Matie 25 - Bibeli do fee

Mɔndai mudɛ̃ɛ gɔ ŋa

¹ Jesu í ni, ajɔ iyi an naa n jɛ bommam á yɛi bɛi faajii mudɛ̃ɛ mɛɛwa gɔ ŋa iyi à so fitila nŋa ŋa à bɔ mɔkɔ titɔ̃ ku ko.

² Si inɔ nŋa amanɛ miiu í jɛ ilu laakai, amanɛ miiu mɔ kù nɛ laakai.

³ Mudɛ̃ɛ miiu hai nɛ laakai ŋau à so fitila nŋa ŋa nɔ a kù so ikpo kosĩa.

⁴ Amma ilu laakai ŋau à so fitila nŋa ŋa do ikpo kosĩa.

⁵ Wee mɔkɔ titɔ̃u kù to wa ńya. Si bɛi wa kpɛ, ŋɔi mudɛ̃ɛ mɛɛwa ŋau à siiko à waa sĩ njoo.

⁶ Hee zakai laja, ŋɔi à gbɔ anu ku dɔ̃i inɛ ŋa wa, à waa ni, mɔkɔ titɔ̃u wee wa to wa. I dede ka kòo.

⁷ Ŋɔi mudɛ̃ɛ mɛɛwa ŋau à jĩ à waa teese fitila nŋa ŋa.

⁸ Hai nɛ laakai ŋau à tɔɔ inɛ ihɔ̃ ŋau à ni, i mu nwa ikpo domi fitila nwa ŋa à waa ku.

⁹ Ŋɔi ilu laakai ŋau à ni, aawo, kaa to awa fei. I koo i ra tu ŋɛ wa gbakã.

¹⁰ Iyi à bɔ ikpou ku ra wa, ŋɔi mɔkɔ titɔ̃u í to wa. Inɛ ngu ŋa iyi à ce sɔɔlu jiida ŋau à tooɛ à lɔ bi ku ce abɔdɔ̃u nɔ à cĩmbo gambou.

¹¹ Si anyiɛ ŋɔi woo bɔ ikpo ku ra ŋau mɔ à to wa, à wasi ku dɔ̃ anu à waa ni, lafɛ̃ɛ, lafɛ̃ɛ, cĩ nwa gambo.

¹² Amma mɔkɔ titɔ̃u í ni, ntɔ ntɔ, n kù mà ŋɛ.

¹³ Ŋɔi Jesu í ni má, to, na nŋu, i maa cɔ kpãa ŋa domi i kù mà ajɔ iyi an nyi wa ŋa hee má jɛ waatiu.

Mɔndai amaacɛ mɛɛta gɔ ŋa

¹⁴ Jesu í sɔ̃ ŋa má í ni, bommai Ilaaɔ̃ í yɛi má bɛi faajii mɔkɔ gɔ iyi wa bi ku bɔ ilu koo kpɛ bɛ. Nɔ í kpe amaacɛɛ ŋa í so amaniɛ fei í da nŋa si awɔ.

¹⁵ Í na inɛ akã fiai wura kpɛkɛlɛ nla miiu, inɛ akã mɔ minji, inɛ mɛɛtasiau mɔ akã, í na aŋa feii si bɛi gbugbãi inɛ fei í to, í bɛi í nɛɛ.

¹⁶ Ŋɔi gbakã amaacɛ iyi à na fia kpɛkɛlɛ miiuu í so fiau wa ceò sĩa, nɔ í ba riba miiu má.

¹⁷ Bɛɛbɛ mɔi inɛ iyi à na minjiu mɔ, í ba riba minji má.

¹⁸ Amma inɛ iyi à na akãu í koo í tu isa í singa fiai lafɛ̃ɛu.

¹⁹ Si bɛɛbɛ ajɔ í koo wa baa, ŋɔi lafɛ̃ɛi inɛ ŋau í baa nɔ í kpe ŋa a na a sisia nŋu bɛi à cea fiau.

²⁰ Amaacɛ iyi í na fia kpɛkɛlɛ miiuu í naaò miiu mmuɛ wa má, nɔ í sɔ̃ɔ í ni, lafɛ̃ɛ, fia kpɛkɛlɛ miiu iyi ì nam nɔu n ceò sĩa hee ǹ ba riba miiu má.

²¹ Ŋɔi lafɛ̃ɛɛ í sɔ̃ɔ í ni, í sĩa, awɔ amaacɛ jiida ilu naanɛi. Si mii keekeu ihɛ̃ ǹ yɛ iyi ì jɛ ilu naanɛ, na nŋu, an daaɛ mii nla si awɔ. Naa wa ka jɛ jingau.

²² Inɛ iyi í na kpɛkɛlɛ minjiu mɔ í naa í ni, lafɛ̃ɛ, fia kpɛkɛlɛ minji iyi ì nam nɔu, ǹ ba riba minji má.

²³ Nɔ lafɛ̃ɛɛ í ni, í sĩa, awɔ amaacɛ jiida ilu naanɛi. Si mii keekeu ihɛ̃ ǹ yɛ iyi ì jɛ ilu naanɛ, na nŋu, an daaɛ mii nla si awɔ. Naa wa ka jɛ jingau.

²⁴ Si anyii nŋu, ŋɔi amaacɛ iyi í na kpɛkɛlɛ akãu mɔ í naa í ni, lafɛ̃ɛ, ǹ mà iyi awɔ inɛ kugaabui. Bii i kù gbɛ̃ bɛi ì ya da, nɔ tengi bii i kù fã dimi, bɛi ì ya mu.

²⁵ Njoi nŋu dei í mum bɛ, nɔ ǹ koo ǹ si fiaɛu ilɛ. To, fiaɛ wee.

