Matie 24 - Bibeli do fee

Jesu wa fɔ idei kpasɛ̃i Ilaaɔ̃ ku lɛgɛ

¹ Ŋɔi Jesu í fita hai kpasɛ̃i Ilaaɔ̃. Iyi wa nɛ, ŋɔi mɔcɔɛ ŋa à koo à baa à nyisiɛ bɛi à ma kpasɛ̃i Ilaaɔ̃u do ileɛ ŋa sãa sãa.

² Ŋɔi í sɔ̃ ŋa í ni, ì waa yɛ mii ŋau bɛ fei ŋa ya. Ntɔ ntɔ ǹ wa n sɔ̃ ŋɛi, kuta baa akã kaa na ku maa lesi njɛ bɛ má, aa kɛkɛɛ mbɛ fei.

Wahala iyi á naa si waatii ankãanyi

³ Jesu í koo í buba geetei Olivie. Ŋɔi mɔcɔɛ ŋa à bɔ bi tɛɛ aŋa duusɔ̃ɔ à beeɛ à ni, sɔ̃ wa waati iyi mii nɔu bɛ á ce. Nyinda yoomai á nyisi kunyiɛ wa do waatii ankãanyi.

⁴ Nɔ Jesu í jɛ nŋa í ni, i ce laakai ŋa inɛ gɔ ku maà na ku dĩ iju nŋɛ,

⁵ domi inɛ ŋa iyi aa na a maa naa akã akã a maa ni aŋai à jɛ inɛ iyi Ilaaɔ̃ í cicau aa kpɔ. Aa dĩ ijui inɛ nkpɔ.

⁶ Nɔ aa maa gbɔ ibai igũ amɛɛ amɛɛ do jĩijĩ ŋa. I maà jɔ̀ ku da zigi nŋɛ, domi í gbe mii ŋau bɛ fei ku ce. Amma kù nɔ kù jɛ iri ku kpai andunyau bɛ titã.

⁷ Dimi gɔ ŋa aa ya na a maa ja do dimi mmu ŋa. Ilaalu gɔ ŋa mɔ aa maa ja do ilaalu mmu ŋa. Nɔ ilɛ á yaya si ilu gɔ ŋa, nɔ ari á ce.

⁸ Inɛ nŋu bɛ fei á yɛi bɛi ara kuro sintei bãasĩ ku bɛi ku bí.

⁹ Si waati nŋu, aa dasi ŋɛ si awɔi inɛ ŋa a kpã ŋɛ iju, aa kpa ŋɛ mɔm. Dimi fei á cé ŋɛi na irim.

¹⁰ Waati bɛɛbɛ, inɛ nkpɔ á nyiò anyi, aa maa zamba njɛ nɔ a cé njɛ.

¹¹ Walii ilu ibo nkpɔ ŋai aa na a naa a maa wa inyii itĩi inɛ nkpɔ.

¹² Laalɔ ku ce á kɔ̃ɔsi hee ku jɔ̀ inɛ nkpɔ kaa nɛ kubii kpaasi ŋa má.

¹³ Amma inɛ iyi í temua hee kɔɔɛ á ba faaba.

¹⁴ Aa waazo laabaau jiidai bommai Ilaaɔ̃u si andunya fei ku ba dimi fei ku gbɔɔ, andunya ku bɛi ku kpa iri.

Faajii mii laalɔ iyi wa riisi kpasɛ̃i Ilaaɔ̃

¹⁵ Jesu í ni, walii Daniɛli í fɔ idei mii laalɔ gɔ wo iyi á riisi kpasɛ̃i Ilaaɔ̃. Nŋui aa yɛ ŋa í wa si inya iyi í jɛ ti Ilaaɔ̃. Inɛ iyi wa cio idei mii laalɔu, ku ce laakai ku gbɔɔ sãa sãa.

¹⁶ Waati bɛɛbɛ inɛ ŋa iyi à wa ilɛi Zudee a sa a bɔ iri kuta ŋa.

