Matie 22 - Bibeli do fee

Mɔndai ijɛi abɔdɔ̃

¹ Ŋɔi Jesu í sɔ̃ ŋa ide do mɔnda ŋa má í ni,

² i gbɔ faaji gɔ iyi wa nyisi ŋɛ bɛi bommai Ilaaɔ̃ í yɛ. Ilaalu gɔ wa cea ama inɛmɔkɔɛ abɔdɔ̃,

³ nɔ í bɛ amaacɛɛ ŋa í ni a koo a kpe inɛ ŋa iyi à kpe abɔdɔ̃u wa. Amma inɛ ŋau a kù waa bi ku naa.

⁴ Nɔ í bɛ amaacɛ mmu gɔ ŋa má í ni, i koo i sɔ̃ inɛ ŋa iyi ǹ kpe ŋau i ni ǹ tã sɔɔlu. Kɛtɛ kombo ŋa do mɛɛmu ku nɛ ikpo gɔ ŋai ǹ kpa nɔ à ce icɛi fei ndɛɛ à tã, a naa wa bi ku ce abɔdɔ̃u.

⁵ Amma inɛ ŋa iyi à kpe ŋau a kù saaluɛ mɔm, inɛ fei í nɛ wũaɛ. Inɛ gɔ ŋa à nɛ iko nŋa, inɛ gɔ ŋa mɔ à nɛ sĩa nŋa.

⁶ Gɔgɔ ŋa à mu amaacɛ ŋau à cã ŋa à kpa ŋa.

⁷ Ŋɔi idɔi ilaaluu í kɔ̃ nɔ í bɛ soogeɛ ŋa à koo à kpa woo kpa inɛ ŋau nɔ à dasi ilu nŋau ina.

⁸ Ŋɔi í sɔ̃ amaacɛɛ ŋau má í ni, to, ijɛi abɔdɔ̃u í jĩa, amma inɛ ŋa iyi ǹ tako ǹ kpe ŋau a kù jɔò ijɛu bɛ má.

⁹ Na nŋu, i bɔ si tafa ŋa i kpe inɛ ŋa iyi à wa bɛ fei wa ŋa.

¹⁰ Nɔ amaacɛ ŋau à bɔ si tafa ŋau à tɔtɔɔ inɛ ŋa iyi à wa bɛ fei wa, hai inɛ jiida do inɛ laalɔ ŋa, nɔ abɔdɔ̃u í kɔ̃ do amanɛ.

¹¹ Iyi ilaaluu í lɔ ile bi ku ce abɔdɔ̃u, í cɔ inɛ ŋa iyi à naa ku jɛu, nɔ í ba wee inɛ akã kù waa dasi jĩnɛi abɔdɔ̃.

¹² Ŋɔi í beeɛ í ni, kpaasi, bɛirei í ce ì lɔ wa ihɛ̃ i kù waa dasi jĩnɛi abɔdɔ̃. Nɔ inɛɛu kù ni ide kãma.

¹³ Ŋɔi ilaaluu í sɔ̃ amaacɛɛ ŋa í ni, i dĩ awɔɛ do isɛɛ ŋa nɔ i soo i nyɔɔ angule si ilu kuku, tengi bii inɛ ŋa aa lesi awɔ si iri a kpataò.

¹⁴ Nɔ Jesu í ni má, inɛ nkpɔi Ilaaɔ̃ í kpe, amma inɛ ŋa iyi í cica a kù kpɔ.

Fiai lɛmpoo ku sã

¹⁵ Waati bɛɛbɛ Farisi ŋa à koo à tɔtɔɔ à waa busi njɛ a ba a lea Jesu taai ide.

¹⁶ Ŋɔi à bɛ mɔcɔ nŋa gɔ ŋa do inɛi Herodu gɔ ŋa wa bi tɛɛ. Iyi à to wa ŋɔi à ni, Mɛɛtu, à mà iyi ì ya fɔ ntɔ, nɔ ì waa kɔ inɛ ŋa si idei Ilaaɔ̃ do ntɔ. Bɛɛbɛ mɔi i kù waa ce njoi inɛ gɔ, domi i ci ya cɔ ijui amanɛ ŋa.

¹⁷ Na nŋu, sɔ̃ wa bɛi ì yɛ. Í sĩa ka sãa ilaalu Sezaa fiai lɛmpoo? Mà ka maà sãa.

¹⁸ Wee Jesu í mà lasabu nŋa iyi à waa ce tã, ŋɔi í sɔ̃ ŋa í ni, iŋɛ ilu muafiti ŋa, na mii í ce ì waa leem taai ide ŋa.

¹⁹ I nyisim kpɛkɛlɛ iyi ì ya sãò lɛmpoou wa ŋa. Nɔ à nyisiɛ kpɛkɛlɛ gɔ.

²⁰ Nɔ Jesu í bee ŋa í ni, fotooi yooi í wa si kpɛkɛlɛu ihɛ̃ nɔ irii yooi à kɔ si.

²¹ Nɔ à ni, ti Sezaai. Ŋɔi Jesu í sɔ̃ ŋa í ni, to, debɛi i sãa Sezaa iyi í jɛ tɛɛ ŋa, nɔ i sãa Ilaaɔ̃ mɔ iyi í jɛ tɛɛ ŋa.

