Matie 13 - Bibeli do fee

Mɔndai woo gbɛ̃

¹ Si ajɔ akãu bɛ má, Jesu í fita hai kpasɛ̃ í koo í buba itĩ tenku.

² Nɔ zamaa nla nla gɔ í tɔtɔɔ siɛ. Ŋɔi í lɔ akɔi inyi gɔ í buba ku ba ku kɔ ŋa si cio. Nɔ zamaau fei wa leekĩ itĩ tenkuu bɛ.

³ Nɔ í sɔ̃ ŋa mii nkpɔ do mɔnda. Í ni, mɔkɔ gɔ í fita wa fã dimi.

⁴ Si bɛi wa fã dimiu, ŋɔi gɔgɔ ŋa à cuku si kpãa nɔ yɛi ŋa à naa à jɔɔ.

⁵ Nɔ gɔgɔ ŋa mɔ à cuku si ilɛ iyi í nɛ kuta, tengi bii sãa kù kpɔ. Nɔ í fita bɛ gbakã si na iyi í jɔ̀ sãa kù la bɛ.

⁶ Amma iyi inunu wa ce, ŋɔi í joo nɔ í gbɛ, domi icãɛ kù mi lɛlɛ.

⁷ Gɔgɔ ŋa mɔ à cuku si inɔ agũ ŋa. Ŋɔi agũ ŋau à dede siɛ à biiɛ à kpaa.

⁸ Nɔ gɔgɔ ŋa mɔ à cuku si ilɛ jiida nɔ à bí. Gɔgɔ ŋa à nɛ iju cĩɔ, gɔgɔ ŋa mɔ kita, gɔgɔ ŋa mɔ kuntaa.

⁹ Iyi Jesu í kpa mɔndau í tã ŋɔi í ni, inɛ iyi í nɛ itĩ iyi á gbɔò ide, ku gbɔ.

Na mii í jɔ̀ Jesu í ya maa kpa mɔnda

¹⁰ Ŋɔi mɔcɔɛ ŋa à naa à beeɛ à ni, na mii í ce ì ya maa sɔ̃ inɛ ŋa ide do mɔnda.

¹¹ Nɔ í sɔ̃ ŋa í ni, iŋɛi Ilaaɔ̃ í jɔ̀ ì mà asiii bommaɛ ŋa. Amma kù jɔ̀ inɛ ŋa iyi à gbe ŋau a màa.

¹² Inɛ iyi í nɛ, nŋui à ya kɔ̃ɔa si, nɔ kunɛu ku la. Amma inɛ iyi kù nɛ, baa keeke iyi í nɛu à ya gbaai má.

¹³ Inɛ ŋau, à ya maa cɔ ilu amma a kù waa yɛ, nɔ à waa sɔ̃ ŋa ide amma a kù waa gbɔ yaaseɛ. Na ŋɔi i jɔ̀ ǹ ya n maa n sɔ̃ ŋa ide do mɔnda.

¹⁴ Mii iyi í ba ŋau bɛ Ezai í tako í ce waliiɛ í ni, aa ya desi ide itĩ amma ì kaa gbɔ yaaseɛ ŋa, nɔ aa maa cɔ ilu amma ì kaa yɛ ngɔgɔ ŋa.

¹⁵ Idɔi inɛ ŋau í baa í le. À dĩ itĩ nŋa ku ba a maà gbɔ ide gɔ, nɔ à bii iju nŋa ku ba a maà yɛ ngɔgɔ, nɔ idɔ nŋa mɔ ku maà mà ngɔgɔ. Bii kù jɛ bɛɛbɛ aa na a sinda wa bi Ilaaɔ̃ nɔ ku jɔ̀ a ba iri.

¹⁶ Amma Jesu í sɔ̃ mɔcɔɛ ŋau í ni, iŋɛ ilu inɔ didɔ̃ ŋai, si na iyi í jɔ̀ iju nŋɛ wa yɛ ilu, nɔ itĩ nŋɛ wa gbɔ ide má.

