Matie 17 - Bibeli do fee

Arai Jesu í daana

¹ Si anyii ajɔ mɛɛfa Jesu í kpe Piɛɛ do Zaaki do Zãa ifɔɛ í nya ŋa ikã nɔ à koo à gũ iri kuta nla gɔ aŋa nŋa.

² Ŋɔi à ba wee araɛ í kpaasi. Wajuɛ wa daana jiida jiida, nɔ jaaɛ ŋa í fũuta pai pai bɛi inya kumá.

³ Si anyiɛ ŋɔi Moizi do Elii à faata wa anu akã à waa baa ide ku fɔ.

⁴ Ŋɔi Piɛɛ í sɔ̃ Jesu í ni, Lafɛ̃ɛ, í sĩa ka maa wa ihɛ̃. Bii ì bi, jɔ̀ ka ce ilei acɔ mɛɛta, akã titɛɛ, akã mɔ ti Moizi, akã mɔ ti Elii.

⁵ Wa fɔ ideu kù tã mɔm nɔ inya kumá gɔ í naa si ŋa bɛi bukɔɔ. Nɔ à gbɔ ide ku fɔ gɔ hai si inɔɛ í ni, inɛ ihɛ̃i í jɛ amam. Ǹ buu jiida jiida, siɛi inɔ didɔ̃m fei í ya wa. I ya gbɔ ideɛ ŋa.

⁶ Iyi mɔcɔ ŋau à gbɔ ide ku fɔu ŋɔi njo í mu ŋa hee à sɛɛbata ilɛ.

⁷ Amma Jesu í naa bi tu ŋa í lu ŋa í ni, i dede ŋa i maà jɔ̀ njo ku mu ŋɛ.

⁸ Nɔ à wu iju lele, amma a kù yɛ inɛ gɔ bii kù jɛ Jesu nŋu akã.

⁹ Ŋɔi à waa kita wa hai antaii iri kutau nɔ Jesu í sɔ̃ ŋa í ni, i maà sɔ̃ inɛ gɔ mii iyi ì yɛu bɛ ŋa hee amu Amai Amanɛ n koo n ku nɔ n jĩ hai si balɛ má.

¹⁰ Ŋɔi mɔcɔ ŋau à bee Jesu à ni, nɔ na mii í ce woo kɔ inɛ ŋa si wooda ŋau à ya ni Eliii á tako inɛ iyi Ilaaɔ̃ í cicau ku naa.

¹¹ Nɔ í jɛ nŋa í ni, ntɔi Eliii á tako ku naa nɔ ku teese mii fei sãa sãa.

¹² Amma an sɔ̃ ŋɛ iyi Elii í naa tã, inɛ ŋa a kù màa, nɔ à ceaa bɛi à bi. Bɛɛbɛ mɔi amu Amai Amanɛ an ba ijuukpã si awɔ nŋa.

¹³ Ŋɔi mɔcɔ ŋau à mà bɛbɛi iyi Zãa woo dasi inyii wa fãa.

Jesu í faaba ama gɔ iyi í nɛ inɛi inɔɔko

¹⁴ Iyi à to wa bii zamaa í wau, ŋɔi mɔkɔ gɔ í naa í gulɛ si wajui Jesu

¹⁵ í ni, Lafɛ̃ɛ, ce araarei ama inɛmɔkɔm nɔu ihɛ̃. Bɔ̃ɔi cukuunai wa ce, nɔ wa wahalaɛ mɔi jiida jiida. Ajɔ gɔ ŋa í ya dasiɛ inɔ ina walakɔ inɔ inyi.

¹⁶ Ǹ soo ǹ naaɛ wa bi mɔcɔɛ ŋau ihɛ̃ amma à mɔngɔ ku faabaɛ.

¹⁷ Jesu í ni, iŋɛ inɛ laalɔ hai dasi naanɛ ŋa, hee waati yoomai an maa n wa inɔ nŋɛ. Mà hee waati yoomai an maa n temuaò ŋɛ. I naam amau wa ihɛ̃ ŋa.

¹⁸ Nɔ à naa Jesu amau wa, ŋɔi í la si inɛi inɔɔko iyi í wa si amau nɔ í fita siɛ nɔ amau í ba faaba tengi bɛu bɛ.

¹⁹ Ŋɔi mɔcɔi Jesu ŋau à bɔ bi tɛɛ aŋa duusɔ̃ɔ à beeɛ à ni, na mii í ce awa a kù yɔkɔ a kù lele inɛi inɔɔkou.

²⁰ Nɔ Jesu í jɛ nŋa í ni, si na iyi í jɔ̀ naanɛ nŋɛ kù lai. Ntɔ ntɔ ǹ wa n sɔ̃ ŋɛi, bii naanɛ nŋɛ í la í to baa dimii mii ku gbɛ̃ iyi í kere í re, aa yɔkɔ i sɔ̃ iri kutau ihɛ̃ ŋa i ni ku dede hai bɛ ku bɔ ihɔ̃, nɔ bɛɛbɛ mɔi á dede. Nkãma kù wɛɛ iyi aa mɔngɔ ku ce ŋa. [

²¹ Amma dimii inɛi inɔɔko bɛɛbɛ ci ya fita bii kù jɛ do kutɔɔ do anu ku dĩ.]

Jesu í nyi wa fɔ idei ikuɛ do kujĩɛ má

²² Ajɔ nŋu gɔ si bɛi mɔcɔ ŋau à tɔtɔɔ Galilee bɛ ŋɔi Jesu í sɔ̃ ŋa í ni, aa mu amu Amai Amanɛ a daa inɛ ŋa si awɔ.

²³ Aa kpam, amma si ajɔ mɛɛtasia an jĩ hai si balɛ má. Ŋɔi inɔi mɔcɔ ŋau í fɔ ntɔ ntɔ.

Fia iyi à nɛ ku sã na icɛi kpasɛ̃i Ilaaɔ̃

²⁴ Si anyii nŋu Jesu do mɔcɔɛ ŋa à bɔ Kapɛranumu, ŋɔi woo gba fia iyi à nɛ ku sã na icɛi kpasɛ̃i Ilaaɔ̃ ŋau à naa bi Piɛɛ à beeɛ à ni, Mɛɛtu nŋɛ ci ya sã fiai kpasɛ̃i Ilaaɔ̃?

²⁵ Nɔ Piɛɛ í ni, áá, í ya sã. Ŋɔi Piɛɛ í nɛ kpasɛ̃. Iyi í lɔ ile nɔ Jesu í tako í beeɛ í ni, Simɔɔ, bɛirei ì waa lasabu. Ilaalui andunya ŋau ihɛ̃, hai bi yooi à ya gba fiai lɛmpoo. Hai bi amai ilɛ ŋa de, mà hai bi inɛ njoo ŋa.

²⁶ Nɔ Piɛɛ í jɛ í ni, hai bi inɛ njoo ŋai. Ŋɔi Jesu í ni, na nŋu, amai ilɛ ŋa a kaa sã.

²⁷ Amma do nŋu fei, kù sĩa ka jɛ nŋa bi ku koosɛ. Na nŋu, bɔ tenku bɛ i koo i le kootia, cɛ̃ɛ iyi í tako í muu, la gɛlɛɛ. Aa yɛ kpɛkɛlɛ bɛ iyi á to fia ku sãi awaɛ fei. Nyaa i koo i sã nŋa.