¹⁷ Nɔ inɛ iyi í wa antaii ile sikifa, bii í kita ilɛ ku ba ku sa ku maà bɔ ngɔgɔ ku so inɔ ileɛ.

¹⁸ Nɔ inɛ mɔ iyi í wa iko ku maà nyi kpasɛ̃ koo so kumbooɛ má.

¹⁹ Waati bɛɛbɛ wahalai bãasĩ ŋa do ayawo ŋa á caa.

²⁰ I ce kutɔɔ ŋa ku ba waatii kusau ku maà na ku jɛ sukui tũtũ walakɔ ajɔi kusĩmi.

²¹ Ntɔ ntɔ, waati bɛɛbɛ wahala nla nlai á naa iyi a kù yɛ dimiɛ hai sintei andunya hee do nnyi, nɔ a kaa ka yɛ dimiɛ má hee do ajɔ fei.

²² Bii Ilaaɔ̃ kù jilɛ si nŋu ku kaye kukpɔi ajɔu wo inɛ gɔ kaa wɛɛ. Amma í kayeɛi na irii inɛ ŋa iyi í cicau.

²³ Waati bɛɛbɛ, bii inɛ gɔ í sɔ̃ ŋɛ í ni, i cɔ inɛ iyi Ilaaɔ̃ í cicau í wa ihɛ̃, walakɔ inɛ mmu gɔ ku ni, í wa ihɔ̃, i maà dasi lafɛ̃ɛ naanɛ ŋa.

²⁴ Inɛ gɔ ŋa aa na a naa akã akã a maa ni aŋai à jɛ inɛ iyi Ilaaɔ̃ í cicau walakɔ a ni aŋai à jɛ walii ŋa amma iboi. Aa maa ce dobu dobu do maamaake ŋa ku ba a dĩ hee do ijui inɛ ŋa iyi Ilaaɔ̃ í cicau bii aa yɔkɔ.

²⁵ Na ŋɔi í jɔ̀ ǹ wa n sɔ̃ ŋɛ fei ndɛɛ do njuma.

²⁶ Na nŋu, bii à na à sɔ̃ ŋɛ à ni, inɛ iyi Ilaaɔ̃ í cicau í wa gbaa, i maà koo. Walakɔ bii à sɔ̃ ŋɛ à ni, wa manji ilaawa, i maà dasi naanɛ.

²⁷ Si bɛi kuŋɔi ijĩ í ya má inya hai nunui daakɔ hee ku bɔ nunui alɛ anu akã, bɛɛbɛ mɔi kubaai amu Amai Amanɛ á yɛ.

²⁸ Tengi bii iku í wa, bɛi yembeeku ŋa à ya tɔtɔɔ.

Kubaai Amai Amanɛ

²⁹ Jesu í ni, si anyii wahalau gbakã, inunu á kuku inya, nɔ cukpa mɔ kaa má inya má, leleaɔ̃ ŋa aa cuku wa hai lele nɔ gbugbãi lele ŋa a yaya.

³⁰ Waati bɛɛbɛ nyindai amu Amai Amanɛ á fita lelei Aɔ̃. Nɔ dimii andunya ŋa fei aa le awɔ si iri a maa kpataò. Aa yɛ amu Amai Amanɛ ǹ wa n naa si kudũi ijĩ do gbugbã nla nla do amboe.

³¹ Kãakãakĩ nla nla á dɔ̃ anu nɔ n bɛ amalekam ŋa wa si andunya gonta mɛɛu. Aŋai aa tɔtɔɔ inɛ ŋa iyi ǹ cica si andunyau fei.

Mii iyi jĩi ndii figi wa kɔ inɛ ŋa si

³² Jesu í ni, i cɔ mii iyi jĩi ndii figi wa kɔ ŋɛ si ŋa. Bii ì na ì yɛ amaawɔɛ ŋa à sinti ku wu wua kpɔtɔɔ, ì ya mà ŋa iyi atɛ í maai wa mbɛ.

³³ Bɛɛbɛ mɔi, bii ì yɛ mii ŋau bɛ fei wa ce, i mà ŋa iyi kubaai amu Amai Amanɛ kaa kpɛ má, ajɔu í maai wa mɔm.

