Matie 23 - Bibeli do fee

Muafitii Farisi ŋa do woo kɔ inɛ ŋa si wooda ŋa

¹ Ŋɔi Jesu í sɔ̃ zamaau do mɔcɔɛ ŋau,

² í ni, woo kɔ inɛ ŋa si wooda ŋau do Farisi ŋaui à sãsi agbɛi Moizi à waa sisi woodaɛ.

³ Na nŋu, i ya gbɔ ide nŋa nɔ i ce mii iyi à waa sɔ̃ ŋɛ fei. Amma i maà ya ce kookoosu bɛi à waa ce, domi ide iyi à ya fɔ a ci ya ceò icɛ.

⁴ À ya dĩ aso ku wo a maa kãa inɛ ŋa, amma aŋa taka nŋa a ci ya jɛsi a luu baa do amaawɔ akã.

⁵ Kookoosu nŋa iyi à waa ce fei à waa cooi ku ba a yɛ ŋaò. Bɛɛbɛi à ya dĩ ama tia iyi í la í re ti kpaasi ŋa nɔ a dasi ibɔ jaba nŋa ikũ sisɔ iyi í re ti kpaasi ŋa si itĩ do ilɛ.

⁶ Nɔ a ci ya bi kaa inya sinte bi ku jɛ jingau ŋa do kitãi inɛ ngbo ŋa ile bii à ya ce kutɔtɔɔ ŋa.

⁷ À ya bi inɛ ŋa a maa ce aŋa fɔɔ si bantuma do bɛɛrɛ nɔ a maa kpe ŋa lafɛ̃ɛ.

⁸ Amma iŋɛ, i maà ya jɔ̀ a kpe ŋɛ lafɛ̃ɛ, domi iŋɛ fei saa ŋai, nɔ Lafɛ̃ɛ akã lege legei ì nɛ ŋa.

⁹ Nɔ i maà kpe inɛ kãma Baaba si ilɛ ihɛ̃ ŋa, domi inɛ akãi í jɛ Baa nŋɛ. Nŋui í wa lele.

¹⁰ Nɔ i maà ya jɔ̀ a kpe ŋɛ woo mà ŋa domi woo mà akã lege legei ì nɛ ŋa, nŋui í jɛ inɛ iyi Ilaaɔ̃ í cicau.

¹¹ Inɛ iyi í jɛ inɛ ngbo nŋɛ nŋui í nɛ ku jɛ woo ce icɛ nŋɛ.

¹² Inɛ iyi í so araɛ lele, aa kayeɛi, inɛ mɔ iyi í kaye araɛ aa soo lelei.

Jesu í yɛ taalei Farisi ŋa do woo kɔ inɛ ŋa si wooda ŋa na muafiti nŋa

¹³ Jesu í ni, iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa cĩmboa inɛ ŋa kpãai bommai Ilaaɔ̃ ŋa. Iŋɛ taka nŋɛ, i kù jɛsi i lɔ ŋa, nɔ inɛ ŋa iyi à bi ku lɔ, ì waa ganji ŋa ŋa. [

¹⁴ Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì ya maa ce kutɔɔ sisɔ ŋa ku ba inɛ ŋa a ni iŋɛu inɛ jiida ŋai. Nɔ wee mii iyi jaaɔ̃ ŋa à nɛ fei ì ya gbaa ŋai. Na ŋɔi í jɔ̀ ijuukpã nŋɛ á la ku re.]

¹⁵ Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa dabii bii fei ŋa, ì waa nɛ si tenku do si ilɛ fei ì waa dɛdɛ baa inɛ ŋa iyi aa ba i kpaasi idɔ nŋa ŋa. Nɔ bii ì ba ŋa ì ya sinda lafɛ̃ɛ ŋai ku jɛ inɛ iyi à nɛ a dasiɛ ina iyi ci ya ku ku re baa iŋɛ taka nŋɛ isɛ gbeeji.

¹⁶ Iŋɛ fɛɛju ŋai iyi ì waa mu goloi fɛɛju ŋa, aa yɛ ijuukpã ŋa. Ì ya maa ni ŋa, bii inɛ í ce kugbasi do kpasɛ̃i Ilaaɔ̃ kù jɛ taale baa bii kù kɔ̃ɔ. Amma bii í ce kugbasi do wurai kpasɛ̃u, tilasii ku kɔ̃ ideu.

¹⁷ Iŋɛ fɛɛju nnyɛi ŋai. Yoomai í la í re. Wurau? Mà kpasɛ̃ iyi í jɔ̀ wurau í jɛ ti Ilaaɔ̃.

¹⁸ Nɔ ì waa ni má ŋa, bii inɛ í ce kugbasi do bi kuwee kù jɛ taale baa bii kù kɔ̃ɔ, amma bii í ce kugbasi do iŋai kuweeu, tilasii ku kɔ̃ ideu.

¹⁹ Iŋɛ fɛɛju ŋai. Yoomai í la í re. Iŋai kuweeu? Mà bi kuwee iyi í jɔ̀ iŋai kuweeu í jɛ ti Ilaaɔ̃.

²⁰ Na nŋu, inɛ iyi í ce kugbasi do bi kuwee, hee do mii iyi wa lesi feii í ceò kugbasiu.

