Matie 2 - Bibeli do fee

Woo mà ŋa à naa Jesu ku cɔ hai nunui daakɔ

¹ À bí Jesui Betelehɛmu si ilɛi Zudee si waatii ilaalu Herodu. Si anyii kubíɛ woo mà yaasei leleaɔ̃ gɔ ŋa à naa Zeruzalɛmu hai nunui daakɔ,

² nɔ à bee à ni, iwoi ilaalui Zuifu ŋa iyi à bí nsɛiu í wa. Hai nunui daakɔi à yɛ leleaɔ̃ɛ í fita, ŋɔi à naa ku tɔɔɛ.

³ Iyi ilaalu Herodu í gbɔ ideu, ŋɔi inɔɛ í fɔ, bɛɛbɛ mɔi inɛi Zeruzalɛmu ŋau fei inɔ nŋa í fɔ.

⁴ Ŋɔi í tɔtɔɔ inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa fei nɔ í bee ŋa tengi bii à ni aa bí inɛ iyi Ilaaɔ̃ í cicau.

⁵ Ŋɔi à jɛaa à ni, Betelehɛmui si ilɛi Zudee domi bɛɛbɛi walii Misee í tako í kɔɔ wo,

⁶ í ni, Ilaaɔ̃ í ni, iŋɛ inɛi Betelehɛmu ŋa, si ilɛi Zudaa, ntɔ ntɔ, ilu nŋɛ kù kere si ilu nlai Zudaa ŋa fei, si na iyi í jɔ̀ hai si ilu nŋɛi ilaaluu á fita inɛ iyi á gbã inɛi Izirɛli, inɛm ŋa.

⁷ Ŋɔi Herodu í jɔ̀ à kpe woo mà ŋau do asii, í bee ŋa si waati iyi leleaɔ̃u í fita dee dee. Nɔ à sɔ̃ɔ.

⁸ Iyi í gbɔ bɛɛbɛ nɔ í sɔ̃ ŋa í ni a bɔ Betelehɛmu a koo a bee yaasei amau wa sãa sãa. Bii à yɔɔ nɔ a nyi wa a naa a sɔ̃ nŋu ku ba nŋu mɔ nŋu koo gulɛaa.

⁹ Iyi à gbɔ ideɛu à tã, ŋɔi à dasi kpãa. Nɔ leleaɔ̃ iyi à tako à yɛ hai nunui daakɔu í nyi í cua nŋa má hee tengi bii amau í wa, í bɛi í leekĩ lele bɛ cau.

¹⁰ Iyi à yɛ leleaɔ̃u í leekĩ bɛɛbɛ, ŋɔi inɔ nŋa í dɔ̃ hee í caa.

¹¹ Nɔ à lɔ ile bɛ ŋɔi à yɛ amau do Maari iyeɛ. Nɔ à gulɛ à tɔɔɛ. Nɔ à fũ bɔgɔi amani nŋa à nya wura à muaa, do tuae iyi à ya jo do ikpo ku dɔ̃ inunu iyi à ya kpe miru.

¹² Si anyiɛ Ilaaɔ̃ í sɔ̃ ŋa si ala í ni a maà nyi bi ilaalu Herodu má. Nɔ à too kpãa mmu à nɛò ilɛi ide nŋa.

Zozɛfu ŋa à sa à nɛ ilɛi Ezibiti

¹³ Iyi woo mà ŋau à to anyi à nɛ, nɔ amalekai Ilaaɔ̃ í naa bi Zozɛfu si ala í ni, dede i so amau do iyeɛ i sa i nɛò ŋa ilɛi Ezibiti, domi Herodu á dɛ amau ku kpa. I koo i buba bɛ titã hee ajɔ iyi an na n ni i nyi wa má ŋa.

¹⁴ Na ŋɔi í jɔ̀ Zozɛfu í dede idũ í so amau do iyeɛ í nɛò ŋa Ezibiti.

¹⁵ Bɛi à buba hee Herodu í koo í ku. Iyi bɛ í cei ku ba ide iyi Aɔ̃ Lafɛ̃ɛ í sɔ̃ walii Ozee ku sisia inɛ ŋau ku kɔ̃, si bɛi í ni, hai Ezibitii ǹ kpe amam wa.

À kpa ama keeke ŋa

¹⁶ Ŋɔi ilaalu Herodu í yɛ iyi woo mà leleaɔ̃ ŋau à lɛlɛ nŋui, ŋɔi idɔɛ í kɔ̃ jiida jiida. Ŋɔi í ce dooi waati iyi woo mà ŋau à yɛ leleaɔ̃u í fita, ŋɔi í jɔ̀ à koo à kpa ama inɛmɔkɔ kpɔtɔɔ ŋa hee ku koo si do amai adɔ̃ minji ŋa fei si ilui Betelehɛmu do ilɛɛkoɛ ŋa fei.

¹⁷ Bɛɛbɛi ide iyi walii Zeremi í fɔu í ce. Í ni,

¹⁸ à gbɔ anu ku dɔ̃ si ilui Rama. À gbɔ kukpata do buubuu ku cã. Asee, Rasɛlii wa kpata na irii amaɛ ŋa. Nɔ à bɔ ku lɛlɛɛ, amma kù jɛ ku gbɔ kulɛlɛu domi amaɛ ŋa a kù wɛɛ má.

Zozɛfu ŋa à baa hai ilɛi Ezibiti

¹⁹ Si anyiɛ Herodu í na í ku, ŋɔi amalekai Ilaaɔ̃ í naa bi Zozɛfu si ala ilɛi Ezibiti bɛ,

²⁰ í ni, dede i so amau do iyeɛ i nyiò ŋa ilɛi Izirɛli. Inɛ ŋa iyi à waa dɛ amau ku kpa à ku.

²¹ Nɔ Zozɛfu í dede í so amau do iyeɛ à nyi ilɛi Izirɛli má.

²² Amma í gbɔ iyi Aakelausii í jɛ bommai baaɛ Herodu si ilɛi Zudeeu, ŋɔi wa ce njoi ku bɔ ku buba bɛ. Nɔ Ilaaɔ̃ í sɔ̃ɔ si ala má í ni ku bɔ ilɛi Galilee. Ŋɔi í tekĩ í bɔ Galilee si bɛi Ilaaɔ̃ í sɔ̃ɔ.

²³ Nɔ í koo í buba ilui Nazarɛti. Bɛɛbɛi idei walii ŋau í kɔ̃, si bɛi à ni aa kpoo inɛi Nazarɛti.