³⁴ Ntɔ ntɔ ǹ wa n sɔ̃ ŋɛi, kù jɛ inɛi nsɛi ŋa feii aa ku ideu ku bɛi ku ce.

³⁵ Lele do ilɛ fei á na ku tã, amma idem ŋa a kaa tã pai.

Ilaaɔ̃ nŋu akãi í mà ajɔu

³⁶ Jesu í sɔ̃ ŋa má í ni, inɛ kãma kù mà waatiu hee má jɛ ajɔ iyi mii ŋau aa ce, baa amaleka ŋa iyi à wa lele, baa amu Amau, í gbe Ilaaɔ̃ Baaba nŋu akã.

³⁷ Si bɛi í ce si waatii Noweeu, bɛɛbɛ mɔi á ce si waati iyi amu Amai Amanɛ an nyi wa.

³⁸ Hee kukɔ̃i inyi nlau ku maa naa, inɛ ŋa à waa jɛ, à waa mɔ, à waa ce abɔdɔ̃ ŋa, à waa mua ama nŋa ŋa mɔkɔ hee í koo í to si ajɔ iyi Nowee í lɔ akɔi inyiu.

³⁹ A kù waa lasabu do wahala dimi bɛɛbɛ hee í to kukɔ̃i inyi nlau í jɛ ŋa fei. Bɛɛbɛ mɔi á jɛ si waati iyi amu Amai Amanɛ an nyi wa.

⁴⁰ Si waati nŋu, amanɛ minji á wa iko, aa so inɛ akã nɔ a jɔ̀ inɛ akã.

⁴¹ Inaabo minji á maa lɔlɔ, aa so inɛ akã a jɔ̀ inɛ akã.

⁴² Na nŋu, i wɛɛò sɔɔlu ŋa, domi i kù mà ajɔ iyi Lafɛ̃ɛ nŋɛ á nyi wa.

⁴³ I gbɔ iyi ihɛ̃ má ŋa. Bii ilu kpasɛ̃ í mà idũ zaka bɛi ile á naa, á dede ku wɔ njoo, kaa jɔ̀ ile ku lɛgɛ gamboɛ.

⁴⁴ Na nŋu, iŋɛ mɔ, i wɛɛò sɔɔlu ŋa, domi amu Amai Amanɛ an nyi wa si waati iyi i kù waa tamaa ŋa.

Amaacɛ jiida do amaacɛ laalɔ

⁴⁵ Í sɔ̃ ŋa má í ni, yooi í jɛ amaacɛ ilu naanɛ iyi í nɛ laakai. Lafɛ̃ɛi í jɛ inɛ iyi ilu kpasɛ̃ gɔ í kpe nɔ í so amaacɛ kpaasiɛ ŋa í daa si awɔ ku maa cɔ ŋa ku na ŋa ijɛ si bɛi í jɔ.

⁴⁶ Inɔ didɔ̃i á jɛ ti amaacɛu bii lafɛ̃ɛɛ í bàa í na í báa wa ce bɛɛbɛ.

⁴⁷ Ntɔ ntɔ, lafɛ̃ɛu á daa amaacɛu mii ndɛɛ fei si awɔ.

⁴⁸ Amma bii í jɛ amaacɛ laalɔi, á lasabui ku ni, lafɛ̃ɛm kaa baa ńya má,

⁴⁹ nɔ ku dede ku maa cã amaacɛ kpaasiɛ ŋa nɔ ku maa jɛ ku maa mɔ do woo mɔ atɛ̃ ŋa ajɔ.

⁵⁰ Bɛɛbɛi, lafɛ̃ɛu á na ku baa si ajɔ iyi kù waa cɔ kpãaɛ, do si waati iyi kù waa tamaa,

⁵¹ nɔ á kpãa iju jiida jiida, nɔ nŋu do ilu muafiti ŋau fei wahala nŋa á jɛ akã. Tengi bɛi á le awɔ si iri ku maa kpataò.