²⁶ Ŋɔi lafɛ̃ɛɛu í sɔ̃ɔ í ni, awɔ amaacɛ yaamɔ ilu ikai. Ì mà iyi ǹ ya n da baa bii n kù gbɛ̃, nɔ bɛi n kù fã dimi ǹ ya n mui?

²⁷ To, iyi ì mà bɛɛbɛ wo, aa na inɛ gɔ fiam nɔui, nɔ i daa si inyi. Bii ì ce bɛɛbɛ wo an yɛ ndom do ribaɛ fei waati iyi ǹ baa.

²⁸ Si anyiɛ, ŋɔi í sɔ̃ amaacɛ kpaasi ŋau í ni, i gba fia kpɛkɛlɛ akãu i na inɛ iyi í nɛ mɛɛwau,

²⁹ domi inɛ iyi í nɛ, nŋui à ya kɔ̃ɔa si ku ba iyi í nɛu ku kɔ̃ɔsi má. Amma inɛ iyi kù nɛ, baa keeke iyi í nɛu má à ya gbaai.

³⁰ Amaacɛ nfeu mɔ, i soo i nyɔɔ angule si ilu kuku tengi bii inɛ ŋa aa lesi awɔ si iri a kpataò.

Kiitii ankãanyi

³¹ Ŋɔi Jesu í ni má, si waati iyi amu Amai Amanɛ an naa do amboem do amaleka ŋau fei, an buba si batai bomma ilu amboem.

³² Dimii andunya fei á tɔtɔɔ si wajum, nɔ n fɛɛfɛ inɛ ŋa bɛi woo degbe í ya fɛɛfɛ angudã do iwo ŋa.

³³ An jilɛ inɛ dee dee ŋau ikpa awɔ njɛm, inɛ laalɔ ŋau mɔ ikpa awɔ cangam.

³⁴ Waati bɛɛbɛ amu ilaaluu an sɔ̃ inɛ ŋa iyi à wa awɔ njɛm n ni, i naa wa ŋa, iŋɛ iyi ì ba kuweei Baam. I naa i buba si bomma iyi à ce nŋɛ sɔɔluɛ hai waatii kusintii andunya.

³⁵ Bommau tu ŋɛi si na iyi í jɔ̀ si waati iyi ari wa kpam, ì muum ijɛ ǹ jɛ ŋa. Nɔ si waati iyi agbɛ wa kpam má, ì muum inyi ǹ mɔ ŋa. Nɔ si waati iyi ǹ jɛ inɛ njoo ì gbam si kpasɛ̃ nŋɛ ŋa.

³⁶ Nɔ si waati iyi ǹ wɛɛ basĩ ì bii anyim ŋa. Nɔ iyi ǹ wa n ce bɔ̃ɔ ì gbɔɔm ŋa. Nɔ si waati iyi ǹ wa ile piisɔ̃ɔ ì ya naa ku cɔm ŋa.

³⁷ Waati nŋu, inɛ dee dee ŋau aa jɛɛm a ni, Lafɛ̃ɛ, waati yoomai à yɛ ari wa kpaɛ nɔ à naɛ ijɛ ì jɛ walakɔ agbɛ wa kpaɛ à naɛ inyi ì mɔ.

³⁸ Waati yoomai à yɛ ì jɛ inɛ njoo à gbaɛ si kpasɛ̃ nwa, walakɔ à yɛɛ basĩ nɔ à bii anyiɛ.

³⁹ Mà waati yoomai à yɛ ì waa ce bɔ̃ɔ walakɔ ì wa ile piisɔ̃ɔ nɔ à naa ku cɔɛ.

⁴⁰ Amu ilaaluu an jɛ nŋa n ni, ntɔ ntɔ, bii ì cea inɛ akãi inɛm ŋa iyi à kere à re ŋau ihɛ̃ bɛɛbɛ ŋa, amui ì cea ŋa.

⁴¹ Si anyii nŋu, n bɛi n sɔ̃ inɛi awɔ cangam ŋau mɔ n ni, i fa ara nŋɛ hai kɔkɔm, iŋɛ iyi Ilaaɔ̃ í ceekpe. I bɔ si ina iyi ci ya ku, iyi à koa Seetam do amalekaɛ ŋa.

⁴² Aa lɔ si ina ŋai si na iyi í jɔ̀ waati iyi ari wa kpam wo i kù muum ijɛ n jɛ ŋa. Nɔ waati iyi agbɛ wa kpam i kù muum inyi n mɔ ŋa.

⁴³ Waati iyi ǹ jɛ inɛ njoo i kù gbam si kpasɛ̃ nŋɛ ŋa. Nɔ si waati iyi ǹ wɛɛ basĩ i kù bii anyim ŋa. Iyi ǹ wa n ce bɔ̃ɔ walakɔ iyi ǹ wa ile piisɔ̃ɔ, i ci ya naa ku cɔm ŋa mɔm.

⁴⁴ Aŋa mɔ aa jɛɛm a ni, Lafɛ̃ɛ, waati yoomai à yɛ ari wa kpaɛ, walakɔ agbɛ, walakɔ ì jɛ inɛ njoo, walakɔ basĩ, walakɔ si bɔ̃ɔ, walakɔ ile piisɔ̃ɔ nɔ a kù sobiɛ.

⁴⁵ An jɛ nŋa n ni, ntɔ ntɔ ǹ wa n sɔ̃ ŋɛi, si bɛi i kù cea inɛ akãi inɛ ŋa iyi à kere à re ŋau ihɛ̃ bɛɛbɛ, amui i kù cea ŋa.

⁴⁶ Na nŋu, aa yɛ ijuukpã ŋai si ina iyi ci ya ku. Amma inɛ dee dee ŋau aa lɔ si kuwɛɛ iyi ci ya tã.