¹⁷ Ntɔ ntɔ ǹ wa n sɔ̃ ŋɛi, walii do inɛ nkpɔ iyi wa jirima idei Ilaaɔ̃, à bi aŋa à yɛ mii iyi ì waa yɛu ihɛ̃ ŋa, amma a kù yɔɔ. Nɔ à bi aŋa a gbɔ mii iyi ì waa gbɔu ihɛ̃ ŋa, a kù nɔ a kù gbɔɔ.

Yaasei mɔndai woo gbɛ̃u

¹⁸ Jesu í sɔ̃ ŋa má í ni, i de itĩ i gbɔ yaasei mɔndai woo gbɛ̃u ŋa.

¹⁹ Inɛ iyi wa gbɔ idei bommai Ilaaɔ̃ nɔ kù gbɔ yaaseɛ, í yɛi bɛi kpãa bii dimiu í cuku. Seetam inɛ laalɔui, í ya naa ku nya ide iyi à gbɛ̃ si idɔɛ.

²⁰ Inɛ mɔ iyi í yɛ bɛi ilɛ kuta bii dimiu í cukuu, bii wa gbɔ ideu gbakã í ya gbaai do inɔ didɔ̃.

²¹ Amma ci ya jɔ̀ ideu ku ce icã jiida si idɔɛ, nɔ kaa yɔkɔ ku leekĩ ku kpɛ. Bii wahala gɔ, walakɔ ijuukpã gɔ í dede na irii ideu, í ya fũsi awɔi gbakã.

²² Inɛ mɔ iyi í gba ideu bɛi si ilɛ ku nɛ agũ ŋau, wa gbɔ ideu amma lasabu bututui mii ŋa iyi wa bitandiɛ do fia ku bi iyi wa dĩ ijuɛ, aŋai à ya ganji ideu ku ce icɛ si inɛɛu.

²³ Inɛ mɔ iyi í gba ideu bɛi si ilɛ jiida, nŋui í jɛ inɛ iyi wa gbɔ ideu nɔ í gbɔɔ do yaaseɛ, nɔ í so iso. Bi inɛ gɔ ŋa, dimiu í so iso cĩɔ, bi inɛ gɔ ŋa kita, bi inɛ gɔ ŋa mɔ kuntaa.

Mɔndai fɔfɔ laalɔ

²⁴ Nɔ Jesu í kpa nŋa mɔnda má í ni, faaji iyi wa fɔ idei bommai Ilaaɔ̃ wee. Mɔkɔ gɔi í koo í gbɛ̃ dimi jiida si ilɛɛ.

²⁵ Amma idũ si waati iyi inɛ fei wa sĩ njoo, ŋɔi mbɛɛi mɔkɔu í naa í gbɛ̃aa fɔfɔ laalɔ si inɔ ilɛɛ nɔ í nɛɛ.

²⁶ Nɔ dimi jiidau í fita, wa la, nɔ í bí. Fɔfɔ laalɔu mɔ í fita, nɔ aŋa fei à la ajɔ.

²⁷ Ŋɔi amaacɛɛ ŋau à naa à sɔ̃ɔ à ni, lafɛ̃ɛ, í jɔ dimi jiidai ì gbɛ̃ si ilɛɛ ya. To, nɔ hai iwoi fɔfɔ laalɔu ihɛ̃ í fita wa má.

²⁸ Ŋɔi í sɔ̃ ŋa í ni, mbɛɛ gɔi í coo. Nɔ amaacɛɛ ŋau à beeɛ à ni, ì bi kaa logoo fɔfɔ laalɔu?

²⁹ Nɔ í ni, aawo. Bii ì waa bi i logoo fɔfɔ laalɔu bii i kù laakai ŋa aa na i tɔtɔɔ i logooò dimi jiidau ŋa.