²¹ Inɛ mɔ iyi í ce kugbasi do kpasɛ̃i Ilaaɔ̃, hee do Ilaaɔ̃ iyi í wa bɛ feii í ceò kugbasiu.

²² Inɛ mɔ iyi í nɔ í ce kugbasi do lele, hee do batai bommai Ilaaɔ̃ do Ilaaɔ̃ takaɛ iyi wa buba bɛi í ceò kugbasiu.

²³ Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa na Ilaaɔ̃ akã si mɛɛwa fei si nyaui ayɛ ŋa, amma ì waa gbɛjɛ mii iyi í la í re si wooda ŋa. Mii ŋaui í jɛ idɔɔbii Ilaaɔ̃ ku ce do araare ku nyisi do ilu naanɛ ku jɛ. Nŋu ŋau bɛi í jɔ i ce ŋa, nɔ i maà gbɛjɛ iyi í gbe ŋau.

²⁴ Iŋɛ fɛɛju ŋai iyi ì waa mu goloi fɛɛju ŋa. Ì waa coo inyi nŋɛ na kokoo ŋa nɔ ì bɛi ì waa miò kpookpo ŋa.

²⁵ Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ anyii kɔɔfu do ti jɛɛ ŋai ì ya wiɛ ŋa, amma hai si binɛ laalɔ do ilei ì baò mii ndii inɔɛ ŋa.

²⁶ Awɔ Farisi fɛɛju, wiɛ inɔi jɛɛ titã, anyiu mɔ ku bɛi ku má.

²⁷ Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì yɛ ŋai bɛi balɛ iyi à jɔsi mii fũfũ ku ba anyiɛ ku sĩa, amma inɔɛ kũkũi amanɛ do konkombii wa kɔ̃ si.

²⁸ Bɛɛbɛ mɔi iŋɛ taka nŋɛ, bii inɛ ŋa à waa yɛ ŋɛ, iŋɛ inɛ jiida ŋai, amma si idɔ nŋɛ muafiti do laalɔi wa kɔ̃.

²⁹ Iŋɛ woo kɔ inɛ ŋa si wooda ŋa do Farisi ŋa, iŋɛ ilu muafiti ŋai. Aa yɛ ijuukpã ŋa, si na iyi í jɔ̀ ì waa teese balɛi walii ŋau, nɔ ì waa ce booda si ti inɛ dee dee ŋau mɔ má ŋa.

³⁰ Nɔ ì waa ni ŋa, bii í jɛ si waatii bala nwa ŋai à dede wo a kaa ka dasi baa nwa si walii ŋau ku kpa.

³¹ Iŋɛ taka nŋɛ ì waa nyisi iyi iŋɛ tɔkui inɛ ŋa iyi à kpa walii ŋaui.

³² To, i hanya i tambɔ laalɔ iyi bala nŋɛ ŋa à sintiu.

³³ Iŋɛ inɛ buu ŋai bɛi njo wukuku. I kù nɛ bɛi aa ce i saa ina iyi ci ya kuu ŋa.

³⁴ Na nŋu, i de itĩ i gbɔ, an bɛ nŋɛ walii ŋa wa do ilu bisi ŋa do woo mà wooda ŋa. Si inɔ nŋa aa kpa gɔgɔ ŋa, nɔ i kpakpa gɔgɔ ŋa mɔ si jĩi ku gaau, gɔgɔ ŋa mɔ nɔ i tɛ nŋa kpɔtɔɔ ile bii ì ya ce kutɔtɔɔ nŋɛ ŋa, nɔ i maa kpã ŋa iju si ilu do ilu ŋa.

³⁵ Na nŋu, ijuukpãi woo kpa inɛ dee dee ŋau fei á jɛ si iri nŋɛ. Abɛlii í jɛ inɛ dee dee sinte iyi ì kpa ŋa. Zakari amai Baraki iyi ì kpa si afei kpasɛ̃i Ilaaɔ̃ do bi kuweeu ŋa, nŋui í jɛ inɛi ankãanyi iyi ì kpa ŋa. Ikui inɛ dee dee ŋau bɛ fei, hai Abɛli hee ku koo si Zakari, iŋɛi aa yɛ ijuukpãɛ ŋa.

³⁶ Ntɔ ntɔ, ǹ wa n sɔ̃ ŋɛi, ijuukpãi mii ŋau bɛ fei si inɛi nnyi ŋau ihɛ̃i á baa ku jɛ si.

Jesu do Zeruzalɛmu

³⁷ Jesu í ni, iŋɛ inɛi Zeruzalɛmu ŋa, iŋɛi ì ya kpa walii ŋa nɔ i ta amaabɛi Ilaaɔ̃ ŋa mɔ kuta i kpa ŋa ŋa. Isɛ fɛloi ǹ ya n bi n tɔtɔɔ ŋɛ si abɛm bɛi ajɛɛ í ya tɔtɔɔ amaɛ ŋa si ikpaɛ, amma i kù jɛ ŋa.

³⁸ Wee nsɛi Ilaaɔ̃ á fũ nŋɛ kpasɛ̃ nŋɛ si awɔ.

³⁹ Ntɔ ntɔ ǹ wa n sɔ̃ ŋɛi, hai nsɛi i kaa yɛm má ŋa í gbe hee ajɔ iyi aa ni ŋa, Ilaaɔ̃ ku weea inɛ iyi wa naa do irii Lafɛ̃ɛ.