²² Iyi à gbɔ ideu bɛɛbɛ, ŋɔi à biti à jɔ̀ɔ à nɛ.

Idei kujĩi iku ŋa

²³ Si ajɔ akãu Sadusi gɔ ŋa mɔ à naa bi Jesu má. Aŋai à ya maa ni iku ŋa a kaa jĩ. Iyi à to wa bi Jesu ŋɔi à beeɛ à ni,

²⁴ Mɛɛtu, Moizi í ni bii inɛ gɔ í ku í jɔ̀ aboɛ nɔ kù bíò ama, ifɔɛ ku so jaaɔ̃u ku ba ku bía igbãɛ ama.

²⁵ Wee si inɔ nwa inɛ mɛɛje gɔ ŋa à wɛɛ iyi à jɛ amai baa akã. Igbã nŋa í so abo nɔ kù bíò ama nɔ í ku í jɔ̀a ifɔɛ jaaɔ̃u.

²⁶ Bɛɛbɛi inɛ minjisiau mɔ í ce, do mɛɛtasiau, hee í koo í kãsiò amanɛ mɛɛjesiau.

²⁷ Si anyii aŋa fei nɔ abou mɔ í na í ku.

²⁸ To, ajɔ iyi iku ŋa aa na a jĩ, aboi yoo nŋai á jɛ, si bɛi aŋa fei à soo aboi.

²⁹ Amma Jesu í jɛ nŋa í ni, ì waa rara ŋai si na iyi í jɔ̀ i kù mà gbugbãi Ilaaɔ̃ ŋa hee má jɛ mii iyi kukɔi ideɛ wa fɔ.

³⁰ Ntɔ ntɔ, si waati iyi iku ŋa aa na a jĩ, waati bɛɛbɛ inɛmɔkɔ ŋa do inaabo ŋa a kaa so njɛ má, amma aa yɛi bɛi amaleka ŋa.

^31-32 Iyi í jɛ ti idei kujĩi iku ŋa, à kɔɔ wo à ni, Ilaaɔ̃ í ni nŋu Ilaaɔ̃, Lafɛ̃ɛi Aburahamui, do ti Izaaki, do ti Zakɔbu. I kù cio ideu bɛ ŋa iyi Ilaaɔ̃ í sɔ̃ ŋɛi? Ilaaɔ̃ kù jɛ Lafɛ̃ɛi iku ŋa, Lafɛ̃ɛi inɛ ŋa iyi à wɛɛi.

³³ Nɔ zamaa iyi í wa bɛ fei í gbɔ cioi ideɛ nɔ ideu í tosi ŋa.

Wooda iyi í re

³⁴ Ŋɔi Farisi ŋau à gbɔ iyi Jesu í kãmia Sadusi ŋau si ideu nɔ à tɔtɔɔ má.

³⁵ Inɛ akã nŋa iyi wa jɛ woo kɔ inɛ ŋa si woodau wa bi ku cɔ laakaii Jesu nɔ í beeɛ í ni,

³⁶ Mɛɛtu, si wooda ŋau fei, yoomai í re.

³⁷ Ŋɔi Jesu í jɛaa í ni, bi Aɔ̃ Lafɛ̃ɛɛ do idɔɛ fei do lasabuɛ fei.

³⁸ Nŋu bɛi í jɛ wooda sinte, nŋui í nɔ í re ŋa.

³⁹ Minjisia iyi í too wee. Bi inɛ mmu ŋa bɛi ì bi araɛ.

⁴⁰ Wooda minji ŋau bɛi à jɛ icui idei woodai Moizi ŋa do ti idei walii ŋau fei.

Davidi do inɛ iyi Ilaaɔ̃ í cica

⁴¹ Si bɛi Farisi ŋau à tɔtɔɔ, ŋɔi Jesu í bee ŋa ideu ihɛ̃

⁴² í ni, bɛirei ì waa lasabu si idei inɛ iyi Ilaaɔ̃ í cica ŋa. Tɔkui yooi í jɛ. Ŋɔi à jɛaa à ni, tɔkui ilaalu Davidii.

⁴³ Nɔ Jesu í bee ŋa í ni, bii bɛɛbɛi, bɛirei í ce Davidi wa kpoo Lafɛ̃ɛ waati iyi í fɔ do gbugbãi Hundei Ilaaɔ̃ í ni,

⁴⁴ Aɔ̃ Lafɛ̃ɛ í sɔ̃ Lafɛ̃ɛm í ni, buba do ikpa awɔ njɛm ihɛ̃, hee n ce mbɛɛɛ ŋa bi ku lesi isɛɛ.

⁴⁵ Nɔ Jesu í ni má, to, bii Davidi wa kpoo Lafɛ̃ɛɛ, bɛirei á ce ku jɛ tɔkuɛ má.

⁴⁶ Nɔ baa inɛ akã nŋa kù yɔkɔ ku jɛaa ide kãma. Nɔ hai waati bɛɛbɛu inɛ gɔ kù beeɛ ide gɔ má.