³⁰ I jɔ̀ aŋa fei a dede nŋa hee bii kumuɛ í to. Waati bɛɛbɛ an sɔ̃ woo mu ŋau a kpa fɔfɔ laalɔu titã a dũu a dasi ina, a bɛi a tɔtɔɔ dimi jiidau a dasi suum.

Mɔndai dimi keeke iyi à ya kpe mutaadi

³¹ Nɔ Jesu í kpa nŋa mɔnda gɔ má í ni, bommai Ilaaɔ̃ í yɛi bɛi ngboi mutaadi iyi inɛ gɔ í so í gbɛ̃ si ilɛɛ.

³² Ngbou í kere í re ngbo ŋa iyi à gbe fei, amma bii à gbɔ̃ɔ, nŋui í ya fita ku lá ku re ama jĩi fei, hee yɛi ŋa à ya maa ce antɛ si amaawɔɛ ŋa.

Mɔndai levɛ̃ɛ

³³ Nɔ Jesu í kpa nŋa mɔnda gɔ má í ni, bommai Ilaaɔ̃ í yɛi bɛi levɛ̃ɛ iyi abo gɔ í so í dasi iyafũi pɛ̃ɛ gũa mɛɛta, nɔ fei ndɛɛ í dede í kpante.

Idei mɔnda ŋau

³⁴ Ide ŋau bɛ fei sãa sãa do mɔndai Jesu í sɔ̃ zamaau, ci ya fɔ ide iyi kù jɛ do mɔnda.

³⁵ Bɛɛbɛi idei inɛ akãi walii ŋau í ce iyi í ni, do mɔndai an ya n sɔ̃ ŋa ide, nɔ si bantumai an fɔ mii iyi wa manji hai waati iyi ǹ taka andunya.

Jesu í sisi yaasei mɔndai fɔfɔ laalɔu

³⁶ Jesu í jɔ̀ zamaau nɔ í koo í lɔ kpasɛ̃. Nɔ mɔcɔɛ ŋau à bɔ bi tɛɛ à ni, sisi nwa yaasei mɔndai fɔfɔ laalɔu.

³⁷ Nɔ í jɛ nŋa í ni, inɛ iyi í gbɛ̃ dimi jiidau amu Amai Amanɛi.

³⁸ Ilɛui í jɛ andunya. Dimi jiidau mɔ, nŋui í jɛ inɛi bommai Ilaaɔ̃ ŋa. Fɔfɔ laalɔu nŋui í jɛ inɛi Seetam ŋa.

³⁹ Mbɛɛ iyi í gbɔ̃ɔ nŋui í jɛ Seetam. Ajɔi kumuu mɔi í jɛ ajɔ iyi andunya á kpa iri, nɔ woo mu ŋau mɔ aŋai à jɛ amaleka ŋau.

⁴⁰ Nɔ si bɛi à ya kpa fɔfɔ laalɔu a dasi inau, bɛɛbɛ mɔi á jɛ si ajɔ iyi andunya á kpa iri.

⁴¹ Amu Amai Amanɛ, an bɛ amalekam ŋa wa a na a nya inɛ ŋa iyi à waa dasi inɛ ŋa kurara do woo ce laalɔ ŋau a tekĩò ŋa hai tengi bii an na n jɛ bommam,

⁴² nɔ a dasi ŋa ina iyi ci ya ku. Tengi bɛi aa lesi awɔ si iri a kpataò.

⁴³ Nɔ waati bɛɛbɛ inɛ ŋa iyi à waa dɛ idɔɔbii Ilaaɔ̃ ku ce aa maa má inyai bɛi inunu si bommai Ilaaɔ̃ Baa nŋa. Inɛ iyi í nɛ itĩ iyi á gbɔò ide, ku gbɔ.

Mɔndai amani iyi wa singa

⁴⁴ Nɔ Jesu í ni má, mɔnda gɔ iyi wa fɔ idei bommai Ilaaɔ̃ wee. Ajɔ nŋu gɔ inɛ gɔ í koo í kãsi amani iyi wa singa si inɔ ilɛ. Iyi í yɔɔ nɔ í teese í singaɛ má. Nɔ í nɛ do inɔ didɔ̃ í koo í ta mii iyi í nɛ fei, nɔ í na í ra ikou.

