Matie 18 - Bibeli do fee

Yooi í jɛ inɛ ngbo

¹ Waati nŋu, mɔcɔi Jesu ŋau à naa bi tɛɛ à beeɛ à ni, si bommai Ilaaɔ̃ yooi í jɛ inɛ ngbo.

² Ŋɔi Jesu í kpe ama keeke gɔ í leekĩɛ si anini nŋa.

³ Nɔ í ni, ntɔ ntɔ ǹ wa n sɔ̃ ŋɛi, bii i kù kpaasi idɔ nŋɛ nɔ i kù yɛ bɛi ama keeke ŋa, i kaa lɔ tengi bii Ilaaɔ̃ í jɛ bommaɛ.

⁴ Inɛ iyi á jɛ inɛ ngbo si bommai Ilaaɔ̃ nŋui í jɛ inɛ iyi í kaye araɛ í baa í yɛ bɛi amau ihɛ̃.

⁵ Inɛ iyi í nɔ í gba ama keeke bɛi inɛ ihɛ̃ na irim, amui í gba.

⁶ Inɛ iyi í dasi inɛ akãi ama keeke ŋa iyi à dasim naanɛu ihɛ̃ dulum, á tia a dĩa lafɛ̃ɛu alɔ si kɔ̃ɔ a tale siɛ inɔ tenku inyi ku jɔɔ.

⁷ Ijuukpã nla nlai inɛi andunya ŋa aa yɛ si na iyi í jɔ̀ à ya maa dasi kpaasi nŋa ŋa dulum. Kù nɔ kù nɛ bɛi á ce iyi inɛ gɔ ŋa a kù dasi kpaasi nŋa ŋa dulum, amma inɛ iyi í ce bɛɛbɛ á yɛ ijuukpã ntɔ ntɔ.

⁸ Bii í jɛ awɔɛ walakɔ isɛɛ wa dasiɛ dulum, buu i nyɔɔ ku jĩòɛ. Á tiaɛ i lɔ si kuwɛɛ iyi ci ya tã do awɔ akã walakɔ kutɛ akã do iyi aa nɛ awɔ minji do kutɛ minjiu fei nɔ a dasiɛ ina iyi ci ya ku.

⁹ Bii í nɔ í jɛ ijuɛi wa dasiɛ dulum, nyaa i nyɔɔ ku jĩòɛ. Á tiaɛ i lɔ si kuwɛɛ iyi ci ya tã do iju akã do iyi aa nɛ iju minji fei nɔ a dasiɛ ina iyi ci ya ku.

Mɔndai angudã iyi í nyɔ à tasiɛu

¹⁰ Jesu í sɔ̃ ŋa má í ni, i ce laakai i maà donda baa inɛ akãi amu ŋau ŋa. Ntɔ ntɔ ǹ wa n sɔ̃ ŋɛi, amaleka woo degbe nŋa ŋa à ya maa leekĩi ajɔ fei si wajui Baam iyi í wa lele. [

¹¹ Amu Amai Amanɛ ǹ naa ku faaba inɛ ŋa iyi à nyɔi.]

¹² Bɛirei ì waa lasabu ŋa. Bii inɛ gɔ í nɛ angudã cĩɔ nɔ akãɛ í nyɔ, kaa jɔ̀ cĩɔ fakã kù wa siu titã si geete bii à wau koo dɛdɛ akã iyi í nyɔu wa?

¹³ Ntɔ ntɔ ǹ wa n sɔ ŋɛi, bii í yɔɔ, á nɛ inɔ didɔ̃ nla nla na iriɛ ku re baa cĩɔ fakã kù wa si iyi kù nyɔu.

¹⁴ Bɛɛbɛ mɔi, Baa nŋɛ iyi í wa lele kù bi baa inɛ akãi ama keeke ŋau ku nyɔ.

Bɛi aa ce bii woo dasi naanɛ gɔ í rara

¹⁵ Jesu í ni má, bii kpaasi woo dasi naanɛ gɔ í ce kurara bi tɛɛ, bɔ bi tɛɛ awɔ akã nɔ í jɔ̀ ku mà yaasei kurarau. Bii í gbɔ ideɛ, ì baaɛ wa má si kpãa jiidai.

¹⁶ Amma bii í kɔ̀ ku gbɔ ideɛ, dɛdɛ inɛ akã walakɔ minji si bɛi kukɔi idei Ilaaɔ̃ wa fɔ. I bɔ bi tɛɛ ŋa, nɔ inɛ ŋau aa jɛ sɛɛdai ideu fei.

