi í to wa gbakã, í sɛkɛɛi si Jesu í ni, irei ì caalɛ, Mɛɛtu. Nɔ í baabaaɛ.

⁵⁰ Ŋɔi Jesu í sɔ̃ɔ í ni, kpaasim, iyi ì naa ku ceu, coo. Nɔ inɛ ŋau à to Jesu awɔ gbakã à muu.

⁵¹ Ŋɔi inɛ akãi mɔcɔi Jesu ŋau í yɔ taakubaɛ í cafe itĩi amaacɛi woo wee nlai Ilaaɔ̃u í buu.

⁵² Amma Jesu í sɔ̃ɔ í ni, sindo taakubaɛ si ankɔ̃ɔɛ. Inɛ iyi wa kpa inɛ do taakuba fei, taakubai á na ku kpa lafɛ̃ɛ mɔ.

⁵³ I kù mà iyi bii ǹ bi an yɔkɔ n tɔɔ Baam, nɔ gbakã ku bɛ amaleka dubu nkpɔ nkpɔ wa a naa a sobim?

⁵⁴ Amma bii ǹ ce bɛɛbɛ, kukɔi idei Ilaaɔ̃ iyi í ni mii ŋau ihɛ̃ fei á bam nɔu kaa kɔ̃.

⁵⁵ Ŋɔi Jesu í bee zamaau í ni, amui ì naa ku mu bɛ ŋa do taakuba do golo ŋa bɛi woo ce ile? Ǹ ya n wa si inɔ nŋɛ ajɔ fei n maa n kɔ inɛ ŋa si cio kpasɛ̃i Ilaaɔ̃, nɔ i kù mum ŋa.

⁵⁶ Amma mii ŋau ihɛ̃ fei wa cei ku ba ide iyi walii ŋau à fɔ si kukɔi idei Ilaaɔ̃ ku kɔ̃. Ŋɔi mɔcɔ ŋau fei à jɔ̀ɔ à sa.

Jesu í wa wajui igbɛi woo kiiti ŋa

⁵⁷ Inɛ ŋa iyi à mu Jesuu à bɔòɛ bi Kaifu woo wee nlai Ilaaɔ̃. Tengi bɛi woo kɔ inɛ ŋa si wooda ŋau do inɛ ngboi Zuifu ŋau à tɔtɔɔ.

⁵⁸ Nɔ Piɛɛ í wa hee jĩijĩ wa too Jesu wa do anyi hee í bɔ inɔ bantumai kpasɛ̃i woo wee nlau. Ŋɔi í buba bɛ do woo degbe andɛ koofa ŋau na ku yɛò bɛi ideu á kpaò iri.

⁵⁹ Waati nŋu inɛ ngboi woo weei Ilaaɔ̃ ŋa do igbɛi woo kiiti ŋau fei à waa dɛ a má Jesu ide iyi aa yɛò taaleɛ ku ba a kpaa.

⁶⁰ Amma a kù ba ide iyi aa yɛò taaleɛ baa do iyi ilu sɛɛda ibo nkpɔ í naa í máa ide fei. Si anyii nŋu, amanɛ minji gɔ ŋa à naa.

⁶¹ À ni, mɔkɔu ihɛ̃ í ni nŋu á yɔkɔ ku lɛgɛ kpasɛ̃i Ilaaɔ̃ nɔ si afei ajɔ mɛɛta nŋu ku ma mmuɛ má.

⁶² Ŋɔi woo wee nlai Ilaaɔ̃u í dede í bee Jesu í ni, i kù waa ni ide gɔ? Ide mii inɛ ŋau ihɛ̃ à waa yɛò taaleɛ.

⁶³ Amma Jesu wa cokoɛ. Ŋɔi woo wee nlau í sɔ̃ɔ í ni, do irii Ilaaɔ̃ nŋu iyi í wɛɛ, fɔ bii awɔ ì jɛ Amai Ilaaɔ̃ inɛ iyi Ilaaɔ̃ í cicaui.

⁶⁴ Ŋɔi Jesu í jɛaa í ni, awɔi ì fɔɔ. Amma ǹ wa n sɔ̃ ŋɛi, aa yɛ amu Amai Amanɛ ǹ wa n buba awɔ njɛi Ilaaɔ̃ ilu gbugbã fei. Bɛɛbɛ mɔi aa na i yɛm ŋa ajɔ akã ǹ wa n naa si kudũi ijĩ má.

⁶⁵ Ŋɔi woo wee nlau í ga ibɔɛ ku nyisiò idɔɔkɔ̃ɛ. Ŋɔi í ni, wa bu Ilaaɔ̃. A kù waa dɛ ilu sɛɛda kãma má. I gbɔ bɛi wa bu Ilaaɔ̃ ŋa.

⁶⁶ Bɛirei ì yɛ a cea mɔkɔu ŋa. Ŋɔi aŋa fei à yɛ taaleɛ à ni í to a kpaa.

⁶⁷ Ŋɔi à wasi ku tu si wajui Jesu antɔ nɔ à waa daa kutu, inɛ gɔ ŋa mɔ à waa sambalaɛ.

⁶⁸ Nɔ à ni, awɔ iyi ì waa kpe araɛ inɛ iyi Ilaaɔ̃ í cicau, ce walii i sɔ̃ wa inɛ iyi í cãɛ.

Piɛɛ í jã í ni nŋu kù mà Jesu

⁶⁹ Waati bɛɛbɛ Piɛɛ wa buba bantumai kpasɛ̃u. Ŋɔi mudɛ̃ɛ woo ce icɛ gɔ í sɛkɛɛ siɛ wa í ni, awɔ mɔ ì tako ì wɛɛ do Jesu inɛi Galileeu.

⁷⁰ Amma í jã si wajui aŋa fei í ni, n kù mà iyi ì waa fɔ.

⁷¹ Si anyiɛ, nɔ í dede í bɔ ikpa andɛ kabau. Ŋɔi mudɛ̃ɛ amaacɛ mmu gɔ í yɔɔ má, nɔ í sɔ̃ inɛ ŋa iyi à wa bɛu í ni, inɛɛu ihɛ̃ í tako í wɛɛ do Jesu inɛi Nazarɛtiu.

⁷² Ŋɔi Piɛɛ í jã má nɔ í fɔ do kugbasi í ni, n kù mà inɛɛu bɛ.

⁷³ Iyi í kɔ̃ɔsi má, ŋɔi inɛ ŋa iyi à wa bɛu à sɛkɛɛ si Piɛɛ à ni, ntɔ ntɔ awɔ inɛ akã nŋai. Ide ku fɔɛ wa nyisi iyi awɔ inɛi Galileei.

⁷⁴ Ŋɔi í ceekpe, nɔ í sisi í fɔ má do kugbasi í ni, n kù mà mɔkɔu bɛ. Bɛ gbakã ajɛɛ wa kɔ.

⁷⁵ Nɔ Piɛɛ í ye gigii ide iyi Jesu í sɔ̃ɔu wo í ni, hee ajɛɛ ku maa kɔ aa jã isɛ gbɛɛta i ni i kù màm. Ŋɔi í fita í koo wa kpata ntɔ ntɔ.