Mɔndai lɛgɛ

⁴⁵ Jesu í ni, mɔnda gɔ wee má iyi wa fɔ idei bommai Ilaaɔ̃. Woo nya sĩa gɔ wa dɛ lɛgɛ jiida ŋa.

⁴⁶ Iyi í yɛ akã iyi í jɛ jiida ti fia nkpɔ gɔ, nɔ í koo í ta mii iyi í nɛ fei í na í raa.

Mɔndai taao

⁴⁷ Jesu í ni má, bommai Ilaaɔ̃ í yɛi bɛi taao iyi à sɔsi inɔ inyi ku mu cɛ̃ɛ dimi ikã ikã fei.

⁴⁸ Bii í mu cɛ̃ɛ ŋau í tã, sɔɔkɔ ŋau à ya faa wa icei. Nɔ a buba a cica cɛ̃ɛ jiida ŋau a dasi kɔlɔ, cɛ̃ɛ ŋa iyi a kù ce ncɛɛu mɔ nɔ a nikã ŋa.

⁴⁹ Nɔ bɛɛbɛ mɔi á yɛ si iri ku kpai andunya. Amaleka ŋa aa na a nya inɛ ŋa iyi à waa ce laalɔ hai si inɔi inɛ ŋa iyi à waa ce idɔɔbii Ilaaɔ̃,

⁵⁰ a dasi ŋa ina iyi ci ya ku. Bɛi aa lesi awɔ si iri a kpataò.

Amani titɔ̃ do nwo

⁵¹ Jesu í bee ŋa í ni, ì gbɔ yaasei ideu fei ŋa? Nɔ à jɛ à ni, oo.

⁵² Nɔ í sɔ̃ ŋa í ni, bɛɛbɛ mɔi, woo kɔ inɛ ŋa si wooda baa yooma fei iyi í mà idei bommai Ilaaɔ̃, í yɛi bɛi ilu kpasɛ̃ gɔ iyi wa fitaò mii titɔ̃ ŋa do mii nwo ŋa hai si bi ku jilɛ amaniɛ.

Inɛi Nazarɛti ŋa a kù dasi Jesu naanɛ

⁵³ Iyi Jesu í kpa nŋa mɔnda ŋau bɛ í tã, nɔ í nɛ hai bɛ.

⁵⁴ Í bɔ ilu bii í jɛ ama. Iyi í to bɛ í lɔsi ku kɔ inɛ ŋa si cio ile bii à ya maa ce kutɔtɔɔ hee inɛ ŋa iyi à waa gbɔ ideɛ ŋau à na à biti. Nɔ à waa ni, hai iwoi inɛɛu ihɛ̃ í ba dimii bisiu ihɛ̃ wa. Bɛirei í ce wa ceò dimii maamaake ŋau ihɛ̃.

⁵⁵ Í jɔ amai woo gbe jĩi nɔu mbɛ ya. Kù jɛ iyeɛi à ya kpe Maariu? Zaaki do Zozɛfu do Simɔɔ do Zudu ŋa si à jɛ ifɔɛ ŋa?

⁵⁶ Awaò wecĩɛ ŋa fei si à wa ihɛ̃ ba. Bii bɛɛbɛi nɔ hai iwoi í ba gbugbãu ihɛ̃ fei wa.

⁵⁷ To, lasabu nŋu ŋau bɛi í ganji ŋa a dasiɛ naanɛ. Nɔ Jesu í sɔ̃ ŋa í ni, kù nɛ bii walii ci ya nɛ bɛɛrɛ bii kù jɛ si ilɛi ideɛ do si kpasɛ̃ɛ.

⁵⁸ Kù nɔ kù ce maamaake nkpɔ bɛ si na iyi í jɔ̀ a kù dasiɛ naanɛ.