¹⁷ Bii í kɔ̀ ku gbɔ ide nŋa, sɔ̃ inɛi igbɛi woo dasi naanɛ ŋau. Bii í nɔ í kɔ̀ ku gbɔ baa idei inɛi igbɛ ŋau, i dooɛ bɛi hai dasi naanɛ walakɔ bɛi woo gba fiai lɛmpoo.

¹⁸ Ntɔ ntɔ ǹ wa n sɔ̃ ŋɛi, mii iyi ì kɔ̀si si andunya fei ŋa, lele mɔ á kɔ̀sii. Nɔ mii iyi ì jɛsi si andunya fei ŋa lele mɔ á jɛsii.

¹⁹ Ǹ wa n sɔ̃ ŋɛ má iyi bii amanɛ minji í ce anu akã si andunya ihɛ̃ a tɔɔ ngɔgɔ, Baam iyi í wa lele á mu nŋa,

²⁰ domi tengi bii amanɛ minji walakɔ mɛɛta í tɔtɔɔ à waa ce kutɔɔ do irim, ǹ wa si anini nŋa.

Amaacɛ iyi í kɔ̀ ku cea kpaasiɛ suuru

²¹ Ŋɔi Piɛɛ í bɔ bi Jesu í beeɛ í ni, Lafɛ̃ɛ, bii kpaasim í ceem kurara isɛ fɛloi an ceaa suuru. Hee isɛ gbɛɛje?

²² Ŋɔi Jesu í jɛaa í ni, aawo. N kaa n sɔ̃ɛ iyi andi isɛ gbɛɛjei, amma aa ceaa suurui isɛ kitaò fɛɛwa tuuba mɛɛje.

²³ Sotĩ i gbɔ faaji gɔ iyi wa nyisi bɛi bommai Ilaaɔ̃ í yɛ. Ilaalu gɔ wa bi ku ce dooi gbeseɛ iyi amaacɛɛ ŋa à waa mu.

²⁴ Iyi í sinti ku ce dooi gbeseu, ŋɔi à naaò inɛ gɔ wa bɛ, iyi wa mu gbeseɛ í to baa fɔɔtɔ ciwa nkpɔ nkpɔ.

²⁵ Si bɛi inɛɛu kù nɛ mii iyi á sãò gbeseu, ŋɔi lafɛ̃ɛɛ í ni a taa bɛi aru, nŋu do aboɛ do amaɛ ŋa do mii iyi í nɛ fei a sãò gbeseu.

²⁶ Ŋɔi amaacɛu í gulɛ si wajui lafɛ̃ɛɛu wa tɔɔɛ suuru í ni, yɔkɔɔm suuru an sãɛ mbɛ fei.

²⁷ Nɔ lafɛ̃ɛɛu í ce araareɛ í kpa gbeseu nɔ í jɔ̀ɛ í nɛ.

²⁸ Iyi amaacɛu í fita hai bɛ gbakã, nɔ í ko amaacɛ kpaasiɛ gɔ iyi wa mu gbeseɛ zakai kpɛkɛlɛ cĩɔ. Ŋɔi í bataɛ í tɛ kɔ̃ɔɛ í ni, sãam gbesem iyi ì waa muu.

²⁹ Ŋɔi kpaasiɛu í gulɛ si wajuɛ í tɔɔɛ suuru í ni, yɔkɔɔm suuru an sãɛ gbeseɛ.

³⁰ Amma kù jɛ, nɔ í jɔ̀ à dasi kpaasiɛu piisɔ̃ɔ hee koo sãò gbeseu fei ku tã.

³¹ Ŋɔi amaacɛ iyi à gbe ŋau à yɛ bɛi í ce nɔ inɔ nŋa fei í fɔ, ŋɔi à koo à sisia lafɛ̃ɛ nŋa yaasei ideu fei.

³² Ŋɔi lafɛ̃ɛu í kpoo í ni, awɔ amaacɛ laalɔ, í jɔ iyi ì tɔɔm suuru ǹ kpa gbeseɛu feii mɛɛ.

³³ Awɔ mɔ ì nɛ i ce araarei amaacɛ kpaasiɛi wo si bɛi ǹ ceɛ.

³⁴ Nɔ idɔi lafɛ̃ɛu í kɔ̃, ŋɔi í jɔ̀ à dasiɛ piisɔ̃ɔ si awɔi woo kpã inɛ ŋa iju hee koo sãò gbeseu fei ku tã.

³⁵ Ŋɔi Jesu í ni, bɛɛbɛ mɔi Baam iyi í wa lele á ce nŋɛ, iŋɛ iyi i ci ya cea kpaasi nŋɛ ŋa suuru